ನವದೆಹಲಿ: ಫಿನ್ಟೆಕ್ ಕಂಪನಿ CREDನ ಮುಖ್ಯ ಕಾರ್ಯನಿರ್ವಾಹಕ ಅಧಿಕಾರಿ ಅಥವಾ CEO (ಸಿಇಒ) ಕುನಾಲ್ ಷಾ ಭಾನುವಾರ ತಮ್ಮ ಇನ್ಸ್ಟಾಗ್ರಾಮ್ನಲ್ಲಿ ಸ್ಟೋರಿಯಲ್ಲಿ 'ಆಸ್ಕ್ ಮಿ ಎನಿಥಿಂಗ್' ಸೆಷನ್ ನಡೆಸಿದ್ದರು. ಆಗ ಅವರು ತಮ್ಮ ಸಂಬಳವನ್ನು ಬಹಿರಂಗಪಡಿಸಿದ್ದರು. ಕುನಾಲ್ ಷಾ ತಿಂಗಳಿಗೆ 15,000 ರೂ. ವೇತನವನ್ನು ಪಡೆಯುವುದಾಗಿ ಹೇಳಿದ್ದಾರೆ. ಜತೆಗೆ ಅದಕ್ಕೆ ಕಾರಣವನ್ನು ಸಹ ಹೇಳಿದರು.
ಬಳಕೆದಾರರು ಸಂಬಳದ ಬಗ್ಗೆ ಕೇಳಿದ ಪ್ರಶ್ನೆಗೆ : "CRED ನಲ್ಲಿ ನಿಮ್ಮ ಸಂಬಳ ತುಂಬಾ ಕಡಿಮೆಯಾಗಿದೆ? ನೀವು ಹೇಗೆ ಬದುಕುತ್ತೀರಿ?" ಇದಕ್ಕೆ ಪ್ರತಿಕ್ರಿಯಿಸಿದ ಕುನಾಲ್ ಷಾ, "ಕಂಪನಿ ಲಾಭದಾಯಕವಾಗುವವರೆಗೆ ನನಗೆ ಉತ್ತಮ ಸಂಬಳ ಸಿಗುತ್ತದೆ ಎಂದು ನಾನು ನಂಬುವುದಿಲ್ಲ. CRED ನಲ್ಲಿ ನನ್ನ ಸಂಬಳ ತಿಂಗಳಿಗೆ ₹ 15,000. ನಾನು ಹಿಂದೆ ನನ್ನ ಕಂಪನಿ ಫ್ರೀಚಾರ್ಜ್ ಅನ್ನು ಮಾರಾಟ ಮಾಡಿದ್ದರಿಂದ ನಾನು ಆರಾಮವಾಗಿ ಬದುಕಬಲ್ಲೆ"
ಕಥೆಯ ಸ್ಕ್ರೀನ್ಶಾಟ್ ಅನ್ನು ಇನ್ಸ್ಟಾಗ್ರಾಂ ಬಳಕೆದಾರ ಅಜೀತ್ ಪಟೇಲ್ ಟ್ವಿಟರ್ನಲ್ಲಿ ಹಂಚಿಕೊಂಡಿದ್ದಾರೆ. ಅವರು ಸ್ಕ್ರೀನ್ಶಾಟ್ನ ಜೊತೆಗೆ ಬರೆದಿದ್ದಾರೆ. "ಕೋಟಿಗಳಲ್ಲಿ ಸಂಬಳ ತೆಗೆದುಕೊಳ್ಳುವ ಸಿಇಒಗಳು ಇದ್ದಾರೆ, ಅದರ ಜತೆಗೆ ಕುನಾಲ್ ಷಾ ರೀತಿಯವರೂ ಇದ್ದಾರೆ."
ಈ ಪೋಸ್ಟ್ ಎರಡು ಸಾವಿರಕ್ಕೂ ಹೆಚ್ಚು ಲೈಕ್ಗಳು ಮತ್ತು 1.4 ಲಕ್ಷ ವೀಕ್ಷಣೆಗಳನ್ನು ಸಂಗ್ರಹಿಸಿದೆ. ಆದರೂ, ಕುನಾಲ್ ಷಾ ರ ಪ್ರತಿಕ್ರಿಯೆ ಇಂಟರ್ನೆಟ್ನಲ್ಲಿ ಎರಡು ಬಣಗಳನ್ನು ಸೃಷ್ಟಿಸಿದಂತೆ ತೋರುತ್ತಿದೆ. ಕೆಲವರು ಅವರ ಕ್ರಮವನ್ನು ಮೆಚ್ಚಿದರೆ, ಇತರರು ತೆರಿಗೆ ಉಳಿಸುವ ಮಾರ್ಗವಾಗಿದೆ ಎಂದು ಹೇಳಿದ್ದಾರೆ.
"ಅವರು ದೊಡ್ಡ ಹೂಡಿಕೆದಾರರು ಮತ್ತು 500 ಕ್ಕೂ ಹೆಚ್ಚು ಸ್ಟಾರ್ಟ್ಅಪ್ಗಳಲ್ಲಿ ಹೂಡಿಕೆ ಮಾಡಿದ್ದಾರೆ. ಅವರ ಶೇರ್ಗಳು ಕಂಪನಿಯಿಂದ ನಿರ್ಗಮಿಸುವಾಗ ಅವರಿಗೆ ಆದಾಯವನ್ನು ನೀಡುತ್ತವೆ" ಎಂದು ಇನ್ನೊಬ್ಬ ವ್ಯಕ್ತಿ ಪ್ರತಿಕ್ರಿಯಿಸಿದ್ದಾರೆ.