ಬೆಂಗಳೂರು: ಬಿಗ್ ಬಾಸ್ ಸೀಸನ್ 10 ಇದೀಗ 11ನೇ ವಾರಕ್ಕೆ ಕಾಲಿಟ್ಟಿದ್ದು, ಸೂಪರ್ ಸಂಡೆ ವಿತ್ ಸುದೀಪ ಸಂಚಿಕೆಯಲ್ಲಿ ಬಿಗ್ ಮನೆಯಲ್ಲಿ ಎರಡು ಬಾರಿ ಕ್ಯಾಪ್ಟನ್ ಆಗಿದ್ದ ಸ್ನೇಹಿತ್ ಎಲಿಮಿನೇಟ್ ಆಗಿ ಹೊರಬಂದಿದ್ದಾರೆ. ವೈಲ್ಡ್ ಕಾರ್ಡ್ ಎಂಟ್ರಿಯಲ್ಲಿ ಬಂದ ಅವಿನಾಶ್ ಜತೆಗೆ ಅಂತಿಮ ಹಣಾಹಣಿಯಲ್ಲಿ ಸೇವ್ ಆಗಲು ಪೈಪೋಟಿ ನಡೆಸಿದ ಸ್ನೇಹಿತ್, ಕಡೆಯಲ್ಲಿ ಉಳಿದುಕೊಳ್ಳಲು ವಿಫಲಗೊಂಡು, ಮನೆಯಿಂದ ಹೊರ ನಡೆದಿದ್ದಾರೆ.
ಬಿಗ್ ಬಾಸ್ ಮನೆಯ 9ನೇ ವಾರದಲ್ಲಿ ಎಲಿಮಿನೇಟ್ ಆದ ಸ್ನೇಹಿತ್, ಮೊದಲ ವಾರವೇ ಕ್ಯಾಪ್ಟನ್ ಆಗಿ ಇತರೆ ಸ್ಪರ್ಧಿಗಳೊಡನೆ ಮಿಂಚಿದರು. ತದನಂತರದಲ್ಲಿ ಹಲವಾರು ಟಾಸ್ಕ್ಗಳನ್ನು ಉತ್ತಮವಾಗಿ ಮಾಡಿದ ಸ್ನೇಹಿತ್, ಒಂದಷ್ಟು ಜಗಳ, ವೈಮನಸ್ಸಿನ ಮಧ್ಯೆ ಸತತ 9 ವಾರಗಳ ಕಾಲ ಯಶಸ್ವಿಯಾಗಿ ಸಾಗಿದರು. ತಮ್ಮ ಸ್ನೇಹ ಬಳಗದಲ್ಲಿರುವ ವಿನಯ್, ಮೈಕಲ್, ನಮ್ರತಾ ಅವರೊಂದಿಗೆ ಹೆಚ್ಚು ಸಮಯ ಕಳೆದು, ಇಂದು ಹೊರಬಂದಿದ್ದಾರೆ.
ಎರಡು ವಾರ ಕ್ಯಾಪ್ಟನ್ ಪಟ್ಟ ಪಡೆದ ಸ್ನೇಹಿತ್, ಮನೆಯಲ್ಲಿ ಹೆಚ್ಚಿನ ಅವಧಿ ನಮ್ರತಾ ಅವರೊಟ್ಟಿಗೆ ಕಳೆದಿದ್ದು, ನನಗೆ ಒಬ್ಬ ಒಳ್ಳೆ ಸ್ನೇಹಿತೆ ಸಿಕ್ಕಿದ್ದಾರೆ ಎಂದು ಈ ಹಿಂದೆ ಅನೇಕ ಬಾರಿ ಹೇಳಿದ್ದಾರೆ. ನಮ್ರತಾ ಜತೆಗೆ ಉತ್ತಮ ಒಡನಾಟ ಇಟ್ಟುಕೊಂಡಿದ್ದ ಸ್ನೇಹಿತ್, ನನಗೆ ನಮ್ರತಾ ಅಂದ್ರೆ ತುಂಬ ಇಷ್ಟ ಎಂದು ಹೇಳುತ್ತಿದ್ದರು. ಮನೆಯಿಂದ ಹೊರಬರುವ ಮುನ್ನ ಬಿಗ್ಬಾಸ್ ಮುಂದಿನ ವಾರ ನೀವು ಸೂಚಿಸುವ ಒಬ್ಬ ವ್ಯಕ್ತಿಗೆ ವಿಶೇಷ ಅಧಿಕಾರ ಸಿಗಲಿದೆ ಎಂದು ಹೇಳಿದ ಕೂಡಲೇ ಹೆಚ್ಚು ಸಮಯ ತೆಗೆದುಕೊಳ್ಳದ ಸ್ನೇಹಿತ್, ನಮ್ರತಾ ಎಂದು ಹೆಸರಿಸಿದರು.
ನಮ್ರತಾ ಹೆಸರು ಹೇಳಲು ಸೂಕ್ತ ಕಾರಣಗಳನ್ನು ನೀಡಿ ಎಂದಾಗ, 'ಸೂಕ್ತ ಏನಿಲ್ಲ ಬಿಗ್ಬಾಸ್, ನನಗೆ ಅವರು ತುಂಬ ಇಷ್ಟ' ಎಂದು ಹೇಳಿದರು. ಸದ್ಯ 11ನೇ ವಾರಕ್ಕೆ ಎಂಟ್ರಿ ಕೊಟ್ಟಿರುವ ಉಳಿದ ಇತರೆ ಸ್ಪರ್ಧಿಗಳು ಯಾವ ರೀತಿ ಆಡಲಿದ್ದಾರೆ? ಯಾವ ಬಗೆಯ ಟಾಸ್ಕ್ ಎದುರಿಸಲಿದ್ದಾರೆ? ಎಂಬುದನ್ನು ಕಾದು ನೋಡಬೇಕು.