ಬೆಂಗಳೂರು: ನಟ ನಾಗಭೂಷಣ್ ಮತ್ತು ನೆನಪಿರಲಿ ಪ್ರೇಮ್ ಪುತ್ರಿ ಅಮೃತಾ ಪ್ರೇಮ್ ನಾಯಕ-ನಾಯಕಿಯಾಗಿ ಅಭಿನಯಿಸಿರುವ 'ಟಗರು ಪಲ್ಯ' ಚಿತ್ರದ ಟ್ರೇಲರ್ ರಿಲೀಸ್ ಇವೆಂಟ್ ಇಂದು ಅಧಿಕೃತವಾಗಿ ನಡೆಯಿತು. ಈ ವೇಳೆ ಕಾರ್ಯಕ್ರಮಕ್ಕೆ ಆಗಮಿಸಿದ್ದ ಸ್ಯಾಂಡಲ್ವುಡ್ನ ಹಿರಿಯ ನಟಿ ತಾರ ಅನುರಾಧ ಅವರು ನಟ ಚಾಲೆಂಜಿಂಗ್ ಸ್ಟಾರ್ ದರ್ಶನ್ ಬಗ್ಗೆ ಒಂದು ಕುತೂಹಲಕಾರಿ ವಿಚಾರವನ್ನು ಹಂಚಿಕೊಂಡರು.
ಡಾಲಿ ಫಿಕ್ಚರ್ಸ್ ಬ್ಯಾನರ್ನಡಿ ಡಾಲಿ ಧನಂಜಯ್ ನಿರ್ಮಿಸಿದ ಈ ಚಿತ್ರಕ್ಕೆ ಅತಿಥಿಯಾಗಿ ದರ್ಶನ್ ಆಗಮಿಸಿದ್ದರು. ವೇದಿಕೆ ಮೇಲೆ ಮಾತನಾಡುತ್ತಿದ್ದ ತಾರಾ, "ನನಗೆ ದರ್ಶನ್ ಬಂದಿದ್ದು ಬಹಳ ಖುಷಿ ತಂದಿದೆ. ನೀನು ಇಲ್ಲಿಗೆ ಬಂದು ಸಿನಿಮಾದ ಟ್ರೇಲರ್ ರಿಲೀಸ್ ಮಾಡಿದ್ದಕ್ಕೆ ನನ್ನ ಕಡೆಯಿಂದ ಹಾಗೂ ಚಿತ್ರತಂಡದಿಂದ ಧನ್ಯವಾದ ತಿಳಿಸುತ್ತೀನಿ. ಒಳ್ಳೆಯ ಮನಸ್ಸುಗಳು ಒಟ್ಟುಗೂಡಿದಾಗ ಗೆಲುವು ಕಟ್ಟಿಟ್ಟಬುತ್ತಿ" ಎಂದು ಹೇಳಿದರು.
ಇನ್ನೂ ದರ್ಶನ್ ಅವರನ್ನು ಮೊದಲಿಗೆ ಅಪ್ಪು ಎಂದು ಕರೆದ ತಾರಾ, "ಕ್ಷಮಿಸಿ ಅಪ್ಪು ಅಂತ ದರ್ಶನ್ ಮನೆಯಲ್ಲಿ ಅವರ ತಾಯಿ ಮತ್ತು ಸಹೋದರಿ ಪ್ರೀತಿಯಿಂದ ಕರೆಯುತ್ತಾರೆ. ಹಾಗಾಗಿ ನಾನೂ ಕೂಡ ದರ್ಶನ್ನ ಹಾಗೆಯೇ ಕರೆಯೋದು, ನನಗೂ ಹಾಗೇ ಕರೆದು ಅಭ್ಯಾಸ" ಎಂದು ಹೇಳಿದರು.