ಬೆಂಗಳೂರು: ಜನರ ಒಳಿತಿಗಾಗಿ ಕೋವಿಡ್-19 ಸೋಂಕು ತಡೆಗಟ್ಟಲು ಲಾಕ್ಡೌನ್ ಹೇರಿದ್ದರೂ, ಬೇಕಾಬಿಟ್ಟಿ ರಸ್ತೆಯಲ್ಲಿ ಓಡಾಡುತ್ತಿದ್ದವರಿಗೆ ಗೃಹ ಸಚಿವರು ಹಾಗೂ ಪೊಲೀಸ್ ಆಯುಕ್ತರು ಶಾಕ್ ಕೊಟ್ಟಿದ್ದಾರೆ.
ಇಂದು ಮಟ-ಮಟ ಮಧ್ಯಾಹ್ನ ರಸ್ತೆಗಿಳಿದ ಗೃಹ ಸಚಿವ ಬಸವರಾಜ್ ಬೊಮ್ಮಾಯಿ ಹಾಗೂ ನಗರ ಪೊಲೀಸ್ ಆಯುಕ್ತ ಭಾಸ್ಕರ್ ರಾವ್ ಚೆಕ್ಪೋಸ್ಟ್ಗಳ ವಾಸ್ತವ ಪರಿಸ್ಥಿತಿಯನ್ನು ಪರಿಶೀಲಿಸಿದರು. ಕೆಜಿ ಹಳ್ಳಿಯ ಮುಖ್ಯರಸ್ತೆಯಲ್ಲಿ ಖಾಸಗಿ ವಾಹನಗಳಲ್ಲಿ ಸಾರ್ವಜನಿಕರಂತೆ ಓಡಾಡಿ ಗಮನ ಸೆಳೆದರು.
ತಪಾಸಣೆ ವೇಳೆ ನಕಲಿ ಕರೊನಾ ಪೊಲೀಸ್ ಪಾಸ್ ಕೂಡ ಪತ್ತೆಯಾಗಿದೆ. ಗೃಹಸಚಿವರ ಪರಿಶೀಲನೆ ವೇಳೆ ನಕಲಿ ಪಾಸ್ ಹೊಂದಿದ್ದ ವ್ಯಕ್ತಿ ಸಿಕ್ಕಿಬಿದ್ದಿದ್ದಾನೆ. ಗೂಡ್ಸ್ ಆಟೋ ಹಾಗೂ ಒಂದು ಕಾರ್ನಲ್ಲಿ ನಕಲಿ ಪಾಸ್ ಪತ್ತೆಯಾಗಿದೆ. ಮೂಲ ಪಾಸ್ ಅನ್ನು ಕಲರ್ ಝೆರಾಕ್ಸ್ ಮಾಡಿ ಪೊಲೀಸರಿಗೆ ಚಮಕ್ ನೀಡಿದ್ದಾರೆ.
ನಕಲಿ ಪಾಸ್ ಹೊಂದಿದ್ದ ಚಾಲಕರ ಮೈ ಚಳಿ ಬಿಡಿಸಿದ ಬಸವರಾಜ್ ಬೊಮ್ಮಾಯಿ, ಗೂಡ್ಸ್ ಆಟೋ ಹಾಗೂ ಕಾರ್ ಸೀಜ್ ಮಾಡುವಂತೆ ಆದೇಶಿಸಿದರು. ಪಾಸ್ ಇಲ್ಲದೇ ಓಡಾಡುತ್ತಿದ್ದವರಿಗೆ ಇದೇ ಕೊನೆಯ ಎಚ್ಚರಿಕೆ ಎಂದರು.