| ದೇವರಾಜ್ ಕನಕಪುರ ಬೆಂಗಳೂರು
ಉತ್ತರ ಭಾರತದ ವಿದ್ಯಾರ್ಥಿಗಳೇ ಹೆಚ್ಚಿರುವ ರಾಜಧಾನಿಯ ಪ್ರತಿಷ್ಠಿತ ರಾಷ್ಟ್ರೀಯ ಕಾನೂನು ಶಾಲೆಯಲ್ಲಿ (ಎನ್ಎಲ್ಎಸ್ಐಯು) ಪ್ರಸಕ್ತ ಶೈಕ್ಷಣಿಕ ವರ್ಷದಿಂದಲೇ ಜಾರಿಗೆ ಬರುವಂತೆ ಶೇ.25 ಸೀಟುಗಳು ಕನ್ನಡಿಗರಿಗೆ ಮೀಸಲಾಗಲಿವೆ.
ಮೀಸಲಾತಿಯಡಿ ಈ ಸೀಟು ಪಡೆಯಲು ಕರ್ನಾಟಕದಲ್ಲಿ ಕನಿಷ್ಠ 10 ವರ್ಷ ವ್ಯಾಸಂಗ ಮಾಡಿರಬೇಕೆಂಬ ನಿಯಮ ರೂಪಿಸಲಾಗಿದೆ. ಈ ಮೀಸಲಾತಿ ಬಿ.ಎ, ಎಲ್ಎಲ್ಬಿ(ಆನರ್ಸ್), ಎಲ್ಎಲ್ಎಂ ಕೋರ್ಸ್ಗಳಿಗೂ ಅನ್ವಯಿಸಲಿದೆ. ಸಾಮಾನ್ಯ ಕಾನೂನು ಪ್ರವೇಶ ಪರೀಕ್ಷೆ(ಕ್ಲಾಟ್)ಗೆ ಅರ್ಜಿ ಸಲ್ಲಿಸುವಾಗಲೇ ಅಭ್ಯರ್ಥಿಗಳು ಮೀಸಲಾತಿ ಕೋರಬಹುದು. ನಂತರ ಕೌನ್ಸೆಲಿಂಗ್ ವೇಳೆ ಕರ್ನಾಟಕದಲ್ಲಿ 10 ವರ್ಷ ವ್ಯಾಸಂಗ ಮಾಡಿರುವ ಬಗ್ಗೆ ವ್ಯಾಸಂಗ ಪ್ರಮಾಣಪತ್ರ ನೀಡಬೇಕಾಗುತ್ತದೆ.
43 ಸೀಟುಗಳು: ಬಿಎ-ಎಲ್ಎಲ್ಬಿ(ಆನರ್ಸ್)ನಲ್ಲಿ ಲಭ್ಯವಿರುವ 120 ಸೀಟುಗಳ ಪೈಕಿ 30 ಸೀಟು ಹಾಗೂ ಎಲ್ಎಲ್ಎಂ ಕೋರ್ಸ್ ನಲ್ಲಿ ಲಭ್ಯವಿರುವ 50 ಸೀಟುಗಳ ಪೈಕಿ 13 ಸೀಟನ್ನು ಕನ್ನಡಿಗರಿಗೆ ಮೀಸಲಿಟ್ಟಿದೆ. ಈ ಶೇ.25 ಸೀಟುಗಳಲ್ಲಿ ಪ.ಜಾತಿ, ಪರಿಶಿಷ್ಟ ಪಂಗಡ, ಸಾಮಾನ್ಯ ವರ್ಗದವರಿಗೆ ಪ್ರತ್ಯೇಕವಾಗಿ ಮೀಸಲಾತಿ ನೀಡಲಾಗಿದೆ.
ಹಲವು ವರ್ಷಗಳ ಬೇಡಿಕೆ: ಕನ್ನಡಿಗರಿಗೆ ಶೇ.25 ಸೀಟು ನೀಡುವ ಸಂಬಂಧ ಹಲವು ವರ್ಷಗಳ ಹಿಂದೆಯೇ ರಾಜ್ಯ ಸರ್ಕಾರ ವಿಧಾನ ಮಂಡಲದಲ್ಲಿ ನಿಯಮ ರೂಪಿಸಿ ರಾಜ್ಯಪಾಲರ ಅನುಮೋದನೆ ಪಡೆದಿತ್ತು. ಎನ್ಎಲ್ಎಸ್ಐಯು ಕಾಯ್ದೆಗೆ ತಿದ್ದುಪಡಿ ತಂದು ಆನಂತರ ಇದನ್ನು ಜಾರಿಗೊಳಿಸಲು ವಿಳಂಬವಾಗಿತ್ತು. ಸದ್ಯ ವಿವಿಯಲ್ಲಿ 660 ವಿದ್ಯಾರ್ಥಿಗಳಿದ್ದು, 2021-24ರ ಅವಧಿಯಲ್ಲಿ ಎನ್ಎಲ್ಎಸ್ಐಯು ಒಳಗೊಳ್ಳುವಿಕೆ ಮತ್ತು ವಿಸ್ತರಣೆ ಕುರಿತ ಯೋಜನೆ ರೂಪಿಸಿದೆ. ಶೇ.25 ಕನ್ನಡಿಗರ ಮೀಸಲಾತಿ ಹೊರತಾಗಿ ಮುಂದಿನ 4 ವರ್ಷಗಳಲ್ಲಿ ಶೇ.30 ಮಹಿಳಾ ಮೀಸಲಾತಿ, ಶೇ.10 ಆರ್ಥಿಕವಾಗಿ ಹಿಂದುಳಿದ ವರ್ಗದವರಿಗೆ ಹಾಗೂ ಶೇ.27 ಹಿಂದುಳಿದ ವರ್ಗದ ಅಭ್ಯರ್ಥಿಗಳಿಗೆ ಮೀಸಲಾತಿ ನೀಡುವ ಗುರಿ ಹೊಂದಿದೆ. ವಿವಿಯು 5 ಸಂಶೋಧನಾ ಕ್ಲಸ್ಟರ್ ಹುಡುಕಿದ್ದು, ಕಾನೂನು ವ್ಯವಸ್ಥೆಯಲ್ಲಿ ಬದಲಾವಣೆ ತರುವ ಗುರಿ ಇಟ್ಟುಕೊಂಡಿದೆ.
23ರಂದು ಕ್ಲಾಟ್ ಪರೀಕ್ಷೆ: ಕ್ಲಾಟ್ ಪರೀಕ್ಷೆ ಜು.23ರಂದು ಆನ್ಲೈನ್ನಲ್ಲಿ ನಡೆಯಲಿದೆ. ಪ್ರತಿ ವರ್ಷ 45 ಸಾವಿರಕ್ಕೂ ಹೆಚ್ಚಿನ ವಿದ್ಯಾರ್ಥಿಗಳು ಅರ್ಜಿ ಸಲ್ಲಿಸುತ್ತಾರೆ.
ಈ ಬಾರಿ ಕಾನೂನು ಕೋರ್ಸ್ ವ್ಯಾಸಂಗಕ್ಕಾಗಿ ಕ್ಲಾಟ್ಗೆ ಅರ್ಜಿ ಸಲ್ಲಿಸಿದ್ದೇನೆ. ಕನ್ನಡಿಗರಿಗೆ ಮೀಸಲಾತಿ ನೀಡಿರುವುದು ಖುಷಿಯ ವಿಚಾರ.
| ಚಂದ್ರಕಲಾ ಅಭ್ಯರ್ಥಿ