ಬದೌನ್ (ಉತ್ತರ ಪ್ರದೇಶ): 'ಮಧುವಿನ 5ನೇ ಮಗು' ಇದು ಬಾಲಕಿಯೊಬ್ಬಳ ಹೆಸರು! ಅರೇ ಇದೆಂಥಾ ಹೆಸರು? ಎಂದು ಹುಬ್ಬೇರಿಸಬೇಡಿ. ಆಧಾರ್ ಕಾರ್ಡ್ನಲ್ಲಿ ಆ ಬಾಲಕಿಯ ಹೆಸರು 'ಮಧುವಿನ 5ನೇ ಮಗು'(ಮಧು ಕಾ ಪಂಚವಾ ಬಚ್ಚಾ/ Baby Five Of Madhu) ಎಂದು ಎಂಟ್ರಿಯಾಗಿದೆ. ಈ ಕುರಿತು ತನಿಖೆ ನಡೆಸುಂತೆ ಜಿಲ್ಲಾ ಮ್ಯಾಜಿಸ್ಟ್ರೇಟ್ ದೀಪಾ ರಂಜನ್ ಆದೇಶಿಸಿದ್ದಾರೆ.
ಇಂತಹ ವಿಚಿತ್ರ ಪ್ರಕರಣ ಉತ್ತರ ಪ್ರದೇಶದ ಬದೌನ್ ಜಿಲ್ಲೆಯಲ್ಲಿ ಕಂಡುಬಂದಿದೆ. ರಾಯ್ಪುರ ಗ್ರಾಮದ ದಿನೇಶ್ ಮತ್ತು ಮಧು ದಂಪತಿಗೆ ಒಟ್ಟು 5 ಮಕ್ಕಳು. 5ನೇ ಮಗಳ ಆಧಾರ್ ಕಾರ್ಡ್ನಲ್ಲಿ ಆಕೆಯ ಹೆಸರು 'ಮಧುವಿನ 5ನೇ ಮಗು' ಎಂದು ನಮೂದಾಗಿದೆ. ಬಾಲಕಿಯನ್ನು ಶಾಲೆಗೆ ಸೇರಿಸಲು ಹೋದಾಗ ಹೆಸರು ತಪ್ಪಾಗಿರುವುದು ಪಾಲಕರಿಗೆ ಗೊತ್ತಾಗಿದೆ. ಅಷ್ಟೇ ಅಲ್ಲ, ಈ ಆಧಾರ್ನಲ್ಲಿ ಇರಬೇಕಿದ್ದ 12 ನಂಬರ್ ಕೂಡ ಇಲ್ಲ.
5ನೇ ಮಗಳಿಗೆ ಆಧಾರ್ ಕಾರ್ಡ್ ಮಾಡಿಸಲು ಹೋಗಿದ್ದೆವು. ಆಗ ಮಗುವಿನ ಹೆಸರನ್ನ ಸಿಬ್ಬಂದಿ ಕೇಳಿದರು. ಇನ್ನೂ ಹೆರಿಟ್ಟಿಲ್ಲದ ಕಾರಣ ನಮ್ಮ 5ನೇ ಮಗಳು ಎಂದೆವು. ಅನಕ್ಷರಸ್ಥರಾದ ನಮಗೆ ಆಧಾರ್ನಲ್ಲಿ ಆಗಿರುವ ತಪ್ಪು ನಮ್ಮ ಗಮನಕ್ಕೆ ಬಾರಲೇ ಇಲ್ಲ. ಮಕ್ಕಳನ್ನು ಚೆನ್ನಾಗಿ ಓದಿಸುವ ಆಸೆಯಲ್ಲಿ ಶಾಲೆಗೆ ಸೇರಿಸಲು ಹೋದಾಗ ಆಧಾರ್ನಲ್ಲಿರುವ ತಪ್ಪು ಗಮನಕ್ಕೆ ಬಂತು. ಮಗಳ ಹೆಸರು ಭಾರತಿ ಎಂದು ಕಾರ್ಡ್ನಲ್ಲಿ ನಮೂದಾಗಬೇಕು. ಇನ್ನೂ ಆಕೆಗೆ ಶಾಲಾ ಪ್ರವೇಶಾತಿ ಸಿಕ್ಕಿಲ್ಲ. ಬಡವರಾದ ನಮಗೆ ಆಧಾರ್ ತಿದ್ದುಪಡಿ ಬೇಗ ಆದರೆ ಮಗಳ ಶಿಕ್ಷಣಕ್ಕೆ ಅನುಕೂಲ ಆಗುತ್ತೆ ಎಂದು ತಂದೆ ದಿನೇಶ್ ಅಳಲು ತೋಡಿಕೊಂಡಿದ್ದಾರೆ.
ಈ ಪ್ರಕರಣವನ್ನು ಗಂಭೀರವಾಗಿ ಪರಿಗಣಿಸಿದ ಬದೌನ್ ಜಿಲ್ಲಾ ಮ್ಯಾಜಿಸ್ಟ್ರೇಟ್ ದೀಪಾ, ಆಧಾರ್ ಸಿಬ್ಬಂದಿಯ ನಿರ್ಲಕ್ಷ್ಯದ ವಿರುದ್ಧ ಅಸಮಾಧಾನ ಹೊರಹಾಕಿದ್ದಾರೆ. ನಿರ್ಲಕ್ಷ್ಯ ತೋರುವವರ ವಿರುದ್ಧ ಕಠಿಣ ಕ್ರಮ ಕೈಗೊಳ್ಳಲಾಗುವುದು ಎಂದು ಎಚ್ಚರಿಸಿದ್ದಾರೆ.