ಬೆಂಗಳೂರು: ಅಭಿನಯ ಚಕ್ರವರ್ತಿ, ನಟ ಕಿಚ್ಚ ಸುದೀಪ್ ನಡೆಸಿಕೊಡುತ್ತಿರುವ ಕನ್ನಡದ ಅತೀ ದೊಡ್ಡ ರಿಯಾಲಿಟಿ ಶೋ ಬಿಗ್ ಬಾಸ್ ಇದೀಗ 10ನೇ ಸೀಸನ್ಗೆ ಕಾಲಿಟ್ಟಿದ್ದು, ಗ್ರ್ಯಾಂಡ್ ಓಪನಿಂಗ್ ಮೂಲಕ ಯಶಸ್ವಿಯಾಗಿ ಪ್ರಾರಂಭಗೊಂಡಿದೆ.
ಮನೆಗೆ ಎಂಟ್ರಿ ಕೊಟ್ಟು ಒಂದು ವಾರಗಳನ್ನು ಪೂರೈಸಿದ ಸ್ಪರ್ಧಿಗಳಿಗೆ ತಮ್ಮ ಸರಿ-ತಪ್ಪುಗಳನ್ನು ವಾರದ ಕಥೆ ಕಿಚ್ಚನ ಜತೆ ಕಾರ್ಯಕ್ರಮದ ಪಂಚಾಯತಿ ಕಟ್ಟೆಯಲ್ಲಿ ಅರ್ಥೈಸುವ ಕೆಲಸವನ್ನು ಅಚ್ಚುಕಟ್ಟಾಗಿ ನಿರ್ವಹಿಸುವ ಸುದೀಪ್, ಸೀಸನ್ 10ರ ಮೊದಲ ವಾರದ ಕಥೆಯಲ್ಲಿ ಸ್ಪರ್ಧಿಗಳಿಗೆ ತಪ್ಪುಗಳ ಬಿಸಿಯನ್ನು ಮುಟ್ಟಿಸಿದ್ದಾರೆ.
ವೀಕ್ಷಕರ ನಿರೀಕ್ಷೆಯಂತೆ ಹಾಗೂ ಈ ಮೊದಲೇ ತಿಳಿದಂತೆ ತುಕಾಲಿ ಸಂತೋಷ್ ಹಾಸ್ಯದ ಭರಾಟೆಯಲ್ಲಿ ಡ್ರೋನ್ ಪ್ರತಾಪ್ಗೆ ಉಂಟು ಮಾಡಿದ ಬೇಸರದ ಬಗ್ಗೆ ಪಂಚಾಯತಿ ಕಟ್ಟೆಯಲ್ಲಿ ಕಿಚ್ಚ ಸುದೀಪ್ ಯಾವ ರೀತಿ ಅರ್ಥೈಸಲಿದ್ದಾರೆ, ಹೇಗೆ ಕ್ಲಾಸ್ ತೆಗೆದುಕೊಳ್ಳಲಿದ್ದಾರೆ ಎಂದು ಕಾಯುತ್ತಿದ್ದರು. ಇದಕ್ಕೆ ತಕ್ಕಂತೆ ಸುದೀಪ್ ಎಂದಿನಂತೆ ತಮ್ಮ ಶೈಲಿಯಲ್ಲೇ ನೀಡಿದ ಖಡಕ್ ಮಾತುಗಳಿಗೆ ವೀಕ್ಷಕರು ಫಿದಾ ಆಗಿದ್ದಾರೆ.
ಇದನ್ನೂ ಓದಿ: ಇಸ್ರೇಲ್ ಪ್ರಧಾನಿಯನ್ನು ಭೂತ ಎಂದ ಅಸಾದುದ್ದೀನ್ ಓವೈಸಿ! ಪ್ಯಾಲೆಸ್ತೀನ್ ಪರ ನಿಲ್ಲಲು ಪ್ರಧಾನಿ ಮೋದಿಗೆ ಒತ್ತಾಯ
ಪ್ರಾರಂಭದಲ್ಲಿ ಸ್ಪರ್ಧಿಗಳ ನಡುವೆ ಮಾಡಲಾಗಿದ್ದ ಸಮರ್ಥರು ಮತ್ತು ಅಸಮರ್ಥರು ಎಂಬ ಎರಡು ತಂಡಗಳನ್ನು ಅಂತ್ಯಗೊಳಿಸಿದ ಸುದೀಪ್, ಬಳಿಕ ಹಲವು ಕುತೂಹಲಕಾರಿ ವಿಷಯಗಳನ್ನು ಮನೆಯ ಸದಸ್ಯರೊಂದಿಗೆ ಚರ್ಚಿಸಿದರು.
ಈ ಮಧ್ಯೆ ಪ್ರತಾಪ್ ವಿಚಾರವನ್ನು ತೆಗೆದ ಸುದೀಪ್, ಹಾಸ್ಯದ ಮೂಲಕ ಇನ್ನೊಬ್ಬರ ವ್ಯಕ್ತಿತ್ವ ಹತ್ಯೆಗೈಯುವ ಹಕ್ಕು ಯಾರು ಕೊಟ್ಟಿದ್ದು? ತಪ್ಪಲ್ವಾ ಸರ್ ಎಂದು ತುಕಾಲಿ ಸಂತೋಷ್ಗೆ ಪ್ರಶ್ನಿಸಿದರು. ತದನಂತರ ತಪ್ಪು ಮಾಡಿದವರಿಗೆ ಎಲ್ಲಿ ಶಿಕ್ಷೆಯಾಗಬೇಕೋ ಅಲ್ಲಿ ಆಗುತ್ತದೆ. ದೇವರೇ ಕ್ಷಮಿಸುತ್ತಾನೆ ಅಂದಮೇಲೆ ನಾವು, ನೀವು ಯಾರು ಸರ್? ಎಂದು ಖಡಕ್ ಆಗಿ ಹೇಳಿದರು.
ಈ ಮಾತುಗಳನ್ನು ಮೌನದಿಂದಲೇ ಆಲಿಸಿದ ತುಕಾಲಿ ಸಂತೋಷ್ ಬಳಿಕ ಸುದೀಪ್ ಹಾಗೂ ಡ್ರೋನ್ ಪ್ರತಾಪ್ ಬಳಿ ಕ್ಷಮೆ ಕೋರಿದರು. ಸುದೀಪ್ ಅವರ ಕ್ಲಾಸ್ಗೆ ವೀಕ್ಷಕರು ಮತ್ತು ನೆಟ್ಟಿಗರು ಮೆಚ್ಚುಗೆ ವ್ಯಕ್ತಪಡಿಸಿದ್ದು, ತಮ್ಮ ತಮ್ಮ ಅಭಿಪ್ರಾಯಗಳನ್ನು ಸೋಷಿಯಲ್ ಮೀಡಿಯಾದಲ್ಲಿ ಕಮೆಂಟ್ ಮಾಡಿದ್ದಾರೆ.