Giraffe Body Structure: ನಾವು ಸಾಮಾನ್ಯವಾಗಿ ಕಾಡಿನಲ್ಲಿ ಅಥವಾ ಮೃಗಾಲಯದಲ್ಲಿ ಜಿರಾಫೆಗಳನ್ನು ನೋಡಿದಾಗ ಆಕರ್ಷಿತರಾಗುತ್ತೇವೆ. ಜಗತ್ತಿನ ಅತ್ಯಂತ ಎತ್ತರದ ಸಸ್ತನಿ ಎಂಬ ಹೆಗ್ಗಳಿಕೆ ಪಡೆದಿರುವ ಜಿರಾಫೆ, ತನ್ನ ಉದ್ದನೆಯ ಕುತ್ತಿಗೆಯಷ್ಟೇ ಅಲ್ಲದೆ ಹಲವಾರು ಅಚ್ಚರಿಯ ಶಾರೀರಿಕ ಗುಣಲಕ್ಷಣಗಳಿಗೂ ಹೆಸರುವಾಸಿಯಾಗಿದೆ. ಜಿರಾಫೆಯ ದೇಹ ರಚನೆ ಹಾಗೂ ಜೀವಶೈಲಿಯ ಬಗ್ಗೆ ರೋಚಕ ಸಂಗತಿಗಳು ಇಲ್ಲಿವೆ.
11 ಕೆಜಿ ತೂಕದ ದೊಡ್ಡ ಹೃದಯ: ಜಿರಾಫೆಯ ಹೃದಯವು ಸುಮಾರು 11 ಕೆಜಿ ತೂಗುತ್ತದೆ. ಇದರ ಉದ್ದನೆಯ ಕುತ್ತಿಗೆಯ ಮೂಲಕ ಮೆದುಳಿಗೆ ರಕ್ತವನ್ನು ತಳ್ಳಲು ಮಾನವರಿಗಿಂತ ಎರಡು ಪಟ್ಟು ಹೆಚ್ಚು ರಕ್ತದೊತ್ತಡವನ್ನು ಇದು ಸೃಷ್ಟಿಸುತ್ತದೆ.
ವಿಶೇಷ ರಕ್ತನಾಳಗಳ ಜಾಲ: ಜಿರಾಫೆ ನೀರು ಕುಡಿಯಲು ತಲೆ ತಗ್ಗಿಸಿದಾಗ ಮೆದುಳಿಗೆ ಅತಿಯಾದ ರಕ್ತ ನುಗ್ಗಿ ಹಾನಿಯಾಗದಂತೆ ತಡೆಯಲು ಅದರ ಕುತ್ತಿಗೆಯಲ್ಲಿ 'ರೇಟೆ ಮಿರಾಬಿಲೆ' ಎಂಬ ವಿಶೇಷ ರಕ್ತನಾಳಗಳ ಜಾಲವಿರುತ್ತದೆ. ಇದು ರಕ್ತದ ಹರಿವನ್ನು ನಿಯಂತ್ರಿಸುತ್ತದೆ.
20 ಇಂಚು ಉದ್ದದ ನಾಲಿಗೆ: ಇವುಗಳ ನಾಲಿಗೆ ಸುಮಾರು 20 ಇಂಚುಗಳಷ್ಟು ಉದ್ದವಿರುತ್ತದೆ. ಇದು ಗಾಢ ನೀಲಿ ಅಥವಾ ಕಪ್ಪು ಬಣ್ಣದ್ದಾಗಿದ್ದು, ಸೂರ್ಯನ ಶಾಖದಿಂದ ರಕ್ಷಿಸಿಕೊಳ್ಳಲು ಸಹಾಯ ಮಾಡುತ್ತದೆ. ಈ ನಾಲಿಗೆಯ ನೆರವಿನಿಂದ ಮುಳ್ಳಿನ ಗಿಡಗಳ ಮಧ್ಯೆ ಇರುವ ಎಲೆಗಳನ್ನು ಇವು ಸುಲಭವಾಗಿ ತಿನ್ನುತ್ತವೆ.
ಕುತ್ತಿಗೆಯಲ್ಲಿ ಕೇವಲ 7 ಮೂಳೆಗಳು: ಜಿರಾಫೆಯ ಕುತ್ತಿಗೆ ತುಂಬಾ ಉದ್ದವಿದ್ದರೂ, ಮಾನವರಂತೆಯೇ ಅದರಲ್ಲೂ ಕೇವಲ 7 ಕುತ್ತಿಗೆಯ ಮೂಳೆಗಳು ಇರುತ್ತವೆ. ಆದರೆ ಪ್ರತಿಯೊಂದು ಮೂಳೆಯೂ ಗಾತ್ರದಲ್ಲಿ ತುಂಬಾ ದೊಡ್ಡದಾಗಿರುತ್ತದೆ.
ಕೇವಲ 2 ಗಂಟೆ ನಿದ್ರೆ: ಜಿರಾಫೆಗಳು ಇಡೀ ದಿನದಲ್ಲಿ ಕೇವಲ 10 ನಿಮಿಷದಿಂದ 2 ಗಂಟೆಗಳವರೆಗೆ ಮಾತ್ರ ನಿದ್ರಿಸುತ್ತವೆ. ಹೆಚ್ಚಾಗಿ ಇವು ನಿಂತುಕೊಂಡೇ ತೂಕಡಿಸುತ್ತದೆ.
ನಿಂತುಕೊಂಡೇ ಹೆರಿಗೆ: ಹೆಣ್ಣು ಜಿರಾಫೆಗಳು ನಿಂತುಕೊಂಡೇ ಮರಿಗೆ ಜನ್ಮ ನೀಡುತ್ತವೆ. ಇದರಿಂದಾಗಿ ಮರಿ ಹುಟ್ಟುವಾಗ ಸುಮಾರು 5 ಅಡಿ ಎತ್ತರದಿಂದ ಕೆಳಗೆ ಬೀಳುತ್ತದೆ. ಆದರೂ ಅದಕ್ಕೆ ಯಾವುದೇ ಗಾಯವಾಗುವುದಿಲ್ಲ, ಬದಲಿಗೆ ಹುಟ್ಟಿದ ಕೆಲವೇ ಗಂಟೆಗಳಲ್ಲಿ ಮರಿ ಓಡಾಡಲು ಪ್ರಾರಂಭಿಸುತ್ತದೆ.
ವಿಶಿಷ್ಟ ಚುಕ್ಕೆಗಳ ಗುರುತು: ಪ್ರತಿಯೊಂದು ಜಿರಾಫೆಯ ಮೈಮೇಲಿನ ಚುಕ್ಕೆಗಳ ವಿನ್ಯಾಸವು ಮಾನವರ ಬೆರಳಚ್ಚಿನಂತೆ ವಿಭಿನ್ನವಾಗಿರುತ್ತದೆ. ಜಗತ್ತಿನ ಯಾವುದೇ ಎರಡು ಜಿರಾಫೆಗಳ ವಿನ್ಯಾಸವೂ ಒಂದೇ ತರ ಇರುವುದಿಲ್ಲ.
ಒಟ್ಟಿನಲ್ಲಿ ಜಗತ್ತಿನ ಅತ್ಯಂತ ಎತ್ತರದ ಸಸ್ತನಿಯಾದ ಜಿರಾಫೆಯ ದೇಹ ರಚನೆ ಹಾಗೂ ಜೀವನಶೈಲಿ ನಿಜಕ್ಕೂ ಆಶ್ಚರ್ಯಕರ. ಪ್ರಕೃತಿಯ ಮಡಿಲಲ್ಲಿ ಮನುಷ್ಯನ ಊಹೆಗೂ ಸಿಗದಂತಹ ಅಪರೂಪದ ಸಂಗತಿಗಳು ಹಾಗೂ ಜೀವಸಂಕುಲದ ವೈವಿಧ್ಯತೆಗಳು ಅಡಗಿವೆ ಎಂಬುದಕ್ಕೆ ಜಿರಾಫೆಯೇ ಸಾಕ್ಷಿ.