ಪಟ್ನಾ: ಇಬ್ಬರು ಪೊಲೀಸ್ ಅಧಿಕಾರಿಗಳು ನ್ಯಾಯಾಧೀಶರೊಬ್ಬರ ಚೇಂಬರ್ಗೆ ನುಗ್ಗಿ ನಿಂದಿಸಿದ್ದಲ್ಲದೆ ಅವರ ಮೇಲೆ ಶಾರೀರಿಕ ಹಲ್ಲೆ ಮಾಡಿರುವ ಆಘಾತಕಾರಿ ಘಟನೆ ಬಿಹಾರದಲ್ಲಿ ನಡೆದಿದೆ. ಮಧುಬಾನಿ ಜಿಲ್ಲೆಯ ಹೆಚ್ಚುವರಿ ಜಿಲ್ಲಾ ನ್ಯಾಯಾಧೀಶರಾದ ಅವಿನಾಶ್ ಕುಮಾರ್ ಹಲ್ಲೆಗೊಳಗಾದ ನ್ಯಾಯಾಧೀಶರು. ಈ ಬಗ್ಗೆ ಸುಯೋ ಮೋಟೋ ಕೇಸು ದಾಖಲಿಸಿಕೊಂಡಿರುವ ಪಟ್ನಾ ಹೈಕೋರ್ಟ್, ರಾಜ್ಯದ ಪೊಲೀಸ್ ಮುಖ್ಯಸ್ಥರನ್ನು ಖುದ್ದು ಹಾಜರಾಗಿ ವರದಿ ನೀಡುವಂತೆ ಆದೇಶಿಸಿದೆ.
ಘೋಘರ್ದಿಹ ಠಾಣಾಧಿಕಾರಿ ಗೋಪಾಲ್ ಕೃಷ್ಣ ಮತ್ತು ಸಬ್ ಇನ್ಸ್ಪೆಕ್ಟರ್ ಅಭಿಮನ್ಯು ಕುಮಾರ್ ಶರ್ಮಾ ಎಂಬುವರು ಗುರುವಾರದಂದು ಝಾಝರ್ಪುರದ ಕೋರ್ಟ್ ಸಂಕೀರ್ಣದಲ್ಲಿರುವ ನ್ಯಾಯಾಧೀಶರ ಕೊಠಡಿಗೆ ನುಗ್ಗಿ ಅವರನ್ನು ನಿಂದಿಸಲು ಶುರುಮಾಡಿದರು. ನಂತರ ಅವರನ್ನು ಎಳೆದಾಡಿ ತಮ್ಮ ಸರ್ವೀಸ್ ರಿವಾಲ್ವರ್ಗಳನ್ನು ತೋರಿಸಿ ಬೆದರಿಸಿದರು. ಶಬ್ದ ಕೇಳಿ ಕಾರಿಡಾರಿನಲ್ಲಿದ್ದ ವಕೀಲರು ಮತ್ತು ಸಿಬ್ಬಂದಿ ಒಳಗೆ ಬಂದು ಆ ಪೊಲೀಸರನ್ನು ಥಳಿಸಿ, ನ್ಯಾಯಾಧೀಶರನ್ನು ರಕ್ಷಿಸಿದರು ಎನ್ನಲಾಗಿದೆ.
ನ್ಯಾಯಾಧೀಶರ ದೂರಿನ ಮೇರೆಗೆ ಗುರುವಾರ ಸಂಜೆ ಈ ಬಗ್ಗೆ ವಿಚಾರಣೆ ನಡೆಸಿದ ಪಟ್ನಾ ಹೈಕೋರ್ಟ್, ಇದು ನ್ಯಾಯಾಂಗದ ಸ್ವಾತಂತ್ರ್ಯಕ್ಕೆ ಧಕ್ಕೆ ತರುವಂಥ ಪ್ರಸಂಗ ಎಂದು ಅಭಿಪ್ರಾಯಪಟ್ಟಿದೆ. ರಾಜ್ಯದ ಮುಖ್ಯ ಕಾರ್ಯದರ್ಶಿ, ಡಿಜಿಪಿ ಹಾಗೂ ಮಧುಬಾನಿ ಎಸ್ಪಿಗೆ ನೋಟೀಸ್ ಜಾರಿಗೊಳಿಸಿದೆ. ಬಿಹಾರ ಡಿಜಿಪಿ ಎಸ್.ಕೆ.ಸಿಂಘಾಲ್ ಅವರಿಗೆ ಈ ಬಗ್ಗೆ ಸೀಲ್ಡ್ ಕವರ್ನಲ್ಲಿ ಸ್ಟೇಟಸ್ ರಿಪೋರ್ಟ್ ಸಲ್ಲಿಸಲು ಆದೇಶಿಸಿರುವ ಹೈಕೋರ್ಟ್, ನವೆಂಬರ್ 29 ರಂದು ನಡೆಯುವ ಮುಂದಿನ ವಿಚಾರಣೆಗೆ ಕೋರ್ಟ್ ಮುಂದೆ ಖುದ್ದು ಹಾಜರಾಗಲು ಸೂಚಿಸಿದೆ.
ಝಾಝರ್ಪುರ ವಕೀಲರ ಸಂಘವು ಈ ಘಟನೆಯನ್ನು ಖಂಡಿಸಿದೆ. ಹಲ್ಲೆ ನಡೆಸಿದ ಪೊಲೀಸ್ ಅಧಿಕಾರಿಗಳ ವಿರುದ್ಧ ಇತ್ತೀಚೆಗೆ ನ್ಯಾಯಾಧೀಶ ಅವಿನಾಶ್ ಕುಮಾರ್ ಆದೇಶವನ್ನು ಹೊರಡಿಸಿದ್ದರು. ಇದರಿಂದ ಕೋಪಗೊಂಡು ಈ ಕೃತ್ಯ ಎಸಗಿದ್ದಾರೆ ಎಂಬ ಶಂಕೆ ವ್ಯಕ್ತವಾಗಿದೆ. (ಏಜೆನ್ಸೀಸ್)