ಬೆಂಗಳೂರು: ಬಿಗ್ ಬಾಸ್ ಕನ್ನಡ ಸೀಸನ್ 10ರ ವಿನ್ನರ್ ಪಟ್ಟ ಯಾರಿಗೆ ಎಂಬ ಒಂದೇ ಒಂದು ಪ್ರಶ್ನೆ ಸದ್ಯ ವೀಕ್ಷಕರನ್ನು ಬೆಂಬಿಡದೆ ಕಾಡುತ್ತಿದ್ದು, ಯಾರಾಗಲಿದ್ದಾರೆ ಈ ಸೀಸನ್ನ ಅಧಿಪತಿ ಎಂಬುದನ್ನು ಭಾನುವಾರದ ಸಂಚಿಕೆಯ ಅಂತಿಮ ಕ್ಷಣದವರೆಗೂ ಕಾದು ನೋಡಬೇಕಿದೆ. ಈ ಮಧ್ಯೆ ನಿನ್ನೆ ನಡೆದ ಗ್ರ್ಯಾಂಡ್ ಫಿನಾಲೆಯ ಮೊದಲ ದಿನದಂದು ಫೈನಲಿಸ್ಟ್ ಸ್ಥಾನದಲ್ಲಿ ಕುಳಿತ್ತಿದ್ದ ಟಾಪ್ ಆರು ಸ್ಪರ್ಧಿಗಳ ಪೈಕಿ ತುಕಾಲಿ ಸಂತೋಷ್ ಎಲಿಮಿನೇಟ್ ಆಗಿ ಹೊರಬಂದಿದ್ದಾರೆ. ಇದೀಗ ಫಿನಾಲೆ ಹಣಾಹಣಿಯಲ್ಲಿ ಕಾರ್ತಿಕ್, ಸಂಗೀತಾ, ವಿನಯ್, ವರ್ತೂರು ಸಂತೋಷ್ ಮತ್ತು ಪ್ರತಾಪ್ ಇದ್ದಾರೆ.
ಅದ್ದೂರಿ ಗ್ರ್ಯಾಂಡ್ ಫಿನಾಲೆಗೆ ಸಜ್ಜಾದ ಸ್ಪರ್ಧಿಗಳು, ಡ್ಯಾನ್ಸ್ ಪ್ರಾಕ್ಟಿಸ್ ಮಾಡಿ ವೀಕ್ಷಕರಿಗೆ ವಿಶೇಷ ಪ್ರದರ್ಶನ ನೀಡಿದರು. ಈ ವೇಳೆ ಎದೆಯೊಳಗೆ ಗಿಟಾರು ಹಾಡಿಗೆ ಕೈಯಲ್ಲಿ ಗಿಟಾರು ಹಿಡಿದು ಉತ್ಸಾಹ ಭರಿತವಾಗಿ ಡ್ಯಾನ್ಸ್ ಮಾಡಿದ ಪ್ರತಾಪ್ಗೆ ಶಿಳ್ಳೆ-ಚಪ್ಪಾಳೆಗಳು ಹೆಚ್ಚಾಗಿ ಕೇಳಿಬಂತು. ಸದ್ಯ ಫಿನಾಲೆ ಹಂತ ತಲುಪಿರುವ ಡ್ರೋನ್, 100 ದಿನಗಳ ಹಿಂದೆ ಇದ್ದ ರೀತಿಗೂ ಇಂದು ಇರುವ ರೀತಿಗೂ ಸಾಕಷ್ಟು ವ್ಯತ್ಯಾಸಗಳಿವೆ. ಅಸಲಿಗೆ ಪ್ರತಾಪ್ನಲ್ಲಿ ಆದ ಬದಲಾವಣೆಗಳಿವು.
ಮನೆಯೊಳಗೆ ಬರುವ ಮುನ್ನ ಬಿಗ್ ಬಾಸ್ಗೆ ಹೋಗುವುದೇ ಬೇಡ ಎಂದು ನಿರ್ಧರಿಸಿದ್ದ ಪ್ರತಾಪ್ ದೃಢವಾಗಿ ನಿರ್ಧರಿಸಿ ಎಂಟ್ರಿ ಕೊಡುತ್ತಾರೆ. ಯಾರೊಂದಿಗೂ ಹೆಚ್ಚು ಮಾತನಾಡದೆ ಮೌನದಿಂದಲೇ ಉತ್ತರಿಸಲು ಪ್ರಯತ್ನಿಸುತ್ತಿದ್ದ ಪ್ರತಾಪ್, ಇದೀಗ ಎಲ್ಲರೊಡನೆ ಬೆರೆತು, ಆತ್ಮೀಯವಾಗಿ ಮಾತನಾಡುವ ಮನಸ್ಥಿತಿ ಹೊಂದಿದ್ದಾರೆ. ಯಾರಾದರೂ ದೂಷಿಸಿದರೆ, ದೂರಿದರೆ ಬೇಸರವಾದರೂ ಕೂಡ ಗಟ್ಟಿಯಾಗಿ ನಿಂತು ಸ್ಪಷ್ಟನೆ ಕೊಡುವುದನ್ನು ಇಂದು ಮತ್ತಷ್ಟು ಬಲವಾಗಿಸಿಕೊಂಡಿದ್ದಾರೆ.
ಇದನ್ನೂ ಓದಿ: ದರ್ಶನ್ ಬಾಳಲ್ಲಿ ಮತ್ತೆ ಸುಂಟರಗಾಳಿ; ಪತ್ನಿ vs ಪವಿತ್ರಾ ಸಂಘರ್ಷದ ಬಗ್ಗೆ ಪರೋಕ್ಷವಾಗಿ ಮಾತನಾಡಿದ ಡಿ ಬಾಸ್
ಹೆಚ್ಚು ಭಾವುಕರಾಗಿರುತ್ತಿದ್ದ ಪ್ರತಾಪ್ ಇಂದು ಧೃತಿಗೆಡದೆ ಮತ್ತೊಬ್ಬರಿಗೆ ಸಾಂತ್ವನ ಹೇಳಿ, ಆತ್ಮಬಲ ಹೆಚ್ಚಿಸಿಕೊಳ್ಳುವುದನ್ನು ಕಲಿತುಕೊಂಡಿದ್ದಾರೆ. ಬಿಗ್ ಬಾಸ್ಗೆ ಹೋದ ಪ್ರತಾಪ್ ಅವರಲ್ಲಿ ಇಂದು ಹಲವು ಬದಲಾವಣೆಗಳು ಕಂಡುಬಂದಿದ್ದು, ಇದು ವೀಕ್ಷಕರನ್ನು ಮೆಚ್ಚುವಂತೆ ಮಾಡಿದೆ.
ಸಾಮಾಜಿಕ ಜಾಲತಾಣಗಳಲ್ಲಿ ಡ್ರೋನ್ ಪ್ರತಾಪ್ಗೆ ವ್ಯಾಪಕ ಬೆಂಬಲ ವ್ಯಕ್ತಪಡಿಸುತ್ತಿರುವ ನೆಟ್ಟಿಗರು, ಪ್ರತಾಪ್ ಗೆದ್ದು ಬರಲಿ ಎಂದು ಆಶಿಸಿದ್ದಾರೆ. ಯಾರು ಗೆಲುವಿನ ಕಿರೀಟವನ್ನು ತಮ್ಮ ಮುಡಿಗೇರಿಸಿಕೊಳ್ಳಲಿದ್ದಾರೆ ಎಂಬುದನ್ನು ಸದ್ಯ ನಿರೀಕ್ಷಿಸಬೇಕಿದೆ.