ನವದೆಹಲಿ: ನಗರಗಳು, ಪಟ್ಟಣಗಳು ಅಥವಾ ಯಾವುದೇ ಪ್ರದೇಶವಾಗಿರಲಿ ಒಂದು ಸ್ಥಳದಿಂದ ಮತ್ತೊಂದು ಸ್ಥಳಕ್ಕೆ ತಲುಪಲು ಬಹು ಬೇಗನೆ ಲಭ್ಯವಾಗುವ ವಾಹನವೆಂದರೆ ಅದು ಆಟೋ. ಆಟೋಗಳನ್ನು ಬಳಸುವುದು ಸಾಮಾನ್ಯವಾಗಿದೆ. ನೀವು ಗಮನಿಸಿರಬಹುದು ಆಟೋದಲ್ಲಿ ಚಾಲಕರು ( Auto Driver ) ತಮ್ಮ ವೈಯಕ್ತಿಕ ಅಭಿರುಚಿಗೆ ತಕ್ಕಂತೆ ಕೆಲವು ಸಾಲುಗಳನ್ನು ಬರೆಸಿರುತ್ತಾರೆ. ಅಲ್ಲದೆ, ಪೇಂಟಿಂಗ್ ಹಾಗೂ ಫೋಟೋಗಳನ್ನು ಸಹ ಆಟೋದಲ್ಲಿ ಇಟ್ಟುಕೊಳ್ಳುತ್ತಾರೆ. ಅದರಲ್ಲೂ ಆಟೋ ಹಿಂದೆ ಬರೆದ ಸಾಲುಗಳು ಆಗಾಗ ವೈರಲ್ ಆಗುತ್ತಲೇ ಇರುತ್ತವೆ. ಅದೇ ರೀತಿ ಇತ್ತೀಚೆಗೆ ಆಟೋವೊಂದರ ಬರವಣಿಗೆ ಸಾಮಾಜಿಕ ಜಾಲತಾಣದಲ್ಲಿ ವೈರಲ್ ಆಗಿದೆ.
ಆಟೋ ಚಾಲಕನೊಬ್ಬ ತನ್ನ ಆಟೋ ಹತ್ತುವ ಪ್ರಯಾಣಿಕರಿಗೆ ಕೆಲವು ಕಟ್ಟುನಿಟ್ಟಿನ ನಿಯಮಗಳನ್ನು ಸಿದ್ದಪಡಿಸಿ ಅದಕ್ಕೆ ಸಂಬಂಧಿಸಿದ ನೋಟಿಸ್ ಅನ್ನು ಆಟೋದಲ್ಲಿ ಅಂಟಿಸಿದ್ದಾನೆ. ಆ ಆಟೋ ಹತ್ತಿದ ಪ್ರಯಾಣಿಕರೊಬ್ಬರು ಅದರ ಫೋಟೋ ತೆಗೆದು ಸಾಮಾಜಿಕ ಜಾಲತಾಣಗಳಲ್ಲಿ ಶೇರ್ ಮಾಡಿದ್ದು, ಇದೀಗ ಭಾರಿ ವೈರಲ್ ಆಗಿದೆ. ಅಷ್ಟಕ್ಕೂ ಆ ಫೋಟೋದಲ್ಲಿ ಇರುವುದಾದೂ ಏನು ಎಂಬುದನ್ನು ನಾವೀಗ ತಿಳಿಯೋಣ.
ಆಟೋ ಚಾಲಕನು ತನ್ನ ಆಟೋವನ್ನು ಹತ್ತಿದ ಪ್ರತಿಯೊಬ್ಬ ಗ್ರಾಹಕನಿಗೆ ಕೆಲವು ನಿಯಮಗಳನ್ನು ಪಾಲಿಸುವಂತೆ ಆಗ್ರಹಿಸಿದ್ದಾನೆ. ಅವರು ಒಟ್ಟು ಏಳು ಅಂಶಗಳನ್ನು ಉಲ್ಲೇಖಿಸಿದ್ದು, ಅವು ಈ ಕೆಳಕಂಡಂತಿವೆ.
* ನೀವು ಕ್ಯಾಬ್ ಮಾಲೀಕರಲ್ಲ.
* ಕ್ಯಾಬ್ ಓಡಿಸುವ ವ್ಯಕ್ತಿಯೇ ಮಾಲೀಕ.
* ಸೌಜನ್ಯದಿಂದ ಮಾತನಾಡಿ, ಗೌರವವನ್ನು ಪಡೆಯಿರಿ.
* ನಿಧಾನವಾಗಿ ಬಾಗಿಲು ಮುಚ್ಚಿ.
* ನಿಮ್ಮ ಆಟಿಟ್ಯೂಡ್ ಅನ್ನು ನಿಮ್ಮ ಜೇಬಿನಲ್ಲಿ ಇರಿಸಿ, ದಯವಿಟ್ಟು ನಮಗೆ ತೋರಿಸಬೇಡಿ. ನೀವೇನು ನಮಗೆ ಹೆಚ್ಚು ಪಾವತಿಸುತ್ತಿಲ್ಲ.
* ನಮ್ಮನ್ನು ಅಣ್ಣ ಎಂದು ಕರೆಯಬೇಡಿ.
* ಗಮನಿಸಿ: ವೇಗವಾಗಿ ಓಡಿಸಲು ಕೇಳಬೇಡಿ.
ಹೀಗೆ ತಮ್ಮದೇ ಶೈಲಿಯಲ್ಲಿ ನಿಯಮಗಳನ್ನು ಸಿದ್ಧಪಡಿಸಿ ತಮ್ಮ ಸೀಟಿನ ಹಿಂಬದಿಯಲ್ಲಿ ಅಂಟಿಸಿದ್ದಾರು. ವಿಶೇಷವಾಗಿ ಇದರಲ್ಲಿ "ನಿಮ್ಮ ಆಟಿಟ್ಯೂಡ್ ಅನ್ನು ನಿಮ್ಮ ಜೇಬಿನಲ್ಲಿ ಇರಿಸಿ, ದಯವಿಟ್ಟು ಅದನ್ನು ನಮಗೆ ತೋರಿಸಬೇಡಿ, ನೀವೇನು ನಮಗೆ ಹೆಚ್ಚು ಹಣವನ್ನು ನೀಡುತ್ತಿಲ್ಲ" ಎಂಬ ಸಾಲು ನೆಟ್ಟಿಗರ ಗಮನ ಸೆಳೆದಿದ್ದು, ಪರ-ವಿರೋಧ ಚರ್ಚೆಗೆ ಗ್ರಾಸವಾಗಿದೆ. ಚಾಲಕನ ನಿಯಮಗಳನ್ನು ನೋಡಿ ನಿಮಗೆ ಏನು ಅನಿಸಿತು ಎಂಬುದನ್ನು ಕಾಮೆಂಟ್ ಮೂಲಕ ನಮಗೆ ತಿಳಿಸಿ. (ಏಜೆನ್ಸೀಸ್)