ಚೆನ್ನೈ: ಕರೊನಾ ಸಂಕಷ್ಟದಿಂದಾಗಿ ಕೆಲಸ ಇಲ್ಲದ ಕಾರಣ ವ್ಯಕ್ತಿಯೊಬ್ಬ ನಾಲ್ಕು ತಿಂಗಳಿನಿಂದ ಮನೆ ಬಾಡಿಗೆ ಕಟ್ಟಿರಲಿಲ್ಲ. ಬಾಡಿಗೆ ವಸೂಲಿ ಮಾಡಲು ಮನೆ ಮಾಲೀಕ ಪೊಲೀಸರ ಮೊರೆ ಹೋದ. ಮನೆಗೆ ಇನ್ಸ್ಪೆಕ್ಟರ್ ಹೆಂಡತಿ, ಮಕ್ಕಳ ಎದುರೇ ಆತನನ್ನು ಥಳಿಸಿದ. ಪರಿಣಾಮ ಭಾರಿ ದುರಂತವೇ ನಡೆದು ಹೋಯಿತು.
ಇಲ್ಲಿನ ಫುಳಾಲ್ ಪ್ರದೇಶದಲ್ಲಿ ನೆಲೆಸಿದ್ದ ಶ್ರೀನಿವಾಸ್ ಪೇಂಟಿಂಗ್ ಮಾಡಿಕೊಂಡಿದ್ದ. ಕರೊನಾದಿಂದಾಗಿ ವಿಧಿಸಿದ್ದ ಲಾಕ್ಡೌನ್ ಕಾರಣ ಕೆಲಸ ಕಳೆದುಕೊಂಡಿದ್ದ. ಹೀಗಾಗಿ ನಾಲ್ಕು ತಿಂಗಳಿನಿಂದ ಆತನಿಗೆ ಸಂಪಾದನೆಯೇ ಇರಲಿಲ್ಲ. ಇದರಿಂದಾಗಿ ಮನೆ ಬಾಡಿಗೆಯನ್ನು ನೀಡಿರಲಿಲ್ಲ.
ಇದರಿಂದ ಕೆರಳಿದ ಮನೆ ಮಾಲೀಕ ರಾಜೇಂದ್ರನ್ ಬಾಡಿಗೆ ವಸೂಲಿ ಮಾಡಿಕೊಳ್ಳಲು ಪೊಲೀಸರ ಮೊರೆ ಹೋಗಿದ್ದ. ಮನೆ ಬಳಿಗೆ ಬಂದ ಇನ್ಸ್ಪೆಕ್ಟರ್ ಸ್ಯಾಮ್ ಬೆನ್ಸನ್ ಪೇಂಟರ್ನನ್ನು ಹೆಂಡತಿ ಮಕ್ಕಳ ಎದುರಲ್ಲೇ ಮೈಮೇಲೆ ಬಾಸುಂಡೆ ಬರುವಂತೆ ಥಳಿಸಿದ್ದ.
ತನಗಾದ ಅವಮಾನವನ್ನು ಸಹಿಸಿಕೊಳ್ಳಲಾಗದೇ, ಶ್ರೀನಿವಾಸ್ ಬೆಂಕಿ ಹಚ್ಚಿಕೊಂಡು ಆತ್ಮಹತ್ಯೆಗೆ ಯತ್ನಿಸಿದ್ದಾನೆ. ಶೇ.80 ಸುಟ್ಟಗಾಯಗಳಿಂದ ಬಳಲುತ್ತಿರುವ ಶ್ರೀನಿವಾಸನನ್ನು ಕಿಲಿಪಾಕ್ ಸರ್ಕಾರಿ ಆಸ್ಪತ್ರೆಗೆ ದಾಖಲಿಸಲಾಗಿದೆ.
ಲಾಕಪ್ ಡೆತ್ ಕಾರಣದಿಂದ ತಮಿಳುನಾಡು ಪೊಲೀಸರು ತೀವ್ರ ಟೀಕೆಗೆ ಗುರಿಯಾಗಿರುವ ಬೆನ್ನಲ್ಲೇ, ಮತ್ತೊಬ್ಬ ಪೊಲೀಸ್ ದೌರ್ಜನ್ಯ ಎಸಗಿರುವುದು ಇಲಾಖೆಗೆ ಮತ್ತೊಮ್ಮೆ ಮುಜುಗರ ಉಂಟುಮಾಡಿದೆ. ಸದ್ಯ ಸ್ಯಾಮ್ ಬೆನ್ಸನ್ನನ್ನು ಅಮಾನತುಗೊಳಿಸಲಾಗಿದೆ ಎಂದು ಹಿರಿಯ ಪೊಲೀಸರು ತಿಳಿಸಿದ್ದಾರೆ.