ಲಖನೌ: ಸ್ಥಳೀಯನೋರ್ವನನ್ನು ಹತ್ಯೆ ಗೈದ ಆರೋಪಿಯನ್ನು ಪೊಲೀಸರ ಎದುರೇ ಗ್ರಾಮಸ್ಥರೆಲ್ಲ ಸೇರಿ ಹೊಡೆದು ಕೊಂದ ಘಟನೆ ಉತ್ತರ ಪ್ರದೇಶದ ಕುಶಿನಗರದಲ್ಲಿ ನಡೆದಿದೆ.
ಕುಶಿನಗರದ ನಿವಾಸಿಯೋರ್ವ ತನ್ನ ಮನೆಯಲ್ಲಿ ಮಲಗಿದ್ದಾಗ ಸ್ಕೂಟರ್ನಲ್ಲಿ ಬಂದ ಈ ವ್ಯಕ್ತಿ, ಶೂಟ್ ಮಾಡಿ ಆತನನ್ನು ಹತ್ಯೆಗೈದಿದ್ದ. ಅಷ್ಟರಲ್ಲಿ ಸ್ಥಳೀಯರು ಎಚ್ಚರಗೊಂಡಿದ್ದರು. ತನ್ನ ಮೇಲೆ ಹಲ್ಲೆಯಾಗುವುದನ್ನು ತಪ್ಪಿಸಿಕೊಳ್ಳಲು ಕೊಲೆ ಆರೋಪಿ ಟೆರೇಸ್ ಮೇಲೆ ಹತ್ತಿದ. ಅಷ್ಟೇ ಅಲ್ಲ, ತನ್ನ ಕೈಯಲ್ಲಿದ್ದ ಗನ್ನಿಂದ ಗಾಳಿಯಲ್ಲಿ ಗುಂಡು ಹಾರಿಸಿ, ಹೆದರಿಸಲು ಯತ್ನಿಸಿದ. ಇದನ್ನೂ ಓದಿ: ಬಿಜೆಪಿ ಪ್ರಚಾರಕ್ಕೆ ಸಂಸದ ಗೈರು ; ಮತದಾರರ ಪ್ರಶ್ನೆಗೆ ಮುಖಂಡರು ತಬ್ಬಿಬ್ಬು
ಯಾರೋ ಒಬ್ಬರು ಪೊಲೀಸರಿಗೆ ವಿಷಯವನ್ನೇನೋ ತಿಳಿಸಿದರು. ಆದರೆ ಅವರು ಬರುವಷ್ಟರಲ್ಲೇ ಉದ್ರಿಕ್ತ ಗುಂಪು ಆತನ ಮೇಲೆ ಹಲ್ಲೆ ಮಾಡಲು ಶುರು ಮಾಡಿತ್ತು. ಕೋಲು, ಕಬ್ಬಿಣದ ರಾಡ್ಗಳಿಂದ ಹೊಡೆದ ಪರಿಣಾಮ ಆತ ಎಚ್ಚರ ತಪ್ಪಿ ಬಿದ್ದ. ಪೊಲೀಸರು ಬಂದರೂ ಅವನನ್ನು ಕಾಪಾಡಲು ಸಾಧ್ಯವಾಗಲಿಲ್ಲ. ಪೊಲೀಸರ ಕಣ್ಣೆದುರೇ ಆತ ಮೃತಪಟ್ಟ.
ಈ ವ್ಯಕ್ತಿ ಗೋರಖ್ಪುರದಿಂದ ಕುಶಿನಗರಕ್ಕೆ ಆಗಮಿಸಿದ್ದ ಎಂದು ಪೊಲೀಸರು ತಿಳಿಸಿದ್ದಾರೆ. ಆತನ ಮೇಲೆ ಹಲ್ಲೆ ನಡೆಸುತ್ತಿರುವ ವಿಡಿಯೋ ಸಿಕ್ಕಾಪಟೆ ವೈರಲ್ ಆಗಿದೆ. ಪೊಲೀಸರು ಸುಮ್ಮನೆ ಅಲ್ಲಿ ನಿಂತಿರುವುದು ವಿಡಿಯೋದಲ್ಲಿ ಕಾಣಿಸುತ್ತದೆ.(ಏಜೆನ್ಸೀಸ್)