ಬೆಂಗಳೂರು : ಲಘುವಿಮಾನ ಬಳಸಿಕೊಂಡು ಆ್ಯಂಟಿಮೈಕ್ರೋಬಿಯಲ್ ಸಾವಯವ ಔಷಧವನ್ನು ಸಿಂಪಡಿಸಿ ಕರೊನಾ ವೈರಸ್ ಹತೋಟಿಗೆ ತರುವ ಪ್ರಯತ್ನವೊಂದನ್ನು ಕೈಗೆತ್ತಿಕೊಳ್ಳಲಾಗಿದೆ. ಮೊಟ್ಟ ಮೊದಲ ಬಾರಿಗೆ ರಾಜಧಾನಿ ಬೆಂಗಳೂರು ನಗರದಲ್ಲಿ ಪೈಲೆಟ್ ಪ್ರಾಜೆಕ್ಟ್ ಆಗಿ ಏರಿಯಲ್ ವರ್ಕ್ಸ್ ಏರೋ ವತಿಯಿಂದ ಬಿಬಿಎಂಪಿ ಸಹಯೋಗದಲ್ಲಿ ಈ ಕಾರ್ಯ ನಡೆಯಲಿದೆ.
ಬೆಂಗಳೂರಿನ ಗಲ್ಲಿಗಲ್ಲಿಗೂ ಎಂಟ್ರಿ ಕೊಡಲಿರುವ ಈ ಲಘುವಿಮಾನವು ಮೂರು ದಿನಗಳಲ್ಲಿ ನಗರದ ವಿವಿಧೆಡೆ ಆಂಟಿ ಮೈಕ್ರೋಬಯಲ್ ಸಲ್ಯೂಷನ್ಅನ್ನು ಸಿಂಪಡಿಸಲಿದೆ. ಕೇವಲ 8 ನಿಮಿಷಗಳಲ್ಲಿ ವೈರಸ್ನ ಕಥೆ ಮುಗಿಸುವ ಸಾಮರ್ಥ್ಯ ಹೊಂದಿರುವ ಆರ್ಗ್ಯಾನಿಕ್ ಸ್ಪ್ರೇ ಇದಾಗಿದೆ. ಈ ಔಷಧಿ ಸಿಂಪಡಿಸಿದರೆ ಶೇಕಡ 88 ರಷ್ಟು ವೈರಸ್ ಹರಡುವಿಕೆ ತಡೆಗಟ್ಟುವ ಸಾಧ್ಯತೆ ಇದೆ ಎನ್ನಲಾಗಿದೆ.
ಇದೇ ಮೊದಲ ಬಾರಿಗೆ ಬೆಂಗಳೂರಿನಲ್ಲಿ ಪ್ರಯೋಗ ಮಾಡುತ್ತಿದ್ದು, 1 ಗಂಟೆಗೆ 300 ಹೆಕ್ಟೇರ್ ಕವರ್ ಮಾಡುವ ಸಾಮರ್ಥ್ಯವನ್ನು ಈ ಲಘು ವಿಮಾನ ಹೊಂದಿರುತ್ತದೆ. ಡ್ರೋನ್ಗಿಂತಲೂ ಹೆಚ್ಚು ವೇಗವಾಗಿ ಔಷಧಿ ಸಿಂಪಡಿಸುವ ಸಾಮರ್ಥ್ಯವಿದ್ದು, ಇಡೀ ಬೆಂಗಳೂರಿಗೆ ಔಷಧಿ ಸಿಂಪಡಿಸಲು 25 ದಿನಗಳು ಹಿಡಿಯಲಿವೆ ಎನ್ನಲಾಗಿದೆ.
ಪ್ರಾಯೋಗಿಕ ಚಾಲನೆ : ಇಂದು ಜಕ್ಕೂರು ಏರೋಡ್ರಮ್ ಆವರಣದಲ್ಲಿ ಸಾವಯವ ಸೋಂಕುನಿವಾರಕದ ಪ್ರಾಯೋಗಿಕ ವೈಮಾನಿಕ ಸಿಂಪಡಣೆಗೆ ಕಂದಾಯ ಸಚಿವರಾದ ಆರ್.ಅಶೋಕ್, ಬಿಡಿಎ ಅಧ್ಯಕ್ಷ ಎಸ್.ಆರ್.ವಿಶ್ವನಾಥ್ ಮತ್ತು ಶಾಸಕ ಕೃಷ್ಣ ಭೈರೇಗೌಡ ಚಾಲನೆ ನೀಡಿದರು. ಈ ವೇಳೆ ಆಡಳಿತ ಅಧಿಕಾರಿ ರಾಕೇಶ್ ಸಿಂಗ್, ಕಂದಾಯ ಇಲಾಖೆ ಪ್ರಧಾನ ಕಾರ್ಯದರ್ಶಿ ಎನ್.ಮಂಜುನಾಥ ಪ್ರಸಾದ್ ಮತ್ತು ಜಂಟಿ ಆಯುಕ್ತ ಸರ್ಫರಾಜ್ ಖಾನ್ ಉಪಸ್ಥಿತರಿದ್ದರು.
"ಬೆಂಗಳೂರನ್ನು ಕೋವಿಡ್ನಿಂದ ಕಾಪಾಡುವತ್ತ ಸರ್ಕಾರ ಗಮನ ಹರಿಸಿದೆ. ಮೊದಲಿಗೆ ಜನಸಂದಣಿ ಹೆಚ್ಚಿರುವ ಪ್ರದೇಶಗಳಲ್ಲಿ ಔಷಧಿ ಸಿಂಪಡಿಸುವ ಕಾರ್ಯಕ್ರಮ ಹಾಕಿಕೊಂಡಿದ್ದಾರೆ. ಈ ಹಿಂದೆಯೂ ಇವರು ಸ್ವಯಂಪ್ರೇರಿತರಾಗಿ ಔಷಧಿ ಸಿಂಪಡಿಸಿದ್ದಾರೆ. ಮಾರ್ಕೆಟ್ ಅಂತಹ ಜಾಗಗಳಲ್ಲಿ ಈ ಔಷಧಿ ಸಿಂಪಡಿಸುವ ಯೋಚನೆ ಇದೆ" ಎಂದು ಕಂದಾಯ ಸಚಿವ ಆರ್.ಅಶೋಕ್ ಹೇಳಿದ್ದಾರೆ.
ಮಾರುಕಟ್ಟೆ ಪ್ರದೇಶಗಳಲ್ಲಿ ನಾಳೆಯಿಂದ ಈ ದ್ರಾವಣವನ್ನು ಸ್ಪ್ರೇ ಮಾಡಲಾಗುತ್ತದೆ. ಶಿವಾಜಿನಗರ, ಕಲಾಸಿಪಾಳ್ಯ, ಕೆ.ಆರ್.ಮಾರ್ಕೆಟ್ಗಳಲ್ಲಿ ಸೋಮವಾರದಿಂದ ಬೆಳಗ್ಗೆ 8-10 ರವರೆಗೆ ದ್ರಾವಣ ಸಿಂಪಡಣೆ ನಡೆಯಲಿದೆ. ಈಗ ಸದ್ಯಕ್ಕೆ ರಾಜ್ಯ ಸರ್ಕಾರ ಯಾವುದೇ ಹಣ ಕೊಡ್ತಿಲ್ಲ. ಇದು ಪೈಲೆಟ್ ಪ್ರಾಜೆಕ್ಟ್ ಆಗಿದ್ದು, ಫಲಿತಾಂಶ ನೋಡಿಕೊಂಡು ಸರ್ಕಾರ ನಿರ್ಧರಿಸಲಿದೆ. ಇದು ಪರಿಣಾಮಕಾರಿಯಾದರೆ ಎಲ್ಲೆಡೆ ಅಳವಡಿಸುತ್ತೇವೆ ಎಂದು ಸಚಿವ ಅಶೋಕ್ ಹೇಳಿದ್ದಾರೆ.