ನ್ಯೂಯಾರ್ಕ್ : ಇಡೀ ದೇಶವನ್ನು ಕೆಲವು ವಾರಗಳ ಮಟ್ಟಿಗೆ ಮುಚ್ಚಿಬಿಟ್ಟರೆ ಭಾರತದಲ್ಲಿ ಆರಂಭವಾಗಿರುವ ಕರೊನಾ ಸೋಂಕು ಹರಡುವಿಕೆಯ ವಿಷಮ ಚಕ್ರಕ್ಕೆ ಕೊನೆ ಹಾಡಬಹುದು. ಯಾವ ದೇಶಕ್ಕೂ ಈ ತೆರನ ಲಾಕ್ಡೌನ್ ಮಾಡುವುದು ಇಷ್ಟವಾಗೋಲ್ಲ. ಆದರೆ ಲಾಕ್ಡೌನ್ ಮಾಡುವುದರಿಂದ ಹದಗೆಟ್ಟಿರುವ ಪರಿಸ್ಥಿತಿಯನ್ನು ಸುಧಾರಿಸಲು ಕಾಲಾವಕಾಶ ಲಭ್ಯವಾಗುವುದು ಎಂದು ಅಮೆರಿಕದ ಬಿಡೆನ್ ಆಡಳಿತದ ಮುಖ್ಯ ವೈದ್ಯಕೀಯ ಸಲಹೆಗಾರ ಡಾ. ಆ್ಯಂಥೋನಿ ಎಸ್. ಫಾಸಿ ಹೇಳಿದ್ದಾರೆ.
ಕರೊನಾ ಬಗೆಗೆ ಅಂತರರಾಷ್ಟ್ರೀಯ ಮಟ್ಟದಲ್ಲಿ ಬಹಳ ನಂಬಿಕಸ್ಥ ವಕ್ತಾರರಾದ ಫಾಸಿ ಅವರು ಇಂಡಿಯನ್ ಎಕ್ಸ್ಪ್ರೆಸ್ಗೆ ನೀಡಿರುವ ಸಂದರ್ಶನದಲ್ಲಿ ಈ ಸಲಹೆ ಕೊಟ್ಟಿದ್ದಾರೆ. ಸಮಸ್ಯೆಯನ್ನು ಹಂತಹಂತವಾಗಿ ಬಗೆಹರಿಸಲು ಯಾವುದು ತಕ್ಷಣ ಆಗಬೇಕು, ಯಾವುದಕ್ಕೆ ಸ್ವಲ್ಪ ಕಾಲಾವಕಾಶ ಇದೆ ಎಂದು ವಿಂಗಡಿಸಿಕೊಂಡು ಆದ್ಯತೆಯ ಮೇಲೆ ಕ್ರಮ ಕೈಗೊಳ್ಳಬೇಕು ಎಂದಿದ್ದಾರೆ.
ಸಂಕಟದ ಈ ಸಮಯದಲ್ಲಿ ರೋಗಿಗಳಿಗೆ ಆಕ್ಸಿಜನ್, ಔಷಧಿಗಳು, ಪಿಪಿಇಗಳು ಮತ್ತು ಇತರ ವೈದ್ಯಕೀಯ ಅಗತ್ಯಗಳನ್ನು ಒದಗಿಸುವ ಕೆಲಸ ಮೊದಲಾಗಬೇಕು. ಸೇನೆ ಮತ್ತಿತರ ಸಂಘಟನೆಗಳ ಸಹಾಯದಿಂದ ರೋಗಿಗಳಿಗೆ ಶುಶ್ರೂಷೆ ಒದಗಿಸಬೇಕು. ವಿಶ್ವ ಆರೋಗ್ಯ ಸಂಸ್ಥೆ ಮತ್ತು ಇತರ ರಾಷ್ಟ್ರಗಳ ಸಹಾಯ ಪಡೆದು ಈ ಸಮಸ್ಯೆಯನ್ನು ತುರ್ತಾಗಿ ನಿವಾರಿಸಬೇಕು. ಎರಡನೆಯದಾಗಿ, ಸಮರೋಪಾದಿಯಲ್ಲಿ ಹೆಚ್ಚು ಆಸ್ಪತ್ರೆಗಳ ನಿರ್ಮಾಣದ ಬಗ್ಗೆ ಗಮನ ನೀಡಬೇಕು. ತದನಂತರ ದೀರ್ಘಕಾಲೀನ ಪರಿಹಾರವಾಗಿ ಲಸಿಕೆಗಳು ಹೆಚ್ಚು ಜನರನ್ನು ತಲುಪುವಂತೆ ಎಲ್ಲಾ ಕ್ರಮಗಳನ್ನು ತೆಗೆದುಕೊಳ್ಳಬೇಕು ಎಂದು ಡಾ. ಫಾಸಿ ಸಲಹೆ ನೀಡಿದ್ದಾರೆ. (ಏಜೆನ್ಸೀಸ್)