ವಾಷಿಂಗ್ಟನ್ ಡಿಸಿ: ಖಾಸಗಿಯಾಗಿ ನಿರ್ಮಿಸಲಾದ ಅಮೆರಿಕದ ಬಾಹ್ಯಾಕಾಶ ನೌಕೆ(SpaceCraft) ಚಂದ್ರನ ಮೇಲೆ ಯಶಸ್ವಿಯಾಗಿ ಭಾನುವಾರ(ಮಾರ್ಚ್ 2) ಇಳಿದಿದೆ. ಫೈರ್ಫ್ಲೈ ಏರೋಸ್ಪೇಸ್ನ ಚಂದ್ರಯಾನ ಉಪಗ್ರಹ ಬ್ಲೂ ಘೋಸ್ಟ್ ಚಂದ್ರನ ಮೇರ್ ಕ್ರಿಸಿಯಮ್ ಪ್ರದೇಶದಲ್ಲಿ ಲ್ಯಾಂಡಿಂಗ್ ಆಗಿದೆ. ಈ ಕಾರ್ಯಾಚರಣೆಯು ಚಂದ್ರನ ಈ ಕಾಣದ ಭಾಗದಲ್ಲಿ ಇಳಿಯುವ ಮೂರು ಪ್ರಮುಖ ಬಾಹ್ಯಾಕಾಶ ಯಾತ್ರೆಗಳ ಆರಂಭವಾಗಿದೆ. ಬ್ಲೂ ಘೋಸ್ಟ್ ಮಿಷನ್ ಅನ್ನು ಜನವರಿ 15, 2025ರಂದು ಸ್ಪೇಸ್ಎಕ್ಸ್ನ ಫಾಲ್ಕನ್ 9 ರಾಕೆಟ್ ಮೂಲಕ ಬಾಹ್ಯಾಕಾಶಕ್ಕೆ ಉಡಾವಣೆ ಮಾಡಲಾಯಿತು.
ಈ ಬಾಹ್ಯಾಕಾಶ ಯಾತ್ರೆಯು ಸುಮಾರು ಒಂದು ತಿಂಗಳ ಕಾಲ ಭೂಮಿಯ ಸುತ್ತ ಸುತ್ತಿತು. ಇದಾದ ನಂತರ ಅದು ಚಂದ್ರನ ಕಡೆಗೆ ಹೊರಟಿತು. ಬ್ಲೂ ಘೋಸ್ಟ್ ಎಂದು ಕರೆಯಲ್ಪಡುವ ರೋಬೋಟಿಕ್ ಲ್ಯಾಂಡರ್ ಸುಮಾರು 16 ದಿನಗಳ ಕಾಲ ಚಂದ್ರನ ಕಕ್ಷೆಯಲ್ಲಿದ್ದ ನಂತರ ಮಾರ್ಚ್ 2 ರಂದು ಚಂದ್ರನ ಮೇಲ್ಮೈಯಲ್ಲಿ ಯಶಸ್ವಿಯಾಗಿ ಇಳಿಯಿತು. ಬ್ಲೂ ಘೋಸ್ಟ್ ಚಂದ್ರನ ಮೇಲೆ ಯಶಸ್ವಿಯಾಗಿ ಇಳಿದಿದೆ ಎಂದು ಫೈರ್ಫ್ಲೈ ಏರೋಸ್ಪೇಸ್ ಕಂಪನಿ ಹೇಳಿಕೆ ನೀಡಿದೆ.
ಟೆಕ್ಸಾಸ್ ಮೂಲದ ಫೈರ್ಫ್ಲೈ ಏರೋಸ್ಪೇಸ್ ಕಂಪನಿಯು ಈ ಬಾಹ್ಯಾಕಾಶ ನೌಕೆಯನ್ನು ಅಭಿವೃದ್ಧಿಪಡಿಸಿದೆ. ಇದರೊಂದಿಗೆ ಫೈರ್ಫ್ಲೈ ಏರೋಸ್ಪೇಸ್ ಚಂದ್ರನ ಮೇಲೆ ಬಾಹ್ಯಾಕಾಶ ನೌಕೆ ಇಳಿಸಿದ ಮೊದಲ ಖಾಸಗಿ ಕಂಪನಿಯಾಗಿದೆ. ಇದು ಚಂದ್ರನ ಮೇಲಿನ ಅನ್ವೇಷಣೆಯತ್ತ ಒಂದು ದೊಡ್ಡ ಹೆಜ್ಜೆಯಾಗಲಿದೆ. ಫೈರ್ಫ್ಲೈ ಏರೋಸ್ಪೇಸ್ ಈ ಕಾರ್ಯಾಚರಣೆಯನ್ನು ನಾಸಾದ ಸಹಾಯದಿಂದ ನಡೆಸಿದೆ. ಬ್ಲೂ ಘೋಸ್ಟ್ನ ಗುರಿ ಚಂದ್ರನ ಹತ್ತಿರದ ಬದಿಯಲ್ಲಿ (ಯಾವಾಗಲೂ ಭೂಮಿಗೆ ಎದುರಾಗಿರುವ ಬದಿಯಲ್ಲಿ) 350 ಮೈಲಿ ಅಗಲದ ಜಲಾನಯನ ಪ್ರದೇಶದಲ್ಲಿ ಇಳಿಯುವುದು. ನಾಸಾ ಪ್ರಕಾರ ಈ ಪ್ರದೇಶವು ಪ್ರಾಚೀನ ಕ್ಷುದ್ರಗ್ರಹದ ಡಿಕ್ಕಿಯ ಸ್ಥಳವೆಂದು ಭಾವಿಸಲಾಗಿದೆ.
ವರದಿಯ ಪ್ರಕಾರ, ಬಾಹ್ಯಾಕಾಶ ನೌಕೆಯು 10 ನಾಸಾ ವಿಜ್ಞಾನ ಉಪಕರಣಗಳನ್ನು ಹೊಂದಿದ್ದು, ಅವುಗಳಲ್ಲಿ ಒಂದು ಚಂದ್ರನ ಒಳಭಾಗವನ್ನು 700 ಮೈಲುಗಳಷ್ಟು ಆಳದವರೆಗೆ ತನಿಖೆ ಮಾಡುತ್ತದೆ. ಕ್ಯಾಮೆರಾಗಳು ಭೂಮಿಯ ಕಡೆಗೆ ನೋಡುತ್ತಿರುವ ಎಕ್ಸ್-ರೇ ಚಿತ್ರಗಳನ್ನು ಸೆರೆಹಿಡಿಯುತ್ತವೆ. ಬಾಹ್ಯಾಕಾಶ ಹವಾಮಾನವು ಭೂಮಿಯ ಕಾಂತಕ್ಷೇತ್ರದೊಂದಿಗೆ ಹೇಗೆ ಸಂವಹನ ನಡೆಸುತ್ತದೆ ಎಂಬುದನ್ನು ಅಧ್ಯಯನ ಮಾಡುತ್ತದೆ. ಆದರೆ ಪ್ರತ್ಯೇಕ ಕ್ಯಾಮೆರಾ ಭವಿಷ್ಯದ ಚಂದ್ರನ ಕಾರ್ಯಾಚರಣೆಗಳಿಗೆ ಸಹಾಯ ಮಾಡಲು ಚಂದ್ರನ ಮೇಲ್ಮೈಗೆ ಇಳಿಯುವಾಗ ಲ್ಯಾಂಡರ್ನ ವಿವರವಾದ ಚಿತ್ರಗಳನ್ನು ತೆಗೆದುಕೊಳ್ಳುತ್ತದೆ.
ಲ್ಯಾಂಡರ್ನಲ್ಲಿರುವ ಉಪಕರಣಗಳು ಚಂದ್ರನ ಮಣ್ಣಿನ ಮಾದರಿಗಳನ್ನು ಸಹ ವಿಶ್ಲೇಷಿಸುತ್ತವೆ. ಇವು ವಿವಿಧ ವಸ್ತುಗಳಿಗೆ ಚಂದ್ರನ ಧೂಳು ಎಷ್ಟು ಅಂಟಿಕೊಂಡಿದೆ ಎಂಬುದನ್ನು ಅಳೆಯುತ್ತವೆ. ಭೂಮಿ ಮತ್ತು ಚಂದ್ರನ ನಡುವಿನ ನಿಖರವಾದ ಅಂತರವನ್ನು ಅಳೆಯಲು ಲೇಸರ್ಗಳನ್ನು ಬಳಸುತ್ತವೆ. ಬ್ಲೂ ಘೋಸ್ಟ್ ಚಂದ್ರನ ಮೇಲ್ಮೈಯಲ್ಲಿ ದತ್ತಾಂಶ ಸಂಗ್ರಹಿಸಲು ಸುಮಾರು ಎರಡು ವಾರಗಳ ಕಾಲ ಕಳೆಯುತ್ತದೆ ಎಂದು ನಂಬಲಾಗಿದೆ.(ಏಜೆನ್ಸೀಸ್)