ಬಾಗಲಕೋಟೆ: ಆನ್ಲೈನ್ ಬೆಟ್ಟಿಂಗ್ಅನ್ನು (Online Betting) ಬ್ಯಾನ್ ಮಾಡುವಂತೆ ಆಗ್ರಹಿಸಿ ಯುವಕನೋರ್ವ ಇಳಕಲ್ ಸೀರೆ ಮೇಲೆ ಇಂಗ್ಲೀಷ್ನಲ್ಲಿ ನೇಯುವ ಮೂಲಕ ಪ್ರಧಾನಿ ಮೋದಿಗೆ ವಿನೂತನವಾಗಿ ಮನವಿ ಮಾಡಿರುವ ಘಟನೆ ಬಾಗಲಕೋಟೆ ಜಿಲ್ಲೆ ಇಳಕಲ್ನಲ್ಲಿ ನಡೆದಿದೆ.
ಇಳಕಲ್ ನಗರದ ನಿವಾಸಿ ಮೇಘರಾಜ್ ಗುದ್ದಟ್ಟಿ ಬ್ಯಾನ್ ರಮ್ಮಿ ಮತ್ತು ಡ್ರೀಮ್ 11 ಎಂದು ಸೀರೆ ಮೇಲೆ ನೇಯುವ ಮೂಲಕ ಪ್ರಧಾನಿಗೆ ವಿಭಿನ್ನವಾಗಿ ಮನವಿ ಮಾಡಿದ್ಧಾರೆ. ಸದ್ಯ ಯುವಕನ ನಡೆ ವ್ಯಾಪಕ ಮೆಚ್ಚುಗೆಗೆ ಪಾತ್ರವಾಗಿದೆ.
ಈ ಬಗ್ಗೆ ಮಾತನಾಡಿರುವ ಯುವಕ ಮೇಘರಾಜ್ ಗುದ್ದಟ್ಟಿ, ಆನ್ಲೈನ್ ಜೂಜಾಟದಿಂದ (Online Betting) ಅನೇಕ ಕುಟುಂಬಗಳು ಬೀದಿಗೆ ಬಂದಿದೆ. ಇದರಿಂದಾಗಿ ಅನೇಕ ಯುವಕರು ಆತ್ಮಹತ್ಯೆ ಮಾಡಿಕೊಂಡಿದ್ದಾರೆ. ಹೀಗಾಗಿ ಈ ಜೂಜಾಟ ಬ್ಯಾನ್ ಮಾಡಬೇಕೆಂದು ಈ ವಿಶೇಷ ಸೀರೆಯನ್ನು ನೇಯ್ಗೆ ಮಾಡಲಾಗಿದೆ. ಈ ಸೀರೆಯನ್ನು ಪ್ರಧಾನಿ ಕಾರ್ಯಾಲಯಕ್ಕೆ ಕಳುಹಿಸುವ ಆಲೋಚನೆ ಇದೆ ಎಂದು ಯುವಕ ಮೇಘರಾಜ್ ಗುದ್ದಟ್ಟಿ ತಿಳಿಸಿದ್ದಾರೆ.
ಈ ಹಿಂದೆ ಇಳಕಲ್ನಲ್ಲಿ ಅಯೋಧ್ಯೆ ಶ್ರೀರಾಮನ ಸೀರೆಯನ್ನು ನೇಯುವ ಮೂಲಕ ಯುವಕ ಮೇಘರಾಜ್ ಗಮನ ಸೆಳೆದಿದ್ದರು. ಸೂರ್ಯಯಾನ-3 ಯಶಸ್ವಿಯಾದಾಗ ವಿಜ್ಞಾನಿಗಳಿಗೆ ಶುಭಾಶಯ ಕೋರಿ ಯುವಕ ಮೇಘರಾಜ್ ಸೀರೆಯನ್ನು ನೇಯ್ದಿದ್ದರು. ಪುನೀತ್ ರಾಜಕುಮಾರ ಅವರ ಕೊನೆಯ ಚಿತ್ರ ಜೇಮ್ಸ್ ಶತದಿನ ಆಚರಿಸಲೆಂದು ಮತ್ತು ಕಾಂತಾರಾ ಚಿತ್ರಕ್ಕೆ ಆಸ್ಕರ್ ಅವಾರ್ಡ್ ಸಿಗಲಿ ಎಂದು ಸೀರೆಯಲ್ಲಿ ನೇಯ್ಗೆ ಮಾಡಿ ಮೇಘರಾಜ್ ಶುಭಹಾರೈಸಿದ್ದರು.