ನವದೆಹಲಿ: ಭಾರತದಲ್ಲಿ ಇಂಟರ್ನೆಟ್ ಬಳಕೆದಾರರ ಸಂಖ್ಯೆ ಭಾರಿ ಪ್ರಮಾಣದಲ್ಲಿ ಏರಿಕೆಯಾಗಿದೆ. ಜತೆಗೆ, ಡೇಟಾ ಬಳಕೆ ಕೂಡ ಇನ್ನಿಲ್ಲದ ವೇಗದಲ್ಲಿ ಏರಿಕೆಯಾಗುತ್ತಿದೆ. ಹೀಗಿದ್ದರೂ ಟೆಲಿಕಾಂ ಕಂಪನಿಗಳು ನಷ್ಟದಲ್ಲಿವೆಯಂತೆ..! ಹೀಗಾಗಿ ಮತ್ತೊಂದು ಸುತ್ತಿನ ದರ ಹೆಚ್ಚಳಕ್ಕೆ ಸಜ್ಜಾಗಿವೆ.
ಏರ್ಟೆಲ್ ಕಂಪನಿ ಜೂನ್ ತ್ರೈಮಾಸಿಕದಲ್ಲಿ 15,933 ಕೋಟಿ ರೂ. ನಷ್ಟ ದಾಖಲಿಸಿದೆ. ಈ ಪೈಕಿ 11,746 ಕೋಟಿ ರೂ. ಕಾನೂನಾತ್ಮಕವಾಗಿ ಪಾವತಿಸಬೇಕಾದ ಮೊತ್ತ ಎಂದು ತೋರಿಸಿದೆ.
ಈ ಕಾರಣಕ್ಕೆ, ಏರ್ಟೆಲ್ ಕಂಪನಿ ಮತ್ತೊಂದು ಸುತ್ತಿನ ಬೆಲೆಯೇರಿಕೆ ಮಾಡುತ್ತಿದೆ. ಸದ್ಯ ಕಂಪನಿಗೆ ಪ್ರತಿ ಬಳಕೆದಾರನಿಂದ ದೊರೆಯುತ್ತಿರುವ ಸರಾಸರಿ ಆದಾಯವನ್ನು 200 ರೂ., ನಂತರದ ಹಂತದಲ್ಲಿ 300 ರೂ. ಗಳಿಗೆ ಹೆಚ್ಚಿಸಬೇಕಾದ ಅಗತ್ಯವಿದೆ ಎಂದು ಕಂಪನಿಯ ಸಿಇಒ ಗೋಪಾಲ್ ವಿಠ್ಠಲ್ ಹೇಳಿದ್ದಾರೆ. ಹೀಗಾಗಿ ಕರೆ ದರ ಹಾಗೂ ಡೇಟಾ ಶುಲ್ಕ ಹೆಚ್ಚಿಸಲಿದೆ. ಆದರೆ, ಯಾವಾಗ ಎಂಬುದನ್ನು ಬಹಿರಂಗ ಪಡಿಸಿಲ್ಲ.
ಕಳೆದ ಡಿಸೆಂಬರ್ನಲ್ಲಿ ಏರ್ಟೆಲ್ ಶೇ.42ರವರೆಗೆ ದರ ಹೆಚ್ಚಳ ಮಾಡಿತ್ತು. ಸದ್ಯ ಏರ್ಟೆಲ್ನ ಪ್ರತಿ ಗ್ರಾಹಕನ ಸರಾಸರಿ ಆದಾಯ (ಎಆರ್ಪಿಯು) 157 ರೂ. ಆಗಿದೆ. ಕಳೆದ ಜನವರಿಯಲ್ಲಿ ಇದು 154 ರೂ. ಆಗಿತ್ತು.
ಈ ನಡುವೆ ಸರ್ಕಾರಕ್ಕೆ ಪಾವತಿಸಿರುವ ನಿವ್ವಳ ಆದಾಯ ಹೊಂದಾಣಿಕೆಯ ಪಾಲನ್ನು (ಎಜಿಆರ್) ಪೂರ್ಣ ಪ್ರಮಾಣದ ಹಾಗೂ ಅಂತಿಮ ಎಂದು ಪರಿಗಣಿಸಬೇಕು ಎಂದು ಸಿಎಫ್ಒ ಬಾದಲ್ ಬಗ್ರಿ ಅಭಿಪ್ರಾಯವಾಗಿದೆ. ದೂರಸಂಪರ್ಕ ಇಲಾಖೆ ಪ್ರಕಾರ ಏರ್ಟೆಲ್ ಸರ್ಕಾರಕ್ಕೆ ಪಾವತಿಸಬೇಕಿರುವ ಎಜಿಆರ್ ಮೊತ್ತ 43,780 ಕೋಟಿ ರೂ. ಆಗಿದೆ. ಈಗಾಗಲೇ 18,000 ಕೋಟಿ ರೂ.ಗಳನ್ನು ಪಾವತಿಸಿದೆ.
ವಿವಿಧ ಕಂಪನಿಗಳು ಪಾವತಿಸಬೇಕಿರುವ ಎಜಿಆರ್ ಮೊತ್ತಕ್ಕೆ 15 ವರ್ಷಗಳ ಕಾಲಾವಕಾಶ ಒದಗಿಸಬೇಕೆಂಬ ಕೂಗು ಕೂಡ ಕೇಳಿ ಬಂದಿದೆ.