WhatsApp scam alert feature
- ವಾಟ್ಸಾಪ್ ಬಳಕೆದಾರರಿಗೆ ಮೆಟಾದಿಂದ ಸಿಕ್ತು ಗುಡ್ನ್ಯೂಸ್
- ಇನ್ಮುಂದೆ ಸ್ಕ್ಯಾಂ ಲಿಂಕ್, ವಂಚನೆಯ ಫೈಲ್ ಬಗ್ಗೆ ಚಿಂತೆ ಬೇಡ
- ಆನ್ಲೈನ್ ವಂಚನೆ, ಲಿಂಕ್ ಮೆಸೇಜ್ ಬಂದರೆ ಸ್ಕ್ಯಾಂ ಅಲರ್ಟ್ ಕೊಡುವ ವಾಟ್ಸಾಪ್
WhatsApp scam alert feature: ಐಷಾರಾಮಿ ಜೀವನ ನಡೆಸುವ ನಿಟ್ಟಿನಲ್ಲಿ ಹಣ ಬಾಕರು, ಸೈಬರ್ ವಂಚನೆ, ಕಳ್ಳತನ ಸೇರಿದಂತೆ ನಾನಾ ವಿಧದಲ್ಲಿ ಅಮಾಯಕರನ್ನು ವಂಚಿಸಿ ಹಣ ಮಾಡಿಕೊಳ್ಳಲು ಯೋಜನೆಗಳನ್ನು ರೂಪಿಸುತ್ತಾರೆ. ಪ್ರತಿಬಾರಿಯು ಒಂದೊಂದು ವಿಧಾನದಲ್ಲಿ ದರೋಡೆ ಮಾಡಲಾಗುತ್ತದೆ. ವಾಟ್ಸಾಪ್ ಮೂಲಕವು ಈ ದಂಧೆ ನಡೆಯುವುದು ಸಾಮಾನ್ಯವಾಗಿ ಹೋಗಿದೆ. ಹೀಗಾಗಿ ಮೆಟಾ ಆಂಡ್ರಾಯ್ಡ್ ಬಳಕೆದಾರರ ಭದ್ರತೆಯನ್ನು ಹೆಚ್ಚಿಸಲು ಮತ್ತೊಂದು ಅದ್ಭುತ ವೈಶಿಷ್ಟ್ಯವನ್ನು ಜಾರಿ ಮಾಡಲು ಮುಂದಾಗಿದೆ.
ಏನಿದು ಸ್ಕ್ಯಾಂ ಅಲರ್ಟ್?
ವಾಟ್ಸಾಪ್ನ ಇತ್ತೀಚಿನ ಅಪ್ಡೇಟ್ಗಳನ್ನು ಟ್ರ್ಯಾಕ್ ಮಾಡುವ 'ಡಬ್ಲ್ಯೂಎಬೀಟಾಇನ್ಫೋ' ವರದಿಯ ಪ್ರಕಾರ, ವಾಟ್ಸಾಪ್ ಆಂಡ್ರಾಯ್ಡ್ ಬಳಕೆದಾರರಿಗಾಗಿ 'ಸ್ಕ್ಯಾಮ್ ಅಲರ್ಟ್' ಎಂಬ ಹೊಸ ಫೀಚರ್ ಅನ್ನು ಅಭಿವೃದ್ಧಿಪಡಿಸುತ್ತಿದೆ. ಇದು ಬಳಕೆದಾರರ ಡಿವೈಸ್ನಲ್ಲಿಯೇ ನೇರವಾಗಿ ಕಾರ್ಯನಿರ್ವಹಿಸಲಿದೆ.
ವಾಟ್ಸಾಪ್ನಲ್ಲಿ ಈಗ ಯಾವುದು ಖಾಸಗಿತನ ಅನ್ನೋದೆ ಇಲ್ಲ. ಅಪರಿಚಿತರಿಂದ ಮೆಸೇಜ್ಗಳು, ಲಿಂಕ್, ಫೈಲ್ ಬರುತ್ತಲೇ ಇರುತ್ತದೆ. ಇಂತಹ ಸಮಯದಲ್ಲಿ ಬಳಕೆದಾರರ ಹಣ ಹಾಗೂ ಅವರ ಮಾನಸಿಕ ನೆಮ್ಮದಿ ಕಾಪಾಡುವ ನಿಟ್ಟಿನಲ್ಲಿ ವಾಟ್ಸಾಪ್ ಹೊಸ ಫೀಚರ್ ಅನ್ನು ಪರಿಚಯಿಸುತ್ತಿದೆ. ಅನುಮಾನಾಸ್ಪದ ಅಥವಾ ವಂಚನೆಯ ಮುನ್ಸೂಚನೆ ಇರುವ ಚಾಟ್ಗಳನ್ನು ಗುರುತಿಸಿ ತಕ್ಷಣವೇ ಬಳಕೆದಾರರನ್ನು ಎಚ್ಚರಿಸುತ್ತದೆ ಎನ್ನಲಾಗಿದೆ.
ಖಾಸಗಿತನಕ್ಕೆ ಧಕ್ಕೆ ಇಲ್ಲ
ವಾಟ್ಸಾಪ್ ನಿಮಗೆ ಬಂದ ಮೆಸೇಜ್ಗಳನ್ನು ಓದದೆ ಅಲರ್ಟ್ ಮೆಸೇಜ್ ನೀಡುತ್ತದೆ. ಇದು ನಿಮ್ಮ ಮೊಬೈಲ್ ಡಿವೈಸ್ನ ಒಳಗಡೆಯೇ ನಡೆಯುವುದರಿಂದ, ಖಾಸಗಿತನಕ್ಕೆ ಯಾವುದೇ ಸಮಸ್ಯೆ ಉಂಟಾಗೋದಿಲ್ಲ. ಯಾವುದಾದರೂ ಚಾಟ್ನಿಂದ ಬರುವ ಲಿಂಕ್ಗಳ ಬಗ್ಗೆ ಬಳಕೆದಾರರಿಗೆ ಎಚ್ಚರಿಸುತ್ತದೆ. ಅಲ್ಲದೇ, ಸುಲಭವಾಗಿ ಬ್ಲಾಕ್ ಹಾಗೂ ರಿಪೋರ್ಟ್ ಮಾಡಲು ಸಹಾಯ ಮಾಡುತ್ತದೆ ಎನ್ನಲಾಗಿದೆ.
ಸ್ಕ್ಯಾಮ್ ಅಲರ್ಟ್ ಫೀಚರ್ ಆಂಡ್ರಾಯ್ಡ್ನ ಆಯ್ದ ಬೀಟಾಗಳಲ್ಲಿ ಶೀಘ್ರವೇ ಪರೀಕ್ಷೆಗೆ ಲಭ್ಯವಾಗಲಿದೆ. ಯಶಸ್ವಿಯಾದ ನಂತರ ಜಾಗತಿಕವಾಗಿ ವಾಟ್ಸಾಪ್ ಬಳಕೆದಾರರಿಗೆ ಇದರ ಅಪಡೇಟ್ ಸಿಗಲಿದ ಎನ್ನಲಾಗಿದೆ.
ಹ್ಯಾಕ್ಗೆ ಒಳಗಾಗಿದ್ದ ನಟಿ ಪ್ರಿಯಾಂಕಾ
ಕಳೆದ ವರ್ಷ ನಟಿ ಪ್ರಿಯಾಂಕಾ ಉಪೇಂದ್ರ ಅವರು ತಮ್ಮ ಫೋನ್ನಿಂದ ಆನ್ಲೈನ್ನಲ್ಲಿ ವಸ್ತುವೊಂದನ್ನು ಬುಕ್ ಮಾಡಿದ್ದರು. ಡೆಲಿವರಿ ಬಾಯ್ ಲೊಕೇಶನ್ ಕಳಿಸಿ ಎಂದು ಕೊಟ್ಟ ನಂಬರ್ಗೆ ಕರೆ ಮಾಡಿದಾಗ ಅವರ ಮೊಬೈಲ್ ಹ್ಯಾಕ್ ಆಗಿ ಸ್ಥಗಿತಗೊಂಡಿತ್ತು. ಅಲ್ಲೇ ಇದ್ದ ನಟ ಉಪೇಂದ್ರ ಅವರ ಫೋನ್ನಿಂದ ಕರೆ ಮಾಡಿದಾಗಲೂ ಇದೇ ಪರಿಸ್ಥಿತಿ. ಪ್ರಿಯಾಂಕಾ ಉಪೇಂದ್ರ ಅವರ ನಂಬರ್ನಿಂದ ವಾಟ್ಸಾಪ್ ಲಾಗಿನ್ ಆದ ವಂಚಕರು, ಮಗ ಸೇರಿದಂತೆ ಸಂಬಂಧಿಕರಿಂದ ಹಣಕ್ಕೆ ಬೇಡಿಕೆ ಇಟ್ಟಿದ್ದಾರೆ. ಕೆಲವರು ಹಣ ಪಾವತಿಸಿದ್ದಾರೆ. ಆನಂತರ, ನಟ ಕೊಟ್ಟ ದೂರಿನ ಮೇರೆಗೆ ತನಿಖೆ ನಡೆಸಿದ ಸೈಬರ್ ಕ್ರೈಂ ಪೊಲೀಸರು ಬಿಹಾರದಲ್ಲಿದ್ದ ಕಳ್ಳರನ್ನು ಪತ್ತೆ ಹಚ್ಚಿದ್ದರು.
ವೃದ್ಧನಿಗೆ ಮೋಸ
ಇತ್ತೀಚೆಗೆ ಬ್ಯಾಂಕ್ ಮ್ಯಾನೇಜರ್ ಹೆಸರಿನಲ್ಲಿ ಕಳುಹಿಸಿದ್ದ ವಾಟ್ಸಾಪ್ ಲಿಂಕ್ ಮೇಲೆ ಕ್ಲಿಕ್ ಮಾಡಿ ಬೆಂಗಳೂರಿನ ನಿವಾಸಿಯೊಬ್ಬರು ಆರು ಲಕ್ಷಕ್ಕೂ ಹೆಚ್ಚು ಹಣ ಕಳೆದುಕೊಂಡ ಪ್ರಕರಣ ಬೆಳಕಿಗೆ ಬಂದಿತ್ತು. ಇಂತಹ ಹ್ಯಾಕ್ಗಳು, ಸ್ಕ್ಯಾಂ ಫೈಲ್ಗಳು, ಲಿಂಕ್ಗಳು, ಅಪ್ರಚಾರದ ಮಾಹಿತಿಗಳಿಂದ ಬಳಕೆದಾರರಿಗೆ ಮುಕ್ತಿ ಕೊಟ್ಟು ವಂಚನೆಗೆ ಒಳಗಾಗದಂತೆ ತಡೆಯಲು ಎಂದು ಮೆಟಾ ಈ ಫೀಚರ್ ಪರಿಚಯಿಸಲು ಹೊರಟಿದೆ, (ಏಜೆನ್ಸೀಸ್).