ಮಡಿಕೇರಿ: ಮಾಜಿ ವಿಧಾನಸಭಾಧ್ಯಕ್ಷರೂ ಆದ ವಿರಾಜಪೇಟೆ ಶಾಸಕ ಕೆ.ಜಿ.ಬೋಪಯ್ಯ ಅವರಿಗೆ ಕರೆ ಮಾಡಿದ ಅಪರಿಚಿತರು 1 ಕೋಟಿ ಹಣಕ್ಕೆ ಬೇಡಿಕೆಯಿಟ್ಟ ಘಟನೆ ತಡವಾಗಿ ಬೆಳಕಿಗೆ ಬಂದಿದೆ.
ಬುಧವಾರ ಸಂಜೆ 6.20ಕ್ಕೆ ಶಾಸಕರ ಮೋಬೈಲ್ಗೆ ಕರೆ ಮಾಡಿದ ಅಪರಿಚಿತ ಏಕಾಏಕಿ 'ನಾಳೆ ಬೆಳಗ್ಗೆ ಎಸಿಬಿ ದಾಳಿ ನಡೆಸಲಿದೆ. ಈ ದಾಳಿ ಆಗದಂತೆ ತಡೆಯಬೇಕೆಂದರೆ ನಾವೊಂದು ಅಕೌಂಟ್ ನಂಬರ್ ಕಳುಹಿಸುತ್ತೇವೆ. ಅದಕ್ಕೆ ನೀವು ಹಣ ಹಾಕಿ' ಎಂದಿದ್ದಾನೆ. ಇದಕ್ಕೆ ಬೋಪಯ್ಯ, 'ಎಷ್ಟು?' ಎಂದಾಗ 'ನಿಮ್ಮಲ್ಲಿ ಕೋಟಿಗಟ್ಟಲೇ ಹಣವಿದೆಯಂತೆ ಅಲ್ವಾ.. 1 ಕೋಟಿ ಹಾಕಿ' ಎಂದು ಹೇಳಿದ್ದಾನೆ. 'ಸಮಸ್ಯೆಯಿಲ್ಲ, ಎಸಿಬಿ ದಾಳಿ ನಡೆಯಲಿ. ಅದನ್ನು ಫೇಸ್ ಮಾಡಲು ತಯಾರಿದ್ದೇನೆ' ಎಂದು ಬೋಪಯ್ಯ ಹೇಳುತ್ತಿದ್ದಂತೆ ದೂರವಾಣಿ ಕರೆ ಸ್ಥಗಿತವಾಗಿದೆ.
ಕೆಲ ನಿಮಿಷಗಳ ನಂತರ ಮತ್ತೊಂದು ನಂಬರ್ನಿಂದ ಬೋಪಯ್ಯಗೆ ಕರೆ ಮಾಡಿದ ಅಪರಿಚಿತ, 'ನೀವು ಏನ್ ನಿರ್ಧಾರ ಮಾಡಿದ್ದೀರಾ?' ಎಂದಿದ್ದಾನೆ. ಅದಕ್ಕುತ್ತರಿಸಿದ ಬೋಪಯ್ಯ, 'ಎಸಿಬಿ ದಾಳಿ ನಡೆಯಲಿ' ಎಂದು ಹೇಳಿದ್ದಾರೆ. ತಕ್ಷಣ ಆತ ಕರೆ ಸ್ಥಗಿತ ಮಾಡಿದ್ದಾನೆ. ಬಳಿಕ ಟ್ರೂ ಕಾಲರ್ನಲ್ಲಿ ಆ 2 ನಂಬರ್ಗಳನ್ನು ಪರಿಶೀಲಿಸಿದಾಗ ಒಂದು ನಂಬರ್ ಝಹೀಬ್, ಮತ್ತೊಂದು ಅಮ್ಮವನ ಎಂದು ತಿಳಿದುಬಂದಿದೆ.
ಈ ಘಟನೆ ಸಂಬಂಧ ಡಿಜಿಗೆ ಕರೆ ಮಾಡಿ ಬೋಪಯ್ಯ ಮಾಹಿತಿ ನೀಡಿದ್ದಾರೆ. ಪರಿಶೀಲನೆ ನಡೆಸಿದ ಸಂದರ್ಭ ಆಂಧ್ರದಿಂದ ಕರೆ ಬಂದಿರುವುದು ತಿಳಿದುಬಂದಿದೆ. ಆ ನಂಬರ್ಗೆ ಬೋಪಯ್ಯ ಅಬರು ಬೇರೆ ನಂಬರ್ನಿಂದ ಕರೆ ಮಾಡಿದ್ದು, ಯಾರೂ ಸ್ವೀಕರಿಸಿಲ್ಲ. ಡಿಜಿ ಹಾಗೂ ನಗರ ಪೊಲೀಸ್ ಠಾಣೆಯಲ್ಲಿ ದೂರು ದಾಖಲಾಗಿದ್ದು, ಪೊಲೀಸರು ತನಿಖೆ ಮುಂದುವರಿಸಿದ್ದಾರೆ.