ವುಹಾನ್: ಕರೊನಾ ವೈರಸ್ ಸ್ಪೋಟ ಹಾಗೂ ಸಾವಿನ ಸಂಖ್ಯೆಯಲ್ಲದೆ ಈವರೆಗೂ ಸತ್ಯ ನುಡಿಯದ ಚೀನಾ, ಕರೊನಾ ವಿಚಾರ ಮಾತನಾಡುವಾಗಲೆಲ್ಲಾ ಪ್ರತಿ ಹಂತದಲ್ಲೂ ಮಹತ್ವದ ಮಾಹಿತಿಯನ್ನು ಮುಚ್ಚಿ ಹಾಕಿ ಸುಳ್ಳಗಳನ್ನು ಹೇಳಿಕೊಂಡು ಬಂದಿದ್ದು, ಅಲ್ಲಿನ ಪರಿಣಿತರು, ಪರಿವೀಕ್ಷಕರು ಮತ್ತು ರಾಜಕಾರಣಿಗಳು ಎಚ್ಚರಿಕೆಯನ್ನು ನೀಡಿದ್ದಾರೆ.
ಪ್ರಾರಂಭದಲ್ಲಿ ವೈರಸ್ ಸ್ಪೋಟಗೊಂಡಿದ್ದನ್ನು ಗಮನಿಸಿ ಎಚ್ಚರಿಕೆ ನೀಡದ ವೈದ್ಯ ವೆನ್ಲಿಯಾಂಗ್ರನ್ನು ಚೀನಾ ಸರ್ಕಾರ ಶಿಕ್ಷಿಸಿತು ಎಂದು ತಿಳಿದುಬಂದಿದೆ. ಈ ಸಂಬಂಧದ ತನಿಖೆಯಲ್ಲೂ ವೆನ್ಲಿಯಾಂಗ್ ಮಾಹಿತಿ ಸರಿಯಿದೆ. ಅವರು ವದಂತಿ ಹರಡಿಸಿಲ್ಲ ಎಂದು ಹೇಳಿದೆ. ವರದಿ ಬೆನ್ನಲ್ಲೇ ಚೀನಾ ಸರ್ಕಾರ ವೆನ್ಲಿಯಾಂಗ್ ಕುಟುಂಬದ ಕ್ಷಮೆಯನ್ನು ಕೇಳಿತ್ತು.
ಇಷ್ಟೇ ಅಲ್ಲದೆ, ವೈರಸ್ ಮನಷ್ಯನಿಂದ ಮನುಷ್ಯನಿಗೆ ಹರಡುತ್ತದೆ ಎಂಬುದನ್ನು ಚೀನಾ ನಿರಾಕರಿಸಿತು ಮತ್ತು ವೈರಸ್ ಪೀಡಿತ ಪ್ರದೇಶಗಳಲ್ಲಿ ಲಾಕ್ಡೌನ್ ಹೇರಲು ವಿಳಂಬ ಮಾಡಿತು. ಇದೆಲ್ಲವನ್ನು ಸಕಾಲದಲ್ಲಿ ಮಾಡಿದ್ದರೆ ವೈರಸ್ ಹರಡುವುದನ್ನೇ ಚೀನಾ ತಡೆಯಬಹುದಿತ್ತು. ಇಂದು ಇಷ್ಟೊಂದು ಸಾವು-ನೋವು ಸಂಭವಿಸುತ್ತಲೇ ಇರಲಿಲ್ಲ.
ಯಾವಾಗ ವೈರಸ್ ಹರಡಲು ಆರಂಭವಾಯಿತೋ ಕಮ್ಯೂನಿಷ್ಟ್ ಪಾರ್ಟಿ ನೇತೃತ್ವದ ಚೀನಾ ಸರ್ಕಾರ ಮಾಡಿದ ಮೊದಲ ಕೆಲಸವೆಂದರೆ, ಸಾರ್ವಜನಿಕ ಮಾಹಿತಿಗೆ ಸೆನ್ಸಾರ್ ಹಾಕಿತು. ಬದಲಾಗಿ ತಪ್ಪು ಮಾಹಿತಿಯನ್ನೇ ಹರಡಿತು. ಒಂದು ಹೆಜ್ಜೆ ಮುಂದು ಹೋಗಿ ಅಮೆರಿಕ ಸೇನಾಪಡೆಗಳೇ ವೈರಸ್ ಹೊತ್ತುತಂದಿದ್ದಾರೆ ಎಂದು ಆರೋಪ ಹೊರಿಸಿಬಿಡ್ತು.
ಚೀನಾದ ಪ್ರಮುಖ ರಾಜಕಾರಣಿಗಳು ಸಹ ಸರ್ಕಾರದ ನಡೆಯನ್ನು ಟೀಕಿಸಿ ಸಾವಿನ ಸಂಖ್ಯೆ ಕುರಿತು ನೀಡಿರುವ ವರದಿ ತಪ್ಪೆಂದು ಹೇಳಿದ್ದಾರೆ. ಇನ್ನು ವೈರಸ್ ತವರು ವುಹಾನ್ನಲ್ಲಿ ಸಾವಿನ ಸಂಖ್ಯೆ ಈಗ ನೀಡಿರುವುದಕ್ಕಿಂತಲೂ ಹತ್ತು ಪಟ್ಟು ಹೆಚ್ಚಿರಬಹುದೆಂದು ಅಂದಾಜಿಸಿದ್ದಾರೆ. ಇದಕ್ಕೆ ಪುಷ್ಠಿ ನೀಡುವಂತೆ ಇತ್ತೀಚೆಗಷ್ಟೇ ಚೀನಾ ಸರ್ಕಾರ ಸುಮಾರು 5 ಸಾವಿರಕ್ಕೂ ಹೆಚ್ಚು ಚಿತಾಭಸ್ಮವುಳ್ಳ ಮಡಿಕೆಗಳನ್ನು ಮೃತರ ಕುಟುಂಬಗಳಿಗೆ ವಿತರಿಸಿದ್ದಾರೆ.
ಹೀಗೆ ಪ್ರತಿಹಂತದಲ್ಲೂ ಕರೊನಾ ವೈರಸ್ ವಿಚಾರವಾಗಿ ಸುಳ್ಳುಗಳ ಮಹಾಗೋಡೆಯನ್ನು ಕಟ್ಟಿಕೊಂಡು ಬಂದಿರುವ ಚೀನಾ ಸರ್ಕಾರದ ಮಾತನ್ನು ನಂಬುವುದಾದರೂ ಹೇಗೆ ಎಂಬ ಚರ್ಚೆ ಅಲ್ಲಿನ ಗಣ್ಯರ ವಲಯದಲ್ಲೇ ನಡೆದಿದೆ. (ಏಜೆನ್ಸೀಸ್)