ಕಾಳಿ ನದಿಯಲ್ಲಿ ಜಲ ಸಾಹಸ ಕ್ರೀಡಾ ತರಬೇತಿ ಪ್ರಾರಂಭ

ಕಾರವಾರ: ಇಲ್ಲಿನ ಕಾಳಿ ನದಿಯಲ್ಲಿ ರಾಜ್ಯ ಮಟ್ಟದ ಜಲಸಾಹಸ ತರಬೇತಿ ಶಿಬಿರ ಆರಂಭಗೊಂಡಿದೆ. ಜನರಲ್ ತಿಮ್ಮಯ್ಯ ಸಾಹಸ ಅಕಾಡೆಮಿ (ಜೆತ್ನಾ) ಯುವ ಸಬಲೀಕರಣ ಮತ್ತು ಕ್ರೀಡಾ ಇಲಾಖೆ, ರಾಜ್ಯದ ವಿವಿಧ ಜಿಲ್ಲೆಗಳ ಎಸ್‌ಸಿ, ಎಸ್‌ಟಿ ಯುವಕ, ಯುವತಿಯರಿಗಾಗಿ ಜಲ ಸಾಹಸ ತರಬೇತಿ ಬೇಸಿಕ್ ಶಿಬಿರವನ್ನು ಆಯೋಜಿಸಲಾಗಿದೆ.
ಚಿಕ್ಕಬಳ್ಳಾಪುರ, ಬೆಂಗಳೂರು, ಕೋಲಾರ ಹಾಗೂ ಸ್ಥಳೀಯರು ಸೇರಿ 30 ಅಭ್ಯರ್ಥಿಗಳು ತರಬೇತಿಯಲ್ಲಿ ಪಾಲ್ಗೊಂಡಿದ್ದು, 10 ದಿನಗಳ ಈ ತರಬೇತಿಯಲ್ಲಿ ಈಜು, ನೀರಿನಲ್ಲಿ ಬಿದ್ದವರ ರಕ್ಷಣೆ, ಕಯಾಕಿಂಗ್, ರ‍್ಯಾಫ್ಟಿಂಗ್ ಮುಂತಾದ ಜಲ ಸಾಹಸ ಕೌಶಲಗಳನ್ನು ಉಚಿತ ಊಟ, ವಸತಿಯೊಂದಿಗೆ ನೀಡಲಾಗುತ್ತಿದೆ. ನ.18 ರಿಂದ 2 ನೇ ಬ್ಯಾಚ್‌ನ ಶಿಬಿರ ಪ್ರಾರಂಭವಾಗಲಿದೆ.

ಕಟ್ಟಡ ಬಳಕೆ:
ಕಾಳಿ ನದಿಯಲ್ಲಿ ಸದಾಶಿವಗಡದಲ್ಲಿ ಜನರಲ್ ತಿಮ್ಮಯ್ಯ ಸಾಹಸ ಅಕಾಡೆಮಿಯಿಂದ 1 ಕೋಟಿ ರೂ. ವೆಚ್ಚದಲ್ಲಿ ಹಾಸ್ಟೆಲ್ ನಿರ್ಮಾಣ ಮಾಡಲಾಗಿತ್ತು. ಆದರೆ, ಅದು ಸಮರ್ಪಕವಾಗಿ ಬಳಕೆಯಾಗದ ಹಿನ್ನೆಲೆಯಲ್ಲಿ ಹಾಸ್ಟೆಲ್‌ನ್ನು ಜಂಗಲ್ ರೆಸಾರ್ಟ್ಗೆ ಹಸ್ತಾಂತರಿಸಲಾಗಿತ್ತು. ಈ ವರ್ಷ ಅದನ್ನು ವಾಪಸ್ ಪಡೆಯಲಾಗಿತ್ತು. ಆದರೆ, ಕಟ್ಟಡ ಬಳಕೆಯಿಲ್ಲದೇ ಪಾಳು ಬಿದ್ದಿತ್ತು. ಈ ಕುರಿತು `ವಿಜಯವಾಣಿ' ವರದಿ ಪ್ರಕಟಿಸಿತ್ತು. ಈಗ ಜನರಲ್ ತಿಮ್ಮಯ್ಯ ಸಾಹಸ ಅಕಾಡೆಮಿ ತನ್ನ ಚಟುವಟಿಕೆ ಮರು ಪ್ರಾರಂಭ ಮಾಡಿರುವುದರಿಂದ ಕಟ್ಟಡ ಬಳಕೆಗೆ ಬಂದಿದೆ.

ಇದನ್ನೂ ಓದಿ: ಹೆಗಡೆಯಲ್ಲಿ ಪಂಜರ‌ ಬಂಧಿಯಾದ ಚಿರತೆ