ಮುಂಬೈ: ದ್ವೇಷ ಬಿತ್ತುವ ಫೊಸ್ಟ್ಗಳನ್ನು ಪದೇ ಪದೇ ಟ್ವಿಟ್ಟರ್ನಲ್ಲಿ ಪ್ರಕಟಿಸುತ್ತಿದ್ದಾರೆ ಎಂದು ಆರೋಪಿಸಿ ಬಾಲಿವುಡ್ ನಟಿ ಕಂಗನಾ ರಣಾವತ್ ಅವರ ಟ್ವಿಟ್ಟರ್ ಖಾತೆಯನ್ನು ಟ್ವಿಟ್ಟರ್ ಸಂಸ್ಥೆ ಮಂಗಳವಾರ ಶಾಶ್ವತವಾಗಿ ಸ್ಥಗಿತಗೊಳಿಸಿದೆ. ಇದರ ಬೆನ್ನಲ್ಲೇ ಕಂಗನಾ ಟ್ವಿಟ್ಟರ್ ಸಂಸ್ಥೆಗೆ ತಿರುಗೇಟು ನೀಡಿದ್ದಾರೆ.
'ಟ್ವಿಟ್ಟರ್ ಅಮೆರಿಕ ಮೂಲದ್ದು. ಅಲ್ಲಿನ ಬಿಳಿಯರು, ಕಂದು ಬಣ್ಣದವರನ್ನು ಗುಲಾಮಗಿರಿಗೆ ಅರ್ಹರೆಂದುಕೊಂಡಿದ್ದಾರೆ. ನಾನು ಏನು ಮಾಡಬೇಕು, ಏನು ಮಾತನಾಡಬೇಕು ಎಂಬುದನ್ನು ಅವರು ನನಗೆ ಹೇಳಬೇಕಂತೆ, ಟ್ವಿಟ್ಟರ್ನಿಂದ ತನ್ನನ್ನು ಬ್ಯಾನ್ ಮಾಡಿರಬಹುದು. ಆದರೆ, ಅದೃಷ್ಟವಶಾತ್ ನನಗೆ ನನ್ನ ವಿಚಾರಧಾರೆಗಳನ್ನು ವ್ಯಕ್ತಪಡಿಸುವುದಕ್ಕೆ ಸಿನಿಮಾ ಸೇರಿದಂತೆ ಹಲವಾರು ವೇದಿಕೆಗಳಿವೆ. ನಾನಂತೂ ನನ್ನ ದೇಶದ ಜನರ ದ್ವನಿಯಾಗಿ ಇರುತ್ತೇನೆ. ಯಾರು ನನ್ನನ್ನು ತಡೆಯಲು ಸಾಧ್ಯವಿಲ್ಲ' ಎಂದು ಗುಡುಗಿದ್ದಾರೆ.
ಕಂಗನಾ ಅವರು ತಮ್ಮ ಇನ್ಸ್ಟಾಗ್ರಾಮ್ ಖಾತೆಯಲ್ಲಿ ಟ್ವಿಟ್ಟರ್ ವಿರುದ್ಧ ತಮ್ಮ ಈ ಅಸಮಾಧಾನವನ್ನು ಬರೆದುಕೊಂಡಿದ್ದಾರೆ.
ಪಶ್ಚಿಮ ಬಂಗಾಳ ಚುನಾವಣೆ ಫಲಿತಾಂಶದ ನಂತರ ಅಲ್ಲಿ ಬಿಜೆಪಿ ಕಾರ್ಯಕರ್ತರ ಕೊಲೆ ಆಗುತ್ತಿದೆ. ಬೆಂಕಿ ಹಚ್ಚಲಾಗುತ್ತಿದೆ. ಇದನ್ನೆಲ್ಲಾ ಟಿಎಂಸಿ ಹಾಗೂ ಮಮತಾ ಮಾಡಿಸುತ್ತಿದ್ದಾರೆ ಎಂದು ಕಂಗನಾ ಟ್ವಿಟ್ಟರ್ನಲ್ಲಿ ಸರಣಿ ಪೋಸ್ಟ್ಗಳನ್ನು ಹಾಕಿದ್ದರು. ಅಲ್ಲದೇ ಈ ಹಿಂದೆ ಕೂಡ ಅವರು ಹಲವಾರು ಬಾರಿ ಟ್ವಿಟ್ಟರ್ನ ನಿಯಮಗಳನ್ನು ಉಲ್ಲಂಘನೆ ಮಾಡಿ ದ್ವೇಷ ಬಿತ್ತುವ ಪೋಸ್ಟ್ಗಳನ್ನು ಹಾಕಿದ್ದರು. ಅಲ್ಲದೇ ಈ ಹಿಂದೆ ಇದೇ ವಿಷಯವಾಗಿ ಕಂಗಾನಾಗೆ ಟ್ವಿಟ್ಟರ್ ಎಚ್ಚರಿಕೆಯನ್ನೂ ನೀಡಿತ್ತು.
ಈ ಬಗ್ಗೆ ಪ್ರತಿಕ್ರಿಯೆ ನೀಡಿರುವ ಟ್ವಿಟ್ಟರ್ ವಕ್ತಾರರು, ಕಂಗನಾ ಅವರು ನಮ್ಮ ಟ್ವಿಟ್ಟರ್ನ ನಿಯಮಗಳನ್ನು ಮೀರಿದ್ದು ಕಂಡು ಬಂದಿದ್ದರಿಂದ ಅವರ ಖಾತೆಯನ್ನು ಶಾಶ್ವತವಾಗಿ ಬ್ಯಾನ್ ಮಾಡಿದ್ದೇವೆ. ನಮ್ಮ ಎಲ್ಲ ಟ್ವಿಟ್ಟರ್ ಬಳಕೆದಾರರಿಗೆ ಎಲ್ಲ ನಿಯಮಗಳೂ ಒಂದೇ ಎಂದು ಹೇಳಿದ್ದಾರೆ.
ಇನ್ನು ಕಂಗನಾ ಅವರ ಟ್ವಿಟ್ಟರ್ ಖಾತೆ ಶಾಶ್ವತವಾಗಿ ಅಮಾನತಾಗಿರುವುದಕ್ಕೆ ಅವರು ಇಡೀ ದಿನ ಟ್ವಿಟ್ಟರ್ನಲ್ಲಿ ಟ್ರೆಂಡಿಂಗ್ ಆಗಿದ್ಧಾರೆ. ಟ್ವಿಟ್ಟರ್ನಲ್ಲಿ ಕಂಗನಾ 30 ಲಕ್ಷ ಫಾಲೋವರ್ಗಳನ್ನು ಹೊಂದಿದ್ದರು.