ಚಂಡೀಗಢ: ಅಧಿಕ ವೇತನ ಮತ್ತು ಉದ್ಯೋಗ ಭದ್ರತೆಗಾಗಿ ಆಗ್ರಹಿಸಿ ವೃತ್ತಿಶಿಕ್ಷಣ ಶಿಕ್ಷಕರು ನಡೆಸುತ್ತಿದ್ದ ಪ್ರತಿಭಟನೆಯ ಸಂದರ್ಭದಲ್ಲಿ ಪೊಲೀಸರೊಂದಿಗೆ ನಡೆದ ಘರ್ಷಣೆಯಲ್ಲಿ 15 ಜನ ಪ್ರತಿಭಟನಾಕಾರರು ಮತ್ತು 8 ಜನ ಪೊಲೀಸರಿಗೆ ತೀವ್ರ ಗಾಯಗಳುಂಟಾಗಿರುವ ಪ್ರಸಂಗ ವರದಿಯಾಗಿದೆ.
ಹರಿಯಾಣದ ಹಲವು ಜಿಲ್ಲೆಗಳಲ್ಲಿ ಹರಿಯಾಣ ವೊಕೇಷನಲ್ ಟೀಚರ್ಸ್ ಅಸೋಸಿಯೇಷನ್ ನೇತೃತ್ವದಲ್ಲಿ ವೃತ್ತಿಪರ ಶಿಕ್ಷಕರಿಗೆ ಹೆಚ್ಚಿನ ವೇತನ ನೀಡುವಂತೆ ಹಾಗೂ ಉದ್ಯೋಗ ನೀಡುವಲ್ಲಿ ಗುತ್ತಿಗೆದಾರರ ಪಾತ್ರವನ್ನು ವಿರೋಧಿಸಿ 'ಮಹಾ ಆಂದೋಲನ್' ನಡೆಯುತ್ತಿದೆ. ಸೋಮವಾರ ಸಂಜೆ ಪಂಚಕುಲದಲ್ಲಿ ಪ್ರತಿಭಟನೆಯಲ್ಲಿ ತೊಡಗಿದ್ದ ಶಿಕ್ಷಕರ ಗುಂಪು ಚಂಡೀಗಡದ ಸಿಎಂ ನಿವಾಸಕ್ಕೆ ಮುತ್ತಿಗೆ ಹಾಕಲು ಹೊರಟಾಗ ಪೊಲೀಸರು ಬ್ಯಾರಿಕೇಡ್ಗಳನ್ನು ಹಾಕಿ ತಡೆಯುವ ಪ್ರಯತ್ನ ನಡೆಸಿದರು.
ಹೋರಾಟಗಾರರು ಇದಕ್ಕೆ ಮಣಿಯದ ಕಾರಣ ಲಾಠಿ ಚಾರ್ಜ್ ಮತ್ತು ವಾಟರ್ ಕ್ಯಾನನ್ಗಳ ಪ್ರಯೋಗಕ್ಕೆ ಪೊಲೀಸರು ಮುಂದಾದರು. ರೊಚ್ಚಿಗೆದ್ದ ಪ್ರತಿಭಟನಾಕಾರರು ಮತ್ತು ಪೊಲೀಸರ ನಡುವೆ ನಡೆದ ಮಾರಾಮಾರಿಯಲ್ಲಿ ಮೂವರು ಮಹಿಳಾ ಪೊಲೀಸ್ ಸಿಬ್ಬಂದಿ ಸೇರಿದಂತೆ ಎಂಟು ಜನ ಪೊಲೀಸರಿಗೆ ಗಾಯಗಳುಂಟಾದವು. ಪ್ರತಿಭಟನಾಕಾರರಲ್ಲಿ 15 ಜನರಿಗೆ ಗಾಯಗಳುಂಟಾದವು ಎಂದು ವರದಿ ತಿಳಿಸಿದೆ. (ಏಜೆನ್ಸೀಸ್)