ಮುಂಬೈ: ವಿಡಿಯೋ ಕಾಲ್ನಲ್ಲಿ ವೈದ್ಯರ ಸಲಹೆ ಪಡೆದು ಯುವ ಪ್ರಯಾಣಿಕನೊಬ್ಬ ರೈಲ್ವೆ ಪ್ಲಾಟ್ಫಾರ್ಮ್ನಲ್ಲಿ ( Railway platform ) ಗರ್ಭಿಣಿಯೊಬ್ಬರಿಗೆ ಯಶಸ್ವಿ ಹೆರಿಗೆ ಮಾಡಿಸಿರುವ ಅಪರೂಪದ ಘಟನೆ ತಡರಾತ್ರಿ (ಅ.16) 1 ಗಂಟೆ ಸುಮಾರಿಗೆ ಮುಂಬೈನ ರಾಮ ಮಂದಿರ ನಿಲ್ದಾಣದಲ್ಲಿ ನಡೆದಿದೆ.
ಪ್ರತ್ಯಕ್ಷದರ್ಶಿ ಮಂಜೀತ್ ಧಿಲ್ಲೋನ್ ಎಂಬುವರು ತಮ್ಮ ಸಾಮಾಜಿಕ ಜಾಲತಾಣದಲ್ಲಿ ವಿಡಿಯೋ ಹಂಚಿಕೊಂಡ ಬಳಿಕ ಈ ಪ್ರಕರಣ ಬೆಳಕಿಗೆ ಬಂದಿದೆ. ವಿಕಾಸ್ ಬೇಂದ್ರೆ ಎಂಬ ಯುವಕನ ಧೈರ್ಯಶಾಲಿ ನಡೆಗೆ ಇದೀಗ ಎಲ್ಲೆಡೆ ಮೆಚ್ಚುಗೆ ವ್ಯಕ್ತವಾಗುತ್ತಿದೆ.
ಈ ವ್ಯಕ್ತಿ ನಿಜಕ್ಕೂ ಧೈರ್ಯಶಾಲಿ, ಈತನನ್ನು ಪದಗಳಲ್ಲಿ ವರ್ಣಿಸಲು ಸಾಧ್ಯವೇ ಇಲ್ಲ. ಈ ಯುವಕ ರಾಮಮಂದಿರ ನಿಲ್ದಾಣದಲ್ಲಿ ರಾತ್ರಿ 1 ಗಂಟೆ ಸುಮಾರಿಗೆ ಸರಪಳಿ ಎಳೆದು ರೈಲು ನಿಲ್ಲಿಸಿದಾಗ ಎಲವೂ ಪ್ರಾರಂಭವಾಯಿತು. ನಾನು ಈ ವಿಚಾರದ ಬಗ್ಗೆ ಹೇಳುವಾಗ ನಿಜಕ್ಕೂ ಭಾವುಕನಾಗುತ್ತಿದ್ದೇನೆ. ಆ ಗರ್ಭಿಣಿಯ ಮಗು ಅರ್ಧ ಹೊರಗೆ ಮತ್ತು ಅರ್ಧ ಒಳಗೆ ಇತ್ತು. ಆ ಕ್ಷಣದಲ್ಲಿ, ದೇವರು ಈ ಸಹೋದರನನ್ನು ಒಂದು ಕಾರಣಕ್ಕಾಗಿ ಅಲ್ಲಿಗೆ ಕಳುಹಿಸಿದನೆಂದು ನನಗೆ ಅನಿಸುತ್ತದೆ ಅಂತ ಧಿಲ್ಲೋನ್ ಬರೆದುಕೊಂಡಿದ್ದಾರೆ.
ಈ ವೇಳೆ ನಾವೆಲ್ಲರೂ ನಮ್ಮ ಕೈಲಾದಷ್ಟು ಪ್ರಯತ್ನ ಮಾಡಿದೆವು. ನಾವು ಹಲವಾರು ವೈದ್ಯರಿಗೆ ಕರೆ ಮಾಡಿದೆವು. ಆದರೆ, ಆಂಬ್ಯುಲೆನ್ಸ್ ತಡವಾಗುತ್ತದೆ ಎಂದು ಅವರೆಲ್ಲ ಹೇಳಿದರು. ಕೊನೆಗೆ, ಓರ್ವ ಮಹಿಳಾ ವೈದ್ಯರು ವಿಡಿಯೋ ಕರೆಯ ಮೂಲಕ ಯುವಕನಿಗೆ ಸೂಚನೆಗಳನ್ನು ನೀಡಿದರು. ಆತ ಆ ಎಲ್ಲ ಸೂಚನೆಗಳನ್ನು ನಿಖರವಾಗಿ ಪಾಲಿಸಿದನು. ಆ ಕ್ಷಣದಲ್ಲಿ ಆತ ತೋರಿಸಿದ ಧೈರ್ಯ ಪದಗಳಿನ್ನು ಮೀರಿದ್ದು ಎಂದು ಧಿಲ್ಲೋನ್ ಬಣ್ಣಿಸಿದ್ದಾರೆ.
ಇದಕ್ಕೂ ಮೊದಲು, ಗರ್ಭಿಣಿಯ ಕುಟುಂಬವು ಆಕೆಯನ್ನು ಹತ್ತಿರದ ಆಸ್ಪತ್ರೆಗೆ ಕರೆದೊಯ್ದಿತ್ತು. ಆದರೆ, ಆಸ್ಪತ್ರೆ ಅಧಿಕಾರಿಗಳು ಅಲ್ಲಿ ಹೆರಿಗೆ ಮಾಡಲು ಸಾಧ್ಯವಿಲ್ಲ ಎಂದು ಹೇಳಿ ವಾಪಸ್ ಕಳುಹಿಸಿದ್ದಾರೆ. ಆದ್ದರಿಂದ, ಬೇರೆ ದಾರಿಯಿಲ್ಲದೇ ಆಕೆಯನ್ನು ರೈಲಿನ ಮೂಲಕ ವಾಪಸ್ ಕರೆದುಕೊಂಡು ಬರಬೇಕಾಯಿತು. ಇದೇ ವೇಳೆ ಹೆರಿಗೆ ನೋವು ಕಾಣಿಸಿಕೊಂಡಿತು. ಇಂತಹ ಪರಿಸ್ಥಿತಿಯಲ್ಲಿ ಆಸ್ಪತ್ರೆಯು, ಗರ್ಭಿಣಿಗೆ ಸಹಾಯ ಮಾಡಲು ನಿರಾಕರಿಸಿದ್ದು ನಿಜಕ್ಕೂ ನಾಚಿಕೆಗೇಡಿನ ಸಂಗತಿ ಎಂದು ಧಿಲ್ಲೋನ್ ಅವರು ಕಿಡಿಕಾರಿದ್ದಾರೆ.
ಆ ರಾತ್ರಿ, ಆ ಯುವಕ ಎರಡು ಜೀವಗಳನ್ನು ಉಳಿಸಿದ. ಇದರ ನಡುವೆ ಅನೇಕ ಜನರು ಅಲ್ಲಿಯೇ ನಿಂತು ಸುಮ್ಮನೇ ಹೊರಟುಹೋದರು. ನೀವು ಎಂದಾದರೂ ಯಾರಿಗಾದರೂ ಸಹಾಯ ಮಾಡುವ ಅವಕಾಶ ಸಿಕ್ಕರೆ, ಅದನ್ನು ದೇವರ ಸಂಕೇತವೆಂದು ಪರಿಗಣಿಸಿ ಅದನ್ನು ಮಾಡಿ, ನನ್ನ ಸ್ನೇಹಿತರೇ. ಆ ಯುವಕ ತಾಯಿ ಮತ್ತು ಆಕೆಯ ಮಗುವಿನ ಜೀವಗಳನ್ನು ಉಳಿಸಿದನು. ಇದಾದ ಬಳಿಕ ಒಟ್ಟಿಗೆ, ನಾವು ತಾಯಿ ಮತ್ತು ಮಗುವನ್ನು ಸುರಕ್ಷಿತವಾಗಿ ಆಸ್ಪತ್ರೆಗೆ ಕರೆದೊಯ್ದೆವು. ಈಗ ನನಗಾಗುತ್ತಿರುವ ಅನುಭವಗಳನ್ನು ಪದಗಳಲ್ಲಿ ಹೇಳಲು ಸಾಧ್ಯವಿಲ್ಲ ಎಂದು ಧಿಲ್ಲೋನ್ ಹೇಳಿದ್ದಾರೆ. (ಏಜೆನ್ಸೀಸ್)