ಮದ್ರಾಸ್-ಐ ಬಗ್ಗೆ ಭಯಬೇಡ, ನೇತ್ರಾಧಿಕಾರಿ ಸಿದ್ದಪ್ಪ ಕಲ್ಯಾಣಿ ಹೇಳಿಕೆ

ಅಳವಂಡಿ: ಮದ್ರಾಸ್-ಐ ಸಾಂಕ್ರಾಮಿಕ ರೋಗವಾಗಿದ್ದು, ಸ್ವಚ್ಛತೆ ಜತೆಗೆ ಅಂತರ ಕಾಯ್ದುಕೊಳ್ಳುವುದು ಒಳ್ಳೆಯದು ಎಂದು ನೇತ್ರಾಧಿಕಾರಿ ಸಿದ್ದಪ್ಪ ಕಲ್ಯಾಣಿ ತಿಳಿಸಿದರು.

ಗ್ರಾಮದ ಡಾ.ಬಿ.ಆರ್.ಅಂಬೇಡ್ಕರ್ ಬಾಲಕಿಯರ ವಸತಿ ಶಾಲೆಯಲ್ಲಿ ಅಳಂಡಿಯ ಪ್ರಾಥಮಿಕ ಆರೋಗ್ಯ ಕೇಂದ್ರದಿಂದ ಹಮ್ಮಿಕೊಂಡಿದ್ದ ಮದ್ರಾಸ್-ಐ ಜಾಗೃತಿ ಕಾರ್ಯಕ್ರಮ ಉದ್ದೇಶಿಸಿ ಶುಕ್ರವಾರ ಮಾತನಾಡಿದರು.

ಕಣ್ಣು ಕೆಂಪಾಗುವುದು, ಪಿಚ್ಚುಗಟ್ಟುವುದು, ಉರಿಯುವುದು ಹಾಗೂ ನೀರು ಬರುವುದು ರೋಗದ ಲಕ್ಷಣಗಳಾಗಿವೆ. ಈ ಲಕ್ಷಣವಿದ್ದವರು ಕಣ್ಣನ್ನು ಮುಟ್ಟಿಕೊಳ್ಳಬಾರದು ಹಾಗೂ ಕೈಯನ್ನು ಸ್ವಚ್ಛವಾಗಿಟ್ಟುಕೊಳ್ಳಬೇಕು. ಡಾಕ್ಟರ್ ಸಲಹೆ ಮೇರೆಗೆ ಔಷಧ ಪಡೆಯಬೇಕು. ಇದು 3 ರಿಂದ 5 ದಿನ ಇರಲಿದ್ದು, ಯಾರೂ ಭಯಪಡುವ ಅಗತ್ಯವಿಲ್ಲ ಎಂದರು.

ಇದನ್ನೂ ಓದಿ: ಬೀಸುತ್ತಿದೆ ಮದ್ರಾಸ್-ಐ ಸೋಂಕಿನ ಗಾಳಿ – 12 ವರ್ಷದೊಳಗಿನವರೇ ಹೆಚ್ಚು ಬಾಧಿತರು 

ಹಿರಿಯ ಆರೋಗ್ಯ ನೀರಿಕ್ಷಣಾಧಿಕಾರಿ ರವೀಂದ್ರ ಕಮ್ಮಾರ ಮಾತನಾಡಿ, ಮದ್ರಾಸ್-ಐ ಒಂದು ಬ್ಯಾಕ್ಟಿರಿಯಾದಿಂದ ಬರುತ್ತದೆ. ಇದಿದ್ದವರು ಇತರರಿಂದ ಅಂತರ ಕಾಯ್ದುಕೊಳ್ಳಬೇಕು. ಕಣ್ಣು ಒರೆಸಿಕೊಳ್ಳಬಾರದು ಎಂದರು.

ಮುಖ್ಯಶಿಕ್ಷಕ ಅಶೋಕ ಕೊಣ್ಣೂರ, ಶಿಕ್ಷಕರಾದ ಆರ್.ಎಂ. ಕಮತರ, ಮಹ್ಮದ್ ಆರಿಫ್, ಮಂಜುನಾಥ, ಶೀಲಾ, ಗವಿಸಿದ್ದಪ್ಪ, ಕವಿತಾ, ಶಿಲ್ಪಾ ಹಾಗೂ ಆಶಾ ಕಾರ್ಯಕರ್ತೆಯರು ಇದ್ದರು.