ಬೀಜಿಂಗ್: ಕರೊನಾ ವೈರಸ್ ಸ್ಪೋಟ ಕೇಂದ್ರ ಚೀನಾದ ವುಹಾನ್ ನಗರದಲ್ಲಿ ಸೀಗಡಿ ಮಾರಾಟ ಮಾಡುತ್ತಿದ್ದ 57 ವರ್ಷದ ಮಹಿಳೆಯನ್ನು ಕೋವಿಡ್-19 ಸೋಂಕಿಗೆ ಒಳಗಾದ ಮೊದಲ ರೋಗಿ ಎಂದು ನಂಬಲಾಗಿದೆ.
ಮಹಿಳೆಯನ್ನು ವೀ ಗುಕ್ಸಿಯನ್ ಎಂದು ಗುರುತಿಸಲಾಗಿದ್ದು, ಸುಮಾರು ಒಂದು ತಿಂಗಳ ಸುದೀರ್ಘ ಚಿಕಿತ್ಸೆಯ ಬಳಿಕ ಜನವರಿಯಲ್ಲಿ ಗುಣಮುಖರಾಗಿದ್ದಾರೆ. ಸೋಂಕು ಹರಡುವಿಕೆಯನ್ನು ಚೀನಾ ಸರ್ಕಾರ ಪತ್ತೆ ಹಚ್ಚಲು ಮೂಲ ಕಾರಣವಾಗಿದ್ದು ಇದೇ ಮಹಿಳೆ ಎಂದು ನಂಬಲಾಗಿದೆ.
ಹುನಾನ್ ಸೀಫುಡ್ ಮಾರುಕಟ್ಟೆಯಲ್ಲಿ ಸೀಗಡಿ ಮಾರುತ್ತಿದ್ದ ಗುಕ್ಸಿಯನ್ಗೆ ಡಿಸೆಂಬರ್ 10ರಲ್ಲೇ ಶೀತ ಕಾಣಿಸಿಕೊಂಡಿತು. ಮೊದಲಿಗೆ ಸಾಮಾನ್ಯ ಜ್ವರ ಎಂದು ಭಾವಿಸಿ, ಸ್ಥಳೀಯ ಆಸ್ಪತ್ರೆಗೆ ಹೋಗಿ ಚುಚ್ಚುಮದ್ದು ಪಡೆದು ಬಂದಿದ್ದಳು. ಆದಾಗ್ಯೂ ಆರೋಗ್ಯ ಮತ್ತಷ್ಟು ದುರ್ಬಲವಾಗುತ್ತಿರುವುದನ್ನು ಮನಗಂಡು ವುಹಾನ್ನಲ್ಲಿರುವ ಇಲೆವೆಂಥ್ ಹಾಸ್ಪಟಿಲ್ಗೆ ಭೇಟಿ ನೀಡಿದ್ದರು.
ಆರೋಗ್ಯದಲ್ಲಿ ಮತ್ತಷ್ಟು ಕ್ಷೀಣತೆ ಕಂಡ ಗುಕ್ಸಿಯನ್ರನ್ನು ಅತಿದೊಡ್ಡ ವುಹಾನ್ ಯೂನಿಯನ್ ಹಾಸ್ಪಿಟಲ್ಗೆ ಡಿಸೆಂಬರ್ 16ರಂದು ದಾಖಲಿಸಲಾಯಿತು. ತನ್ನ ಅನಾರೋಗ್ಯದ ಗಂಭೀರತೆ ಬಗ್ಗೆ ಗುಕ್ಸಿಯನ್ ಹೇಳಿಕೊಂಡಳು. ಇದಾದ ಕೆಲವೇ ದಿನಗಳಲ್ಲಿ ಹುನಾನ್ ಮಾರುಕಟ್ಟೆಯಿಂದ ಒಂದೇ ರೀತಿಯ ರೋಗ ಲಕ್ಷಣವಿರುವ ಅನೇಕರು ಹಾಸ್ಪಿಟಲ್ಗೆ ಭೇಟಿ ಕೊಟ್ಟರು.
ಯಾವಾಗ ಸೀಫುಡ್ ಮಾರುಕಟ್ಟೆಯಿಂದ ಕರೊನಾ ವೈರಸ್ ಸ್ಪೋಟಗೊಂಡಿದೆ ಎಂಬುದನ್ನು ಅರಿತ ವೈದ್ಯರು ತಕ್ಷಣ ಡಿಸೆಂಬರ್ ಅಂತ್ಯದಲ್ಲೇ ಗುಕ್ಸಿಯನ್ರನ್ನು ಕ್ವಾರಂಟೈನ್ಗೆ ಒಳಪಡಿಸಿದರು.
ಕರೊನಾ ವೈರಸ್ ಜೀವ ಪ್ರಬೇಧಗಳ ಗಡಿಯನ್ನು ದಾಟಿ ಹೊಸ ಅತಿಥೇಯರೊಂದಿಗೆ ಹೊಂದಿಕೊಳ್ಳುವ ಸಾಮರ್ಥ್ಯವಿದೆ ಎಂಬುದು ಸ್ಪಷ್ಟವಾಯಿತು. ಮುಂದಿನ ದಿನಗಳಲ್ಲಿ ಮತ್ತಷ್ಟು ಕರೊನಾ ವೈರಸ್ ಹುಟ್ಟಿಕೊಳ್ಳುತ್ತವೆ ಎಂಬುದು ಸ್ಪಷ್ಟವಾದ ಬೆನ್ನಲ್ಲೇ, ಅದರ ಕುರಿತಾದ ಅಧ್ಯಯನಗಳು ಆರಂಭವಾಗತೊಡಗಿತು.
ತಕ್ಷಣ ಜೀವಂತ ಪ್ರಾಣಿ ಮಾರಾಟ ಮಾರುಕಟ್ಟೆಯನ್ನು ಮುಚ್ಚಲಾಯಿತು. ಗುಕ್ಸಿಯನ್ ಜನವರಿಯಲ್ಲಿ ಗುಣಮುಖರಾದರು. ಮಾರುಕಟ್ಟೆಯಲ್ಲಿ ಮಾಂಸ ಮಾರಾಟಗಾರರೊಂದಿಗೆ ಹಂಚಿಕೊಂಡ ಶೌಚಗೃಹದಿಂದಲೇ ಸೋಂಕು ಹರಡಿದ್ದಾಗಿ ಗುಕ್ಸಿಯನ್ ಹೇಳಿದ್ದರು. ಅಲ್ಲದೆ, ಅನೇಕ ಮಾರಾಟಗಾರರು ಕೂಡ ಇದೇ ಸೋಂಕಿಗೆ ತುತ್ತಾಗಿದ್ದಾರೆ ಎಂಬ ಮಾಹಿತಿಯನ್ನು ನೀಡಿದರು.
ಪ್ರಾರಂಭದಲ್ಲಿ ವುಹಾನ್ ಮುನ್ಸಿಪಲ್ ಹೆಲ್ತ್ ಕಮಿಷನ್, ಗುಕ್ಸಿಯನ್ ಸೇರಿದಂತೆ ಪರೀಕ್ಷೆಗೆ ಒಳಪಡಿಸಿದ 27 ಮಂದಿಯಲ್ಲಿ ಕೋವಿಡ್ 19 ಪಾಸಿಟಿವ್ ಫಲಿತಾಂಶ ಬಂದಿತ್ತು. ಇದರಲ್ಲಿ 24 ಮಂದಿ ಮಾರುಕಟ್ಟೆಗೆ ನೇರ ಸಂಪರ್ಕವನ್ನು ಹೊಂದಿದ್ದರು. ಈ ಬಗ್ಗೆ ಸರ್ಕಾರ ಮೊದಲೇ ಎಚ್ಚೆತ್ತುಕೊಂಡಿದ್ದರೆ ಸಾವಿನ ಸಂಖ್ಯೆಯನ್ನು ತಗ್ಗಿಸಬಹುದಾಗಿತ್ತು ಎನ್ನುತ್ತಾರೆ ಗುಕ್ಸಿಯನ್. (ಏಜೆನ್ಸೀಸ್)
ಏಪ್ರಿಲ್ ಆರಂಭದಿಂದಲೇ ಕರೊನಾದಿಂದ ಭಾರತೀಯರಿಗೆ ಮುಕ್ತಿ: ಭರವಸೆ ತಂದ ಹೊಸ ಸಂಶೋಧನಾ ವರದಿ!
ವಾವ್… ನನ್ನ ಟೀ-ಶರ್ಟ್ ಮೇಲೇಕೆ ನಿಮ್ಮ ಲುಕ್ : ಸನ್ನಿ ಲಿಯೋನ್ ಅವರ ಒಗಟಿನ ಮಾತಿಗೂ ಲಾಕ್ಡೌನ್ಗೂ ಇದೆ ಲಿಂಕ್!