Iphone Price: ಕಡೆಗೂ ತಾನು ಹೇಳಿದಂತೆಯೇ ಮಾಡಿ ತೋರಿಸಿದ ಅಮೆರಿಕ ಅಧ್ಯಕ್ಷ ಡೊನಾಲ್ಡ್ ಟ್ರಂಪ್. ತಮ್ಮ ಸುಂಕ ಪರಿಣಾಮದ ಮೂಲಕ ಇಡೀ ಜಗತ್ತಿಗೆ ದೊಡ್ಡ ಶಾಕ್ ನೀಡಿದ್ದಾರೆ. ವಿವಿಧ ದೇಶಗಳ ಮೇಲೆ ತೆರಿಗೆ ಬಾಂಬ್ ಹಾಕಿರುವ ಟ್ರಂಪ್, ವಿದೇಶಿ ಉತ್ಪನ್ನಗಳ ಮೇಲೆ ಭಾರೀ ಸುಂಕಗಳನ್ನು ವಿಧಿಸಿದ್ದಾರೆ. ಭಾರತೀಯ ಉತ್ಪನ್ನಗಳ ಮೇಲೆ ಶೇ. 26ರಷ್ಟು ಸುಂಕ ವಿಧಿಸುವುದಾಗಿ ಘೋಷಿಸಿದ್ದಾರೆ. ಎಲ್ಲ ದೇಶಗಳಿಂದ ಆಮದು ಮಾಡಿಕೊಳ್ಳುವ ಆಟೋಮೊಬೈಲ್ಗಳ ಮೇಲೆ ಶೇ. 25ರಷ್ಟು ಸುಂಕ ವಿಧಿಸುವುದಾಗಿಯೂ ಘೋಷಿಸಿದ್ದಾರೆ. ಸದ್ಯ ಇದೇ ಈಗ ದೊಡ್ಡ ತಲೆನೋವಿಗೆ ಕಾರಣವಾಗಿದೆ.
ಡೊನಾಲ್ಡ್ ಟ್ರಂಪ್ ವಿದೇಶಗಳಿಂದ ಸೇರಿದಂತೆ ಚೀನಾದ ಆಮದುಗಳ ಮೇಲೆ ವಿಧಿಸಿರುವ ಪ್ರತೀಕಾರದ ಸುಂಕಗಳು ಜಾಗತಿಕ ತಂತ್ರಜ್ಞಾನ ಉದ್ಯಮದಲ್ಲಿ ಆಘಾತದ ಬಿರುಗಾಳಿಯನ್ನೇ ಎಬ್ಬಿಸಿದೆ. ಭಾರತವು ಮೊಬೈಲ್ ಫೋನ್ಗಳ ಜತೆಗೆ ಯುಎಸ್ಗೆ ಟೆಲಿಕಾಂ ಮತ್ತು ಎಲೆಕ್ಟ್ರಾನಿಕ್ ಸಾಧನಗಳನ್ನು ರಫ್ತು ಮಾಡುತ್ತದೆ. ಟ್ರಂಪ್ ಅವುಗಳ ಮೇಲೆ ಶೇ. 7.24ರಷ್ಟು ಸುಂಕವನ್ನು ವಿಧಿಸಿದ್ದಾರೆ. ಇದರಿಂದಾಗಿ, ಐಫೋನ್ ಸೇರಿದಂತೆ ಹಲವು ಮೊಬೈಲ್ ಫೋನ್ಗಳ ಬೆಲೆಗಳಲ್ಲಿ ಕ್ರಮೇಣವಾಗಿ ಏರಿಕೆಯಾಗಲಿವೆ. ಸದ್ಯ ಈ ಸಾಲಿನಲ್ಲಿ ಐಫೋನ್ ಮುಂಚೂಣಿಯಲ್ಲಿದೆ.
ನಮ್ಮ ದೇಶದಲ್ಲಿ ಅನೇಕ ಸ್ಮಾರ್ಟ್ಫೋನ್ಗಳ ಬೆಲೆಗಳು ದುಪ್ಪಟ್ಟಾಗಲಿವೆ. ಭಾರತ ಅಮೆರಿಕಾಗೆ ಶತಕೋಟಿ ರೂಪಾಯಿ ಮೌಲ್ಯದ ಉಡುಪುಗಳನ್ನು ರಫ್ತು ಮಾಡುತ್ತದೆ. ಟ್ರಂಪ್ ಇವುಗಳ ಮೇಲೆ ಭಾರೀ ತೆರಿಗೆ ವಿಧಿಸಿದ್ದಾರೆ. ಭಾರತಕ್ಕೆ ಆಮದಾಗುವ ದುಬಾರಿ ಬೆಲೆಯ ಆ್ಯಪಲ್ನ ಐಫೋನ್ ಬೆಲೆಗಳು ಶೇ.40ರಷ್ಟು ಏರಿಕೆಯಾಗಬಹುದು ಎಂದು ತಜ್ಞರು ತಿಳಿಸಿದ್ದಾರೆ. ಹಾಗಿದ್ದರೆ, ಈ ಬದಲಾವಣೆಯಲ್ಲಿ ಪ್ರಸ್ತುತ ಮಾರುಕಟ್ಟೆಯಲ್ಲಿ ಹೆಚ್ಚು ಚಾಲ್ತಿಯಲ್ಲಿರುವ ಐಫೋನ್ 16 ಪ್ರೊ ಮ್ಯಾಕ್ಸ್ನಂತಹ ಪ್ರೀಮಿಯಂ ಮಾದರಿಯ ಫೋನ್ ಬೆಲೆಗಳು ಭಾರತದಲ್ಲಿ 2 ಲಕ್ಷ ರೂ.ಗಳನ್ನು ತಲುಪಬಹುದು ಎಂದು ವಿಶ್ಲೇಷಕರು ಅಂದಾಜಿಸಿದ್ದಾರೆ.
ಮೂಲಸೌಕರ್ಯ ಮತ್ತು ಉದ್ಯೋಗಿಗಳ ಸಮೃದ್ಧಿಯಿಂದಾಗಿ ಅಮೇರಿಕನ್ ಕಂಪನಿಗಳು ಚೀನಾದಲ್ಲಿ ಉತ್ಪಾದನಾ ಘಟಕಗಳನ್ನು ಪ್ರಾರಂಭಿಸಿವೆ. ಇದರ ಭಾಗವಾಗಿ, ಆ್ಯಪಲ್ ಚೀನಾದಲ್ಲಿ ಉತ್ಪಾದನೆಯನ್ನು ಸಹ ಪ್ರಾರಂಭಿಸಿದೆ. ಟ್ರಂಪ್ ಮತ್ತೆ ಯುಎಸ್ ಅಧ್ಯಕ್ಷ ಸ್ಥಾನವನ್ನು ವಹಿಸಿಕೊಂಡ ಬಳಿಕ ಚೀನಾದಂತಹ ದೇಶಗಳಲ್ಲಿ ಉತ್ಪಾದನೆಯನ್ನು ಪ್ರಾರಂಭಿಸಿದ ಯುಎಸ್ ಕಂಪನಿಗಳು ಮನೆಯಲ್ಲಿ ಸ್ಥಾವರಗಳನ್ನು ಸ್ಥಾಪಿಸಲು ಒತ್ತಾಯಿಸಲು ಹೊಸ ಸುಂಕಗಳನ್ನು ವಿಧಿಸಲಾಗುತ್ತಿದೆ ಎಂದು ಅವರು ಹೇಳಿದ್ದಾರೆ. ಈ ಸುಂಕಗಳು ಆಪಲ್ ಅನ್ನು ಸಂದಿಗ್ಧತೆಗೆ ಸಿಲುಕಿಸಿವೆ.
ಯುಎಸ್ ಸುಂಕಗಳೊಂದಿಗೆ ಕಂಪನಿಯು ಶೇ. 54ರಷ್ಟು ಸಂಚಿತ ಸುಂಕ ದರವನ್ನು ಎದುರಿಸಬೇಕಾಗುತ್ತದೆ. ಆ್ಯಪಲ್ ಈ ವೆಚ್ಚಗಳನ್ನು ಗ್ರಾಹಕರಿಗೆ ವರ್ಗಾಯಿಸಲು ನಿರ್ಧರಿಸಿದರೆ, ಪ್ರಸ್ತುತ 799 (ಸುಮಾರು 68,000 ರೂ.) ಬೆಲೆಯ ಆರಂಭಿಕ ಹಂತದ ಐಫೋನ್ 16 ಬೆಲೆ 1,142 ಡಾಲರ್ಗಳಿಗೆ (ಸುಮಾರು 97,000 ರೂ.) ಹೆಚ್ಚಾಗುತ್ತದೆ. ಇದು ಶೇ.43ರಷ್ಟು ಹೆಚ್ಚಾಗುವ ಸಾಧ್ಯತೆಯಿದೆ. ಸುಧಾರಿತ ಎಐ ಸಾಮರ್ಥ್ಯಗಳು ಮತ್ತು 1ಟಿಬಿ ಸಂಗ್ರಹಣೆಯನ್ನು ಹೊಂದಿರುವ ಐಫೋನ್ 16 ಪ್ರೊ ಮ್ಯಾಕ್ಸ್ನಂತಹ ಪ್ರೀಮಿಯಂ ಮಾದರಿಗಳು 2,300 ಡಾಲರ್ ಅಂದರೆ ಸುಮಾರು 1.95 ಲಕ್ಷ ರೂ. ಗಡಿದಾಟಲಿದೆ.
ಆ್ಯಪಲ್ ಇಂಟೆಲಿಜೆನ್ಸ್ನಂತಹ ಹೊಸ ವೈಶಿಷ್ಟ್ಯಗಳನ್ನು ವ್ಯಾಪಕವಾಗಿ ಅಳವಡಿಸಿಕೊಳ್ಳದ ಕಾರಣ, ಐಫೋನ್ ಮಾರಾಟವು ಈಗಾಗಲೇ ಪ್ರಮುಖ ಮಾರುಕಟ್ಟೆಗಳಲ್ಲಿ ಒತ್ತಡಕ್ಕೆ ಸಿಲುಕಿದೆ. ಹೆಚ್ಚಿನ ಬೆಲೆಗಳು ಬೇಡಿಕೆಯನ್ನು ಮತ್ತಷ್ಟು ಕಡಿಮೆ ಮಾಡುತ್ತದೆ. ಇದು ಚೀನಾದ ಹೊರಗೆ ಹೆಚ್ಚಿನ ಫೋನ್ಗಳನ್ನು ತಯಾರಿಸುವ ಮತ್ತು ಸುಂಕಗಳಿಂದ ಕಡಿಮೆ ಪರಿಣಾಮ ಬೀರುವ ಸ್ಯಾಮ್ಸಂಗ್ನಂತಹ ಪರ್ಯಾಯ ಕಂಪನಿಗಳ ಉತ್ಪನ್ನಗಳಿಗೆ ಗ್ರಾಹಕರನ್ನು ಪ್ರೇರೇಪಿಸಬಹುದು ಎನ್ನಲಾಗಿದೆ,(ಏಜೆನ್ಸೀಸ್).