ಶಿವಮೊಗ್ಗ: ಪೊಲೀಸರು ಕೂಡಲೇ ಮುನ್ನೆಚ್ಚರಿಕೆ ವಹಿಸಿರದಿದ್ದರೆ ಶಿವಮೊಗ್ಗದಲ್ಲೂ ಏನಾದರೂ ಆಘಾತಕಾರಿ ಘಟನೆ ನಡೆದಿರುತ್ತಿತ್ತಾ? ಎಂಬ ಪ್ರಶ್ನೆ ಉದ್ಭವಿಸುವಂಥ ಪ್ರಕರಣ ನಡೆದಿದೆ. ಏಕೆಂದರೆ ಇಲ್ಲಿನ ಪೊಲೀಸರು ನಡೆಸಿದ ವಿಶೇಷ ಕಾರ್ಯಾಚರಣೆ ವೇಳೆ ತಲ್ವಾರ್ ಮತ್ತು ಡ್ಯಾಗರ್ಗಳು ಪತ್ತೆಯಾಗಿವೆ.
ದಕ್ಷಿಣಕನ್ನಡ ಜಿಲ್ಲೆಯ ಸುಳ್ಯದ ಬೆಳ್ಳಾರೆಯಲ್ಲಿನ ಬಿಜೆಪಿ ಕಾರ್ಯಕರ್ತ ಪ್ರವೀಣ್ ಹತ್ಯೆ ಹಿನ್ನೆಲೆಯಲ್ಲಿ ಮುಂಜಾಗ್ರತಾ ಕ್ರಮವಾಗಿ ಪೊಲೀಸರು ಶಿವಮೊಗ್ಗ ನಗರದಲ್ಲಿ ಹೈ ಅಲರ್ಟ್ ಜೊತೆಗೆ ವಿಶೇಷ ಕಾರ್ಯಾಚರಣೆ ನಡೆಸಿದ್ದರು.
ಇಂದು ಸಂಜೆಯಿಂದ 3 ಗಂಟೆಗಳ ಕಾಲ ಶಿವಮೊಗ್ಗ ಪೊಲೀಸರು 50 ಚೆಕ್ ಪೋಸ್ಟ್ಗಳ ಮೂಲಕ ವಾಹನ ಹಾಗೂ ವ್ಯಕ್ತಿಗಳ ತಪಾಸಣೆ ಮಾಡಿದ್ದರು. ಅಲ್ಲದೆ 30 ವರ್ಷದೊಳಗಿನ ಯುವಕರ ಜೊತೆ ಅನುಮಾನಾಸ್ಪದವಾಗಿ ಓಡಾಡುತ್ತಿದ್ದವರನ್ನೂ ತಪಾಸಣೆ ಮಾಡಲಾಗಿದೆ. ಈ ಸಂದರ್ಭದಲ್ಲಿ ತಲ್ವಾರ್ ಹಾಗೂ ಡ್ಯಾಗರ್ಗಳು ಪತ್ತೆಯಾಗಿವೆ.
ರೌಡಿಶೀಟರ್ಗಳ ಮನೆಗಳನ್ನೂ ತಪಾಸಣೆ ಮಾಡಲಾಗಿದ್ದು, ವೈನ್ ಶಾಪ್ ಸುತ್ತಮುತ್ತ ಹಾಗೂ ನಿರ್ಜನ ಪ್ರದೇಶಗಳಲ್ಲಿ ಕುಡಿಯುವವರ ವಿರುದ್ಧವೂ ಕೇಸ್ ದಾಖಲಿಸಿದ್ದಾರೆ. ಕಾರ್ಯಾಚರಣೆಯ ವೇಳೆ ಒಂದು ತಲ್ವಾರ್, 4 ಹರಿತವಾದ ಡ್ಯಾಗರ್ಗಳು ಸಿಕ್ಕಿದ್ದು, 350 ಐಎಂವಿ ಕೇಸ್, 11 ಅಬಕಾರಿ ಹಾಗೂ 93 ಲಘು ಪ್ರಕರಣ ಮತ್ತು ಜೊತೆಗೆ 96 ತಂಬಾಕು ಕೇಸ್ ಹಾಗೂ 10 ಗಾಂಜಾ ಸೇವನೆ ಕೇಸ್ಗಳನ್ನು ಪೊಲೀಸರು ದಾಖಲಿಸಿಕೊಂಡಿದ್ದಾರೆ. ಮುಂಜಾಗ್ರತಾ ಕ್ರಮವಾಗಿ ನಗರದಲ್ಲಿ ಪೊಲೀಸ್ ಬಂದೋಬಸ್ತ್ ಮುಂದುವರಿದಿದೆ.