ನವದೆಹಲಿ: ಇತ್ತೀಚೆಗೆ ಆನ್ಲೈನ್ ವಂಚನೆಗಳು ಹೆಚ್ಚಾಗುತ್ತಿವೆ. ಅದರಲ್ಲೂ ಸುಲಭವಾಗಿ ಹಣ ಸಂಪಾದಿಸುವ ಚಟಕ್ಕೆ ಬಿದ್ದ ಕೆಲ ಕಿಡಿಗೇಡಿಗಳು ಆನ್ಲೈನ್ ಮೂಲಕ ಸುಲಿಗೆ, ವಂಚನೆ ಸೇರಿದಂತೆ ಅನೇಕ ಸೈಬರ್ ಅಪರಾಧಗಳನ್ನು ಎಸಗುತ್ತಿದ್ದಾರೆ. ಇದರಲ್ಲಿ ಹೆಚ್ಚಾಗಿ ಲೋನ್ ಆ್ಯಪ್ಗಳ ಹೆಸರಿನಲ್ಲಿ ಸುಲಭವಾಗಿ ಹಾಗೂ ದೊಡ್ಡ ಮೊತ್ತದ ಸಾಲ ನೀಡುವುದಾಗಿ ಹೇಳಿ ಅಮಾಯಕರಿಂದ ಲಕ್ಷ ಲಕ್ಷ ರೂಪಾಯಿ ದೋಚುತ್ತಿದ್ದಾರೆ.
ಸಾಲ ನೀಡುವುದಲ್ಲದೆ, ಹೆಚ್ಚಿನ ಬಡ್ಡಿಗೆ ಒತ್ತಾಯಿಸಿ ಸಾಲ ಪಡೆದುಕೊಂಡವರಿಗೆ ಮಾನಸಿಕ ಹಿಂಸೆಯನ್ನು ನೀಡುತ್ತಿದ್ದಾರೆ. ಆದರೆ, ಈ ಅಸುರಕ್ಷಿತ ಸಾಲದ ಆ್ಯಪ್ ಗಳಿಗೆ ಮೋಸ ಹೋಗಬೇಡಿ ಎಂದು ಕೇಂದ್ರ ಸರ್ಕಾರ ಹಲವು ಬಾರಿ ಎಚ್ಚರಿಕೆ ನೀಡಿರುವುದು ನಿಮಗೆಲ್ಲ ಗೊತ್ತೇ ಇದೆ. ಆದರೂ ಪ್ಲೇಸ್ಟೋರ್ನಲ್ಲಿ ನಕಲಿ ಅಪ್ಲಿಕೇಶನ್ಗಳು ಕಾಣಿಸಿಕೊಳ್ಳುತ್ತಲೇ ಇರುತ್ತದೆ. ಬಳಕೆದಾರರು ಈ ಬಗ್ಗೆ ತುಂಬಾ ಎಚ್ಚರವಹಿಸಿ, ಅಂತಹ ಆ್ಯಪ್ಗಳನ್ನು ತಕ್ಷಣವೇ ತೆಗೆದುಹಾಕಬೇಕು ಎಂದು ಸರ್ಕಾರ ಇತ್ತೀಚೆಗೆ ಸೂಚಿಸಿದೆ.
ಸುಲಭವಾಗಿ ಸಾಲವನ್ನು ಕೊಡುವುದಾಗಿ ಹೇಳಿಕೊಳ್ಳುವ ಅನೇಕ ಅಪ್ಲಿಕೇಶನ್ಗಳು ಇನ್ನೂ ಪ್ಲೇಸ್ಟೋರ್ನಲ್ಲಿ ಲಭ್ಯವಿವೆ. ಇವುಗಳನ್ನು ನಂಬಿ ಜನರು ಮೋಸ ಹೋಗುತ್ತಿದ್ದಾರೆ ಎಂದು ಸರ್ಕಾರ ಹಲವು ಬಾರಿ ಎಚ್ಚರಿಕೆ ನೀಡಿರುವುದು ಗೊತ್ತಾಗಿದೆ. CashExpand-U ಅಂತಹ ಮೋಸದ ಅಪ್ಲಿಕೇಶನ್ಗಳಲ್ಲಿ ಒಂದಾಗಿದೆ. ಆನ್ಲೈನ್ನಲ್ಲಿ ಸಾಲವನ್ನು ಒದಗಿಸುವ ಈ ಅಪ್ಲಿಕೇಶನ್ ನಕಲಿ ಎಂದು ಸರ್ಕಾರ ಇತ್ತೀಚೆಗೆ ಸೂಚಿಸಿದೆ ಮತ್ತು ಬಳಕೆದಾರರು ಇದನ್ನು ತಕ್ಷಣ ಡಿಲೀಟ್ ಮಾಡಬೇಕೆಂದು ಸೂಚನೆ ನೀಡಿದೆ.
ಕ್ಯಾಶ್ ಎಕ್ಸ್ಪಾಂಡ್-ಯು ಎಂಬ ಆನ್ಲೈನ್ ಸಾಲದ ಅಪ್ಲಿಕೇಶನ್ ನಕಲಿ ಮಾತ್ರವಲ್ಲ, ಅನುಮಾನಾಸ್ಪದ ಚಟುವಟಿಕೆಗಳು ನಡೆಯುತ್ತಿವೆ ಮತ್ತು ವಂಚನೆಗಳಿಂದ ತುಂಬಿದೆ ಎಂದು ಕೇಂದ್ರ ಸರ್ಕಾರ ಎಚ್ಚರಿಸಿದೆ. ಈ ಅಪ್ಲಿಕೇಶನ್ನ ಮೂಲವು ಬೇರೆ ದೇಶದ್ದಾಗಿರುವ ಕಾರಣ, ಇದರಿಂದ ಪ್ರಮುಖ ಮಾಹಿತಿ ದುರುಪಯೋಗವಾಗುವ ಸಾಧ್ಯತೆ ಇದೆ ಎಂದು ಸರ್ಕಾರ ಎಚ್ಚರಿಸಿದ್ದು, ಕೂಡಲೇ ಡಿಲೀಟ್ ಮಾಡಲು ಸೂಚನೆ ನೀಡಿದೆ. (ಏಜೆನ್ಸೀಸ್)