ಚಾಮರಾಜನಗರ: ಗಣ್ಯರು ಜಿಲ್ಲೆಗೆ ಭೇಟಿ ಕೊಟ್ಟ ಸವಿ ನೆನಪಿಗಾಗಿ ಸಸಿ ನೆಡುವುದು ಸಾಮಾನ್ಯ. ಆದರೆ ಅ.7ರಂದು ರಾಷ್ಟ್ರಪತಿ ರಾಮನಾಥ್ ಕೋವಿಂದ್ ಭೇಟಿ ಹಿನ್ನೆಲೆ ಜಿಲ್ಲೆಗೆ ಮುಖ್ಯಮಂತ್ರಿ ಬಸವರಾಜ ಬೊಮ್ಮಾಯಿ ಆಗಮಿಸುತ್ತಿರೋ ಕಾರಣಕ್ಕೆ ನಗರದ ರಸ್ತೆ ಬದಿಯಲ್ಲಿ ಸೊಂಪಾಗಿ ಬೆಳೆದಿದ್ದ ಗಿಡ-ಮರಗಳನ್ನು ಕೆಇಬಿ ಸಿಬ್ಬಂದಿ ನೆಲಕ್ಕುರುಳಿಸಿದೆ.
ಚಾಮರಾಜನಗರ- ನಂಜನಗೂಡು ರಸ್ತೆ ಬದಿಯಲ್ಲಿ ಬೆಳೆದಿರುವ ಸುಮಾರು 7ಕ್ಕೂ ಹೆಚ್ಚು ಗಿಡ-ಮರಗಳ ರೆಂಬೆ ಕೊಂಬೆ ಕಡಿಯಲಾಗಿದೆ. ವಿದ್ಯುತ್ ತಂತಿ ಹಾದು ಹೋಗಿರುವ ಕಡೆ ರೆಂಬೆ ಕತ್ತರಿಸಲಾಗಿದೆ ಎಂದು ಸಿಬ್ಬಂದಿ ಸ್ಥಳೀಯರಿಗೆ ತಿಳಿಸಿದ್ದಾರೆ. ಆದರೆ, ವಿದ್ಯುತ್ ತಂತಿ ಇಲ್ಲದ ಕಡೆ ಮತ್ತು ಒಂದು ಮರದ ಬುಡಕ್ಕೆ ಕೊಡಲಿ ಇಟ್ಟಿರುವುದು ಕೆಇಬಿ ದುರಾಡಳಿತಕ್ಕೆ ಸಾಕ್ಷಿಯಾಗಿದೆ.
ನಗರದ ನಿವಾಸಿ, ಪರಿಸರ ಪ್ರೇಮಿ ವೆಂಕಟೇಶ್ ತನ್ನ ಸ್ವಂತ ಹಣ ಖರ್ಚು ಮಾಡಿ ಹೊಂಗೆ ಗಿಡಗಳನ್ನು ನೆಟ್ಟು ಕಳೆದ 5 ವರ್ಷಗಳಿಂದ ಬೆಳೆಸುತ್ತಿದ್ದಾರೆ. ನೆರಳು ನೀಡುತ್ತಿದ್ದ ಮರಗಳನ್ನು ಕಡಿದು ಹಾಕಿರೋದಕ್ಕೆ ಸ್ಥಳೀಯರು ಆಕ್ರೋಶ ವ್ಯಕ್ತಪಡಿಸಿ ನೆಲಕ್ಕುರುಳಿದ್ದ ರೆಂಬೆ ಕೊಂಬೆಗಳನ್ನು ರಸ್ತೆಗೆ ಹಾಕಿದ್ದಾರೆ.