ವಾಷಿಂಗ್ಟನ್: ಕರೊನಾ ಸೋಂಕು ತಡೆಗಾಗಿ ಪಾಕಿಸ್ತಾನಕ್ಕೆ 94 ಲಕ್ಷ ಡಾಲರ್ ನೆರವನ್ನು ಅಮೆರಿಕ ಘೋಷಿಸಿದ ಬೆನ್ನಲ್ಲೇ, ಅಂತಾರಾಷ್ಟ್ರೀಯ ಹಣಕಾಸು ನಿಧಿ (ಐಎಂಎಫ್) ಕೂಡ ಗುರುವಾರ ಅಂದಾಜು 1.4 ಶತಕೋಟಿ ಡಾಲರ್ ನೆರವಿಗೆ ಒಪ್ಪಿಗೆ ನೀಡಿದೆ. ಕೋವಿಡ್ 19ರ ಕಾರಣದಿಂದಾಗಿ ಬಾಕಿ ಪಾವತಿಸಲು ಅಡಚಣೆ ಎದುರಿಸುತ್ತಿದ್ದ ಪಾಕಿಸ್ತಾನಕ್ಕೆ ತುರ್ತು ಹಣಕಾಸಿನ ನೆರವು ಎಂದು ಇದನ್ನು ಐಎಂಎಫ್ ಪರಿಗಣಿಸಿದೆ.
ನಿಖರವಾಗಿ ಹೇಳಬೇಕು ಎಂದರೆ 1.386 ಶತಕೋಟಿ ಡಾಲರ್ ( ಅಂದಾಜು 10,615 ಕೋಟಿ ರೂಪಾಯಿ) ಹಣದ ನೆರವು ಇದಾಗಿದೆ. ಬ್ಯಾಲೆನ್ಸ್ ಪೇಮೆಂಟ್ ಬಿಕ್ಕಟ್ಟು ಎದುರಿಸುತ್ತಿರುವ ಪಾಕಿಸ್ತಾನ ಐಎಂಎಫ್ ಬಳಿ ತುರ್ತು ಹಣಕಾಸಿನ ನೆರವು ಯಾಚಿಸಿತ್ತು. ಕಳೆದ ವರ್ಷ ಜುಲೈನಲ್ಲಿ ಪಾಕಿಸ್ತಾನ ದಿವಾಳಿಯಾಗುವುದನ್ನು ತಪ್ಪಿಸಲು ಬೇಲ್ ಔಟ್ ಘೋಷಿಸಿ ಐಎಂಎಫ್ ಜತೆಗೆ ಒಪ್ಪಂದ ಮಾಡಿತ್ತು. ಇದರಂತೆ ಪಾಕಿಸ್ತಾನ ಐಎಂಎಫ್ನಿಂದ 6ಶತಕೋಟಿ ಡಾಲರ್ ಬೇಲ್ ಔಟ್ ಪ್ಯಾಕೇಜ್ ಸಿಗುವುದಿತ್ತು. ಇದಕ್ಕೆ ಹೊರತಾಗಿ ಈ 138.6 ಕೋಟಿ ರೂಪಾಯಿ ನೆರವು ಈಗ ಪಾಕಿಸ್ತಾನಕ್ಕೆ ಸಿಕ್ಕಿದೆ.
ಕೋವಿಡ್ 19 ಸೋಂಕು ಪಾಕಿಸ್ತಾನದ ಅರ್ಥ ವ್ಯವಸ್ಥೆ ಮೇಲೆ ವಿಪರೀತ ಪರಿಣಾಮ ಬೀರುತ್ತಿದ್ದು, ಈ ನೆರವು ಅದಕ್ಕೆ ಅಗತ್ಯವಾಗಿದೆ. ಪಾಕ್ನ ಆರ್ಥಿಕತೆ ಉತ್ತೇಜನ ನೀಡುವುದು ಕೂಡ ಅವಶ್ಯ. ಅದರ ಈಗಿರುವ ಬಾಕಿ ಪಾವತಿಸುವುದಕ್ಕೆ ದಾನಿ ರಾಷ್ಟ್ರಗಳ ನೆರವೂ ಬೇಕಾಗಬಹುದು ಎಂದು ಐಎಂಎಫ್ನ ಫಸ್ಟ್ ಡೆಪ್ಯುಟಿ ಮ್ಯಾನೇಜಿಂಗ್ ಡೈರೆಕ್ಟರ್ ಮತ್ತು ಆ್ಯಕ್ಟಿಂಗ್ ಚೇರ್ಪರ್ಸನ್ ಜ್ಯೋಫ್ರೇ ಒಕಮೊಟೊ ಹೇಳಿಕೊಂಡಿದ್ದಾರೆ. (ಏಜೆನ್ಸೀಸ್)