ಇನ್ನು ಶ್ರೀಮಾನ್ ಎನ್ನುವುದಕ್ಕೆ ಬಹುಮುಖ್ಯವಾದ ಇನ್ನೊಂದು ಅರ್ಥವೂ ಇದೆ. ಇಡೀ ವಿಶ್ವದ ಒಡೆತನ ಹೊಂದಿರುವ ಭಗವಂತ ಅತ್ಯಂತ ಶ್ರೀಮಂತ. ಹೀಗಾಗಿ ಅವನು ಶ್ರೀಮಾನ್. ನಮ್ಮ ಪಂಚೇಂದ್ರಿಯಗಳಾದ ಕಣ್ಣು, ಕಿವಿ, ಬಾಯಿ, ಮೂಗು, ಕಿವಿ ಮುಂತಾದುವು ಸಹ ಒಂದೊಂದೂ ಶ್ರೀಗಳು ಎಂದು ಐತರೇಯ ಉಪನಿಷತ್ತು ಹೇಳುತ್ತದೆ. ಏಕೆಂದರೆ ಈ ಎಲ್ಲಾ ಇಂದ್ರಿಯಗಳೂ ನಮ್ಮ ತಲೆಯ ಭಾಗದಲ್ಲೇ ಇವೆ. ಮನುಷ್ಯ ಆಧ್ಯಾತ್ಮಿಕವಾಗಿ ಏನನ್ನಾದರೂ ಸಾಧಿಸಿದ್ದಾನೆ ಮತ್ತು ಸ್ವಲ್ಪ ಜ್ಞಾನವನ್ನು ಸಂಪಾದನೆ ಮಾಡಿದ್ದಾನೆ ಎಂದರೆ ಅದು ಅವನ ಕಣ್ಣು ಮತ್ತು ಕಿವಿಗಳಿಂದ ಮಾತ್ರ. ಧರ್ಮಗ್ರಂಥಗಳನ್ನು ಓದುವುದು ಮತ್ತು ಕೇಳುವುದು ಇವೇ ಆ ಕ್ರಿಯೆಗಳು.
ಕಣ್ಣು ಮತ್ತು ಕಿವಿಗಳನ್ನು ದೇಹದ ಸೂರ್ಯ ಚಂದ್ರರು ಎನ್ನುತ್ತಾರೆ. ಇನ್ನೊಂದು ಬಹುಮುಖ್ಯವಾದ ಅಂಶ ಎಂದರೆ ನಮ್ಮ ನಾಲಿಗೆ. ಇದನ್ನು ನಮ್ಮ ಹಿರಿಯರು ‘ಅಗ್ನಿಸ್ವರೂಪ’ ಎನ್ನುತ್ತಾರೆ. ಬಾಯಿ ಮತ್ತು ಅದರಿಂದ ಬರುವ ಮಾತು ಎರಡೂ ಪರಮಾತ್ಮ ನಮಗೆ ಕೊಟ್ಟಿರುವ ಅಪೂರ್ವ ಸಂಪತ್ತು. ಹೀಗಾಗಿ ನಾವು ಬಾಯಿಯ ಬಳಕೆಯನ್ನು ಸದಾ ಸದುಪಯೋಗ ಮಾಡಿಕೊಳ್ಳಬೇಕು. ಬಾಯಿಂದ ಯಾವುದೇ ಮಾತು ಹೊರಡುವ ಮುನ್ನ ನೋಡಿದ್ದನ್ನು ಅನುಭವಿಸಲು ಮತ್ತು ಕೇಳಿದ್ದನ್ನು ಗ್ರಹಿಸಲು ಮನಸ್ಸು ಬೇಕು. ಜೊತೆಗೆ ಈ ಎಲ್ಲಾ ಇಂದ್ರಿಯಗಳನ್ನೂ ಚಲನಾತ್ಮಕವಾಗಿಟ್ಟುಕೊಳ್ಳಲು ಪ್ರಾಣಶಕ್ತಿ ಬೇಕು. ಹೀಗಾಗಿ ಪಂಚೇಂದ್ರಿಯಗಳು ನಮ್ಮಲ್ಲಿರುವ ಅತ್ಯಂತ ಶ್ರೀಮಂತ ಅಂಗಗಳು. ಇದನ್ನು ನಮಗೆ ದಯಪಾಲಿಸಿದವನು ಕರುಣಾಮಯಿ ಭಗವಂತ ಅಂದರೆ ಶ್ರೀಮಾನ್. ನಮ್ಮ ಅನುದಿನದ ಕಾಯಕಗಳಲ್ಲಿ ಇಂಥ ಶ್ರೀಮಾನ್ ಸದಾ ನೆನಪಿನಲ್ಲಿರಬೇಕು’ ಎಂದು ಗುರುಗಳು ಅಂದಿನ ಪಾಠವನ್ನು ಮುಕ್ತಾಯ ಮಾಡಿದರು.
(ಲೇಖಕರು ಸಾಹಿತಿ)