ಎರ್ನಾಕುಲಂ: ಯುವತಿಯೊಬ್ಬಳ ಶವ ನೇಣುಬಿಗಿದ ಸ್ಥಿತಿಯಲ್ಲಿ ಸ್ನೇಹಿತನ ಮನೆಯಲ್ಲಿ ಪತ್ತೆಯಾಗಿರುವ ಘಟನೆ ಕೇರಳದ ಎರ್ನಾಕುಲಂ ಜಿಲ್ಲೆಯ ಅಂಬಲ್ಲೂರ್ನಲ್ಲಿ ನಡೆದಿದೆ.
ಅಂಬಲ್ಲೂರ್ ನಿವಾಸಿ ಸೂರ್ಯ (26) ಮೃತ ಯುವತಿ. ಸ್ನೇಹಿತ ಅಶೋಕ್ ಮನೆಯಲ್ಲಿ ಶವವಾಗಿ ಪತ್ತೆಯಾಗಿದ್ದಾಳೆ. ಸೂರ್ಯ ಶನಿವಾರ ಬೆಳಗ್ಗೆ 10:30ರ ಸುಮಾರಿಗೆ ಅಶೋಕ್ ಮನೆಗೆ ತೆರಳಿದ್ದಳು. ಮೊದಲನೇ ಮಹಡಿಯಲ್ಲಿದ್ದ ಅಶೋಕ್ ಕೋಣೆಗೆ ನೇರವಾಗಿ ಹೋಗಿ ಕೆಲವೊತ್ತು ಕುಳಿತಿದ್ದಳು. ಅದೇ ಸಮಯದಲ್ಲಿ ಅಶೋಕ್ ಪಾಲಕರು, ಮತ್ತೊಬ್ಬ ಮಹಿಳೆ ಮತ್ತು ಇಬ್ಬರು ಪೇಂಟಿಂಗ್ ಕೆಲಸಗಾರರು ಮನೆಯಲ್ಲಿದ್ದರು. ಸೂರ್ಯ ನೇಣು ಬಿಗಿದು ಆತ್ಮಹತ್ಯೆ ಮಾಡಿಕೊಂಡಿದ್ದಾಳೆಂದು ಅಶೋಕ್ ಪಾಲಕರು ಹೇಳಿದ್ದಾರೆ.
ಮಾಹಿತಿ ತಿಳಿದು ಸ್ಥಳೀಯರು ಸ್ಥಳಕ್ಕೆ ಆಗಮಿಸುವ ಮುನ್ನ ಸೂರ್ಯಳ ಮೃತದೇಹ ಬೆಡ್ ಮೇಲಿತ್ತು. ತನ್ನದೇ ಶಾಲಿನಿಂದ ಕೊಠಡಿಯ ಸೀಲಿಂಗ್ ಫ್ಯಾನ್ಸ್ಗೆ ನೇಣು ಹಾಕಿಕೊಂಡಿದ್ದಾಳೆ. ಮೊದಲೇ ಮೃತಪಟ್ಟಿದ್ದರಿಂದ ಆಸ್ಪತ್ರೆಗೆ ಕೊಂಡೊಯ್ಯಲಿಲ್ಲ ಎಂದು ಅಶೋಕ್ ಪಾಲಕರು ತಿಳಿಸಿದ್ದು, ಘಟನಾ ಸ್ಥಳಕ್ಕೆ ಭೇಟಿ ನೀಡಿದ ಮುಲಾಂತುರುತಿ ಠಾಣಾ ಪೊಲೀಸರು ಪರಿಶೀಲನೆ ನಡೆಸಿ, ಪ್ರಕರಣ ದಾಖಲಿಸಿಕೊಂಡು ತನಿಖೆ ಆರಂಭಿಸಿದ್ದಾರೆ.
ಅಶೋಕ್ ಮತ್ತು ಸೂರ್ಯ ಪಿಎಸ್ಸಿ ಕೇಂದ್ರದಲ್ಲಿ ಒಟ್ಟಿಗೆ ಕೆಲಸ ಮಾಡುತ್ತಿದ್ದರು. ಸುಮಾರು 4 ವರ್ಷಗಳಿಂದ ತುಂಬಾ ಆಪ್ತರಾಗಿದ್ದೆವು ಎಂದು ಅಶೋಕ್ ಹೇಳಿದ್ದಾರೆ. ಅಲ್ಲದೆ, ಮತ್ತೊಬ್ಬ ಮಹಿಳೆಯೊಂದಿಗೆ ಅಶೋಕ್ ಮದುವೆ ಡಿಸೆಂಬರ್ 15ರಂದು ನಿಶ್ಚಯವಾಗಿದ್ದು, ಇದೇ ಹತಾಶೆಯಲ್ಲಿ ಯುವತಿ ನೇಣಿಗೆ ಶರಣಾಗಿರಬಹುದು ಎಂಬ ಶಂಕೆ ವ್ಯಕ್ತವಾಗುತ್ತಿದೆ. (ಏಜೆನ್ಸೀಸ್)