ಆತ ಹಡಗಿನ ಇಂಜಿನ್ ಸೂಕ್ಷ್ಮವಾಗಿ ಪರಿಶೀಲಿಸಿದ. ಕೊನೆಗೆ ತನ್ನ ಸಲಕರಣೆಗಳ ಚೀಲದಿಂದ ಸುತ್ತಿಗೆಯೊಂದನ್ನು ಹೊರತೆಗೆದು ಅದರಿಂದ ಇಂಜಿನ್ನ ಒಂದು ಭಾಗದಲ್ಲಿ ಕೇವಲ ಐದು ಬಾರಿ ಬಲವಾಗಿ ಹೊಡೆದ. ಅಲ್ಲಿಗೆ ಯಂತ್ರವು ಕರ್ಕಶವಾಗಿ ಶಬ್ದ ಮಾಡುವುದು ನಿಂತು ಹೋಯಿತು. ಎಲ್ಲರಿಗೂ ಬಹಳ ಖುಷಿಯಾಯಿತು.
ಹಡಗಿನ ಮಾಲಿಕ ನಿಮ್ಮ ಫೀಸ್ ಎಷ್ಟು ಎಂದು ಇಂಜಿನಿಯರ್ನನ್ನು ಕೇಳಿದಾಗ ಆತ 50,000 ರೂಪಾಯಿಗಳು ಎಂದು ತಿಳಿಸಿದ. ಅವನು ಅಷ್ಟೊಂದು ದೊಡ್ಡ ಮೊತ್ತದ ಫೀಸ್ ಕೇಳಿದ್ದಕ್ಕೆ ಮಾಲೀಕನಿಗೆ ಸಿಟ್ಟು ಬಂದರೂ ಅದನ್ನು ತೋರಿಸಿಕೊಳ್ಳದೆ ಕೇಳಿದ. ‘ನೀನು ಬಂದು ಒಂದಷ್ಟು ಹೊತ್ತು ಗಮನಿಸಿದೆ ಮತ್ತು ಸುತ್ತಿಗೆಯಿಂದ ನಾಲ್ಕಾರು ಬಾರಿ ಬಡಿದೆ. ಇಷ್ಟು ಸಣ್ಣ ಕೆಲಸಕ್ಕೆ ಅಷ್ಟು ದೊಡ್ಡ ಮೊತ್ತ ತೆಗೆದುಕೊಳ್ಳುವುದು ಸರಿಯೇ?’ ಅದಕ್ಕೆ ಇಂಜಿನಿಯರ್ ಹೇಳಿದ. ‘ನಿಮಗೆ ನಾನು ಸುತ್ತಿಗೆ ಯಿಂದ ಬಡಿದದ್ದು ಮಾತ್ರ ಕಾಣಿಸಿತು. ಆದರೆ ಹಲವು ಘಟಾನುಘಟಿ ತಂತ್ರಜ್ಞರುಗಳು ಸರಿಪಡಿಸಲಾಗದೆ ಬಿಟ್ಟ ಕೆಲಸದ ಲೋಪವನ್ನು ಶೀಘ್ರ ಕಂಡುಹಿಡಿದು ಅದನ್ನು ಸರಿಪಡಿಸಲು ಎಲ್ಲಿ ಬಡಿಯಬೇಕು ಎಷ್ಟು ಬಡಿಯಬೇಕು ಎಂದು ಕರಾರುವಕ್ಕಾಗಿ ನಿರ್ಧರಿಸಲು ಕಳೆದ 25 ವರ್ಷಗಳ ನನ್ನ ಅನುಭವವನ್ನು ಧಾರೆಯೆರೆದಿರುವೆ. ನಾನು ಹಣ ಕೇಳಿದ್ದು ಆ ಅನುಭವಕ್ಕೆ ಹೊರತು ಈಗಿನ ಕೆಲಸಕ್ಕೆ ಮಾತ್ರವಲ್ಲ’ ಎಂದ. ಮಾಲೀಕನಿಗೆ ಅವನ ಮಾತು ಸರಿ ಎನ್ನಿಸಿ ಸಂತೋಷದಿಂದ ಹಣವನ್ನು ಕೊಟ್ಟು ಕಳುಹಿಸಿದ.
ನಾವು ಕೂಡ ಬಹಳಷ್ಟು ಸಲ ನಮ್ಮ ಸುತ್ತಮುತ್ತಲಿನಲ್ಲಿ ಬೇರೆ ಬೇರೆ ರಂಗಗಳಲ್ಲಿರುವ ಪ್ರತಿಭಾನ್ವಿತರ ಪ್ರತಿಭೆಯನ್ನು ಕೇವಲ ಅವರು ತೆಗೆದುಕೊಂಡ ಸಮಯ ಮತ್ತು ನಿರ್ವಹಣೆಯ ಮೇಲೆ ವಿಶ್ಲೇಷಿಸಿ ಬಿಡುತ್ತೇವೆ. ಆದರೆ ಅಂತಹ ಉನ್ನತವಾದ ಪ್ರದರ್ಶನವನ್ನು ತೋರಲು ಅವರು ತಮ್ಮ ಜೀವನದಲ್ಲಿ ಹಲವು ವರ್ಷಗಳ ಕಾಲ ಬಹಳಷ್ಟು ಕಷ್ಟಪಟ್ಟಿರುತ್ತಾರೆ ಎನ್ನುವುದನ್ನು ಮರೆಯುತ್ತೇವೆ. ಕೆಲವರು ಅದನ್ನು ಮೀರಿ ಹಣವನ್ನು ದುರಾಸೆಗೆ ಬಯಸಬಹುದು. ಆದರೆ ಎಲ್ಲರನ್ನೂ ಒಂದೇ ತರನಾಗಿ ನೋಡಲಾಗದು. ಅಲ್ಲದೆ. ಅನುಭವಕ್ಕೂ ಬೆಲೆ ಇದೆ.
(ಲೇಖಕರು ವಾಣಿಜ್ಯಶಾಸ್ತ್ರ ಉಪನ್ಯಾಸಕರು)