ಅಹಮದಾಬಾದ್: ದೇಶದಲ್ಲಿಯೇ ಅತಿ ಹೆಚ್ಚು ಸೋಂಕಿತ ಪ್ರಕರಣಗಳು ವರದಿಯಾಗುತ್ತಿರುವುದು ಮಹಾರಾಷ್ಟ್ರದಿಂದ. ಆದರೆ, ಸಾವಿನ ಪ್ರಮಾಣ ಹೆಚ್ಚಾಗಿರುವುದು ಮಾತ್ರ ಅಹಮದಾಬಾದ್ನಲ್ಲಿ. ಇದು ಸ್ಥಳೀಯಾಡಳಿಕ್ಕೆ ತೀವ್ರ ಕಳವಳ ಉಂಟುಮಾಡಿದೆ.
ಆರಂಭದಲ್ಲಿ ಗುಜರಾತ್ನಲ್ಲಿ ಕೋವಿಡ್ ಪೀಡಿತರ ಸಂಖ್ಯೆ ಕಡಿಮೆಯಿತ್ತು. ಆದರೆ ಇತ್ತೀಚಿನ ದಿನಗಳಲ್ಲಿ ಅಲ್ಲಿ ಸೋಂಕಿತರ ಸಂಖ್ಯೆ ರಾಕೆಟ್ ವೇಗದಲ್ಲಿ ಏರುತ್ತಿದೆ. ದೇಶದಲ್ಲಿ ಒಟ್ಟು ಸೋಂಕಿತರು 29,435 ಆಗಿದ್ದು, ಇವರಲ್ಲಿ ಮೃತಪಟ್ಟವರ ಸಂಖ್ಯೆ 934. ಸಾವಿನ ಶೇಕಡಾವರು ಪ್ರಮಾಣ ಗಮನಿಸಿದಲ್ಲಿ ಶೇ.3.1 ಆಗುತ್ತದೆ. ಅದೇ ಅಹಮದಾಬಾದ್ನಲ್ಲಿ 2,167 ಜನರು ಸೋಂಕಿಗೆ ಒಳಗಾಗಿದ್ದು, ಇಲ್ಲಿ ಮೃತಪಟ್ಟವರ ಸಂಖ್ಯೆ 102. ರಾಷ್ಟ್ರೀಯ ಸರಾಸರಿಗೆ ಹೋಲಿಸಿದಲ್ಲಿ ಇದರ ಪ್ರಮಾಣ ಶೇ.4.71 ಆಗಿದೆ. ಆತಂಕದ ವಿಚಾರವೆಂದರೆ ಮುಂಬೈಗಿಂತಲೂ ಇಲ್ಲಿ ಸಾವಿನ ಸರಾಸರಿ ಹೆಚ್ಚಾಗಿದೆ.
ಮುಂಬೈನ 5,407 ಪ್ರಕರಣಗಳಲ್ಲಿ 204 ಜನರು ಮೃತಪಟ್ಟಿದ್ದಾರೆ. ಇದು ಶೇ.3.77 ಆಗಿದೆ. ಅದೇ ದೆಹಲಿಯಲ್ಲಿ ಮೃತಪಟ್ಟವರು 102 ಜನ. ಇದು ಶೇ.1.85 ಆಗಿದೆ. ಗುಜರಾತ್ನಲ್ಲಿ ಮೃತಪಟ್ಟವರಲ್ಲಿ ಅಹಮದಾಬಾದ್ನವರ ಪ್ರಮಾಣವೇ ಶೇ.67.5 ಆಗಿದೆ. ಗುಜರಾತ್ನಲ್ಲಿ 3,548 ಸೋಂಕಿತರಿದ್ದು, ಇವರಲ್ಲಿ 162 ಜನರು ಮೃತಪಟ್ಟಿದ್ದಾರೆ.
ಮಹಾರಾಷ್ಟ್ರದಲ್ಲಿ ಸಾವಿನ ಪ್ರಮಾಣ ಶೇ.4.24, ರಾಜಸ್ಥಾನ- ಶೇ.2.05, ಉತ್ತರಪ್ರದೇಶ-ಶೇ.1.51, ತಮಿಳುನಾಡಿನಲ್ಲಿ ಶೇ.1.24 ಆಗಿದೆ. ಅಲ್ಲದೇ. ಈ ಎಲ್ಲ ರಾಜ್ಯಗಳಲ್ಲೂ ಸೋಂಕಿತರ ಪ್ರಮಾಣ 1,500ಕ್ಕಿಂತಲೂ ಹೆಚ್ಚಾಗಿದೆ.
ಇಷ್ಟಕ್ಕೂ ಮೃತರಲ್ಲಿ ಹಿರಿಯರೇ ಹೆಚ್ಚಾಗಿರುವುದರಿಂದ ಅವರನ್ನು ಅತ್ಯಂತ ಕಾಳಜಿಯಿಂದ ನೋಡಿಕೊಳ್ಳಬೇಕೆಂದು ಅಹಮದಾಬಾದ್ ಪಾಲಿಕೆ ನಾಗರಿಕರಲ್ಲಿ ಮನವಿ ಮಾಡಿದೆ. ಕಿರಿಯರಲ್ಲಿ ಚೇತರಿಕೆ ಪ್ರಮಾಣ ಹೆಚ್ಚಾಗಿದೆ. ಆದರೆ, ಹಿರಿಯರಿಗೆ ಕಷ್ಟಸಾಧ್ಯವಾಗುತ್ತಿದೆ. ಹೀಗಾಗಿ ಅವರು ಸೋಂಕಿಗೆ ಒಳಗಾದಂತೆ ನೋಡಿಕೊಳ್ಳುವುದು ಎಲ್ಲರ ಜವಾಬ್ದಾರಿಯಾಗಿದೆ ಎಂಬ ಅರಿವನ್ನು ಎಲ್ಲರಲ್ಲೂ ಮೂಡಿಸುತ್ತಿದೆ.