ಲಖನೌ: ಫೈನಾನ್ಸ್ ಕಂಪನಿ ಏಜೆಂಟ್ ಓರ್ವ 34 ಪ್ರಯಾಣಿಕರಿದ್ದ ಬಸ್ ಅನ್ನೇ ಹೈಜಾಕ್ ಮಾಡಿರುವ ಘಟನೆ ಉತ್ತರ ಪ್ರದೇಶದ ಆಗ್ರಾದಲ್ಲಿ ಬುಧವಾರ ನಡೆದಿದೆ. ತೆಗೆದುಕೊಂಡಿದ್ದ ಸಾಲವನ್ನು ಮರುಪಾವತಿಸದೇ ಮಾಲೀಕ ಮೃತಪಟ್ಟ ಬೆನ್ನಲ್ಲೇ ಈ ಘಟನೆ ನಡೆದಿದೆ.
ಮಲ್ಪುರಾ ಪೊಲೀಸ್ ಠಾಣಾ ವ್ಯಾಪ್ತಿಯಲ್ಲಿ ಬುಧವಾರ ಬೆಳಗ್ಗೆ ಬಸ್ ಹೈಜಾಕ್ ಮಾಡಲಾಗಿದೆ. ಬಸ್ ಹರಿಯಾಣದ ಗುರಂಗಾವ್ನಿಂದ ಮಧ್ಯ ಪ್ರದೇಶದ ಗ್ವಾಲಿಯರ್ಗೆ ತೆರಳುತ್ತಿತ್ತು ಎಂದು ಪೊಲೀಸರು ತಿಳಿಸಿದ್ದಾರೆ.
ಮೂಲಗಳ ಪ್ರಕಾರ ಖಾಸಗಿ ಬಸ್ ಆಗ್ರಾದ ನ್ಯೂ ಸದರನ್ ಬೈಪಾಸ್ ಬಳಿಯ ರಾಯಗಢ್ ಟೋಲ್ ದಾಟುತ್ತಿದ್ದಂತೆ ಆರೋಪಿ ಏಜೆಂಟ್ ಬಸ್ ತಡೆದಿದ್ದಾನೆ. ಬಳಿಕ ಬಸ್ನ ಕಂಟ್ರೋಲ್ ಅನ್ನು ತನ್ನ ವಶಕ್ಕೆ ಪಡೆದುಕೊಂಡಿದ್ದಾನೆ. ಈ ವೇಳೆ ಬಸ್ಸಿನಲ್ಲಿದ್ದ ಮೂವರು ಪ್ರಯಾಣಿಕರು ಹಿರಿಯ ಪೊಲೀಸ್ ವರಿಷ್ಠಾಧಿಕಾರಿ ಬಬ್ಲೂ ಕುಮಾರ್ ಅವರಿಗೆ ಕರೆ ಮಾಡಿ ಫೈನಾನ್ಸ್ ಕಂಪನಿಯ ಏಜೆಂಟ್ಗಳನ್ನು ಬಸ್ಸನ್ನು ಹೈಜಾಕ್ ಮಾಡಿದ್ದಾರೆ ಎಂದು ಮಾಹಿತಿ ನೀಡಿದ್ದಾರೆ.
ಈ ಬಗ್ಗೆ ಮಾಹಿತಿ ನೀಡಿರುವ ಬಬ್ಲೂ ಕುಮಾರ್, ಗ್ವಾಲಿಯರ್ ಮೂಲದ ಮೂವರು ಪ್ರಯಾಣಿಕರು ಇಂದು ದೂರು ನೀಡಿದ್ದಾರೆ. ಅವರು ಗುರಂಗಾವ್ದಿಂದ ಪಟನಾಗೆ ಪ್ರಯಾಣಿಸುತ್ತಿದ್ದ ಬಸ್ಸನ್ನು ಓವರ್ಟೇಕ್ ಮಾಡಿ ಫೈನಾನ್ಸ್ ಕಂಪನಿ ಏಜೆಂಟ್ಗಳು ಹೈಜಾಕ್ ಮಾಡಿದ್ದಾರೆಂದು ದೂರಿನಲ್ಲಿ ಉಲ್ಲೇಖಿಸಿದ್ದಾರೆ. ಈ ಸಂಬಂಧ ಪ್ರಕರಣವನ್ನು ದಾಖಲಾಸಿದ್ದೇವೆ. ತನಿಖೆ ನಡೆಸುತ್ತೇವೆಂದು ಟ್ವೀಟ್ ಮಾಡಿದ್ದಾರೆ.
ಸದ್ಯ ಎಲ್ಲ ಪ್ರಯಾಣಿಕರು ಸುರಕ್ಷಿತವಾಗಿದ್ದು, ಬಸ್ ಝಾನ್ಸಿ ತಲುಪಿದೆ ಎಂದು ಪೊಲೀಸರು ತಿಳಿಸಿದ್ದಾರೆ. ಇನ್ನು ಫೈನಾನ್ಸ್ ಕಂಪನಿ ಅಕ್ರಮವಾಗಿ ಬಸ್ ಅನ್ನು ವಶಪಡಿಸಿಕೊಂಡಿದ್ದಾರೆ. ಚಾಲಕ ಮತ್ತು ಪ್ರಯಾಣಿಕರು ಕ್ಷೇಮವಾಗಿದ್ದಾರೆ. ನಿನ್ನೆಯಷ್ಟೇ ಬಸ್ ಮಾಲೀಕ ಮೃತಪಟ್ಟರು. ಇದರ ಬೆನ್ನಲ್ಲೇ ಏಜೆಂಟ್ಗಳು ಈ ರೀತಿಯಾಗಿ ವರ್ತಿಸಿದ್ದಾರೆಂದು ಉತ್ತರ ಪ್ರದೇಶದ ಹೆಚ್ಚುವರಿ ಮುಖ್ಯ ಕಾರ್ಯದರ್ಶಿ ಅವನಿಶ್ ಅವಸ್ಥಿ ಹೇಳಿದ್ದಾರೆ. (ಏಜೆನ್ಸೀಸ್)