Cinema Ticket: ಮಲ್ಟಿಪ್ಲೆಕ್ಸ್ ಸೇರಿದ ರಾಜ್ಯ ಎಲ್ಲಾ ಚಿತ್ರಮಂದಿರಗಳಲ್ಲಿ ತೆರಿಗೆ ಹೊರತುಪಡಿಸಿ ಎಲ್ಲಾ ಭಾಷೆಯ ಸಿನಿಮಾಗಳಿಗೆ 200 ರೂಪಾಯಿಯ ಏಕರೂಪದ ದರದ ಟಿಕೆಟ್ ನಿಗದಿಪಡಿಸಿದ್ದ ರಾಜ್ಯ ಸರ್ಕಾರದ ಆದೇಶಕ್ಕೆ ಮಂಗಳವಾರ (ಸೆ.23) ಕರ್ನಾಟಕ ಹೈಕೋರ್ಟ್ ಮಧ್ಯಂತರ ತಡೆ ನೀಡಿದೆ.
ರಾಜ್ಯ ಸರ್ಕಾರದ ನಿರ್ಧಾರ ವಿರೋಧಿಸಿ ಸಿನಿಮಾ ನಿರ್ಮಾಣ ಸಂಸ್ಥೆ ಹೊಂಬಾಳೆ ಕಂಬೈನ್ಸ್, ಮಲ್ಟಿಪ್ಲೆಕ್ಸ್ ಅಸೋಷಿಯೇಷನ್ ಹೈಕೋರ್ಟ್ನಲ್ಲಿ ರಿಟ್ ಅರ್ಜಿ ಸಲ್ಲಿಸಿದ್ದರು. ಸದರಿ ವಿಚಾರಣೆ ನಡೆಸಿರುವ ಕೋರ್ಟ್ ಸರ್ಕಾರದ ಆದೇಶಕ್ಕೆ ತಡೆ ನೀಡಿ ಆದೇಶ ಹೊರಡಿಸಿದೆ.
ಕರ್ನಾಟಕ ಸಿನಿಮಾ (ನಿಯಂತ್ರಣ) ನಿಯಮಗಳು 2014 ರ ತಿದ್ದುಪಡಿಯ ಭಾಗವಾಗಿ ಸೆ. 12ರಂದು ಕರ್ನಾಟಕ ಸರ್ಕಾರ ಹೊಸ ನಿಯಮವಾಗಿ ಸಿನಿಮಾ ಟಿಕೆಟ್ಗಳ ಬೆಲೆಯನ್ನು 200 ರೂ.ಗಳಿಗೆ ಮಿತಿಗೊಳಿಸುವ ಆದೇಶವನ್ನು ಜಾರಿಗೊಳಿಸಿತ್ತು.
ಸ್ಟಾರ್ ನಟರ ಸಿನಿಮಾ, ಬೇರೆ ಭಾಷೆಯ ಸಿನಿಮಾ ಬಿಡುಗಡೆಯಾದೆರೆ ಟಿಕೆಟ್ ದರ ಇದ್ದಕ್ಕಿದ್ದಂತೆ ವಿಪರಿತವಾಗಿ ಹೆಚ್ಚಾಗುತ್ತಿತ್ತು. ಮಧ್ಯಮ ವರ್ಗ ಮತ್ತು ಬಡವರು ಅಷ್ಟೊಂದು ಬೆಲೆ ಕೊಟ್ಟು ಸಿನಿಮಾ ನೋಡುವುದು ದುಷ್ತರವಾಗಿತ್ತು. ಈ ಎಲ್ಲಾ ಕೋನಗಳಿಂದ ರಾಜ್ಯ ಸರ್ಕಾರ ಟಿಕೆಟ್ ದರಕ್ಕೆ ಮೀತಿ ಹೇರಿತ್ತು.