ಆನೇಕಲ್/ ಬೆಂಗಳೂರು: ಮೈಸೂರು ರಸ್ತೆಯ ಹೊಸಗುಡ್ಡದಹಳ್ಳಿಯಲ್ಲಿ ಸ್ಫೋಟಗೊಂಡ ಕೆಮಿಕಲ್ ಫ್ಯಾಕ್ಟರಿಯನ್ನು ಅಕ್ರಮವಾಗಿ ಸ್ಥಾಪಿಸಲಾಗಿತ್ತು ಎಂಬ ರಹಸ್ಯ ಬಯಲಾಗಿದ್ದು, ಬೆಂಕಿ ಅವಘಡದ ಬಳಿಕ ಇಲ್ಲಿನ ಅವ್ಯವಸ್ಥೆ ಅನಾವರಣಗೊಂಡಿದೆ. ರಾಜ್ಯ ರಾಜಧಾನಿಯಲ್ಲಿ ಹಲವು ವರ್ಷಗಳಿಂದ ಅಕ್ರಮವಾಗಿ ತಲೆಎತ್ತಿ ಕೋಟ್ಯಂತರ ವ್ಯವಹಾರ ನಡೆಸುತ್ತಿದ್ದ ಈ ಫ್ಯಾಕ್ಟರಿಯಲ್ಲಿ ಅಗ್ನಿ ದುರಂತ ಸಂಭವಿಸುತ್ತಿದ್ದಂತೆ ಸ್ಥಳಕ್ಕೆ ಸಚಿವ ಬಸವರಾಜ ಬೊಮ್ಮಾಯಿ ದೌಡಾಯಿಸಿದ್ದಾರೆ.
ಮಂಗಳವಾರ ಈ ಗೋದಾಮಿನಲ್ಲಿ ಕಾಣಿಸಿಕೊಂಡ ಬೆಂಕಿಯ ಕೆನ್ನಾಲಿಗೆ ಉಂಟು ಮಾಡಿದ ಹಾನಿ ಅಷ್ಟಿಷ್ಟಲ್ಲ. ಸುಮಾರು 12 ಗಂಟೆಗಳ ಸತತ ಕಾರ್ಯಾಚರಣೆ ಬಳಿಕ ಬೆಂಕಿಯ ತೀವ್ರತೆಯನ್ನು ತಗ್ಗಿಸಲಾಯಿತು. ಬಳಿಕ 17 ಗಂಟೆಗಳ ಕಾಲ ಕಾರ್ಯಾಚರಣೆ ನಡೆಸಿ ಸಂಪೂರ್ಣವಾಗಿ ಬೆಂಕಿ ನಂದಿಸುವಲ್ಲಿ ಅಗ್ನಿಶಾಮಕ ಸಿಬ್ಬಂದಿ, ಸಿವಿಲ್ ಡಿಫೆನ್ಸ್, ಎಸ್ಡಿಆರ್ಎಫ್ ಯಶಸ್ವಿಯಾದರು. ಈ ಘಟನೆಯಲ್ಲಿ ಅಕ್ಕಪಕ್ಕದ 9 ಮನೆಗೆ ಹಾನಿಯಾಗಿದ್ದು, ಎಂಟು ವಾಹನ ಬೆಂಕಿಗೆ ಆಹುತಿಯಾಗಿವೆ. ಹದಿನೈದಕ್ಕೂ ಹೆಚ್ಚು ಮಂದಿ ಗಾಯಗೊಂಡಿದ್ದಾರೆ. ಅಂದಹಾಗೆ ಈ ಫ್ಯಾಕ್ಟರಿ ರೇಖಾ ಇಂಡಸ್ಟ್ರೀಸ್ ಹೆಸರಿನಲ್ಲಿ ಅಕ್ರಮವಾಗಿ ತಲೆಎತ್ತಿತ್ತು. ಕತ್ತಲೆ ಕೋಣೆಯಂತಿದ್ದ ಈ ಫ್ಯಾಕ್ಟರಿಯನ್ನ ಸಾವಿನ ಕೂಪ ಎಂದೇ ಹೇಳಲಾಗುತ್ತಿದೆ.
ದೊಮ್ಮಸಂದ್ರದ ರೇಖಾ ಇಂಡಸ್ಟ್ರೀಸ್ ಮಾಲೀಕ ಸಜ್ಜನ್ ರಾಜ್ ಎಂಬಾತ ಹೊಸಗುಡ್ಡದಹಳ್ಳಿಯಲ್ಲಿ ಅಕ್ರಮವಾಗಿ ಫ್ಯಾಕ್ಟರಿಯನ್ನು ನಡೆಸುತ್ತಿದ್ದ. ಈ ಘಟಕಕ್ಕೆ ವಿದ್ಯುತ್ ಸಂಪರ್ಕವನ್ನೇ ಪಡೆದಿರಲಿಲ್ಲ. ಆಯಿಲ್ ಕಂಪನಿ ಇರುವ ಬಗ್ಗೆ ಸಾಕಷ್ಟು ಜನರಿಗೆ ಮಾಹಿತಿಯೇ ಇರಲಿಲ್ಲ. ಹಗಲಿನಲ್ಲಿ ಗೇಟ್ ಬಾಗಿಲು ಹಾಕಿ ಬ್ಯಾರೆಲ್ಗಳಿಗೆ ಕೆಮಿಕಲ್ ತುಂಬಲಾಗುತ್ತಿತ್ತು. ಗಿಡಗಂಟಿ ಬೆಳೆದಿದ್ದರಿಂದ ಒಳಗೆ ಏನು ನಡೆಯುತ್ತಿದೆ ಎನ್ನುವುದೇ ಸ್ಥಳೀಯರಿಗೆ ಗೊತ್ತಾಗುತ್ತಿರಲಿಲ್ಲ. ಸ್ವಂತ ಜಾಗ ಇದ್ದರೂ ಇದೇ ರೀತಿ ಹಲವೆಡೆ ವಿದ್ಯುತ್ ಸಂಪರ್ಕ ಪಡೆದಿಲ್ಲ. ಕತ್ತಲಿನಲ್ಲೇ ಕಾರ್ಮಿಕರು ಕೆಲಸ ಮಾಡಬೇಕಿತ್ತು. ಬಹುತೇಕ ಕಾರ್ಮಿಕರು ಸಜ್ಜನ್ ರಾಜ್ ಊರಿನವರೇ ಆಗಿದ್ದರು. ಇನ್ನಷ್ಟು ಕಡೆ ಇದೇ ರೀತಿಯ ಫ್ಯಾಕ್ಟರಿಗಳು ಇದೆ ಎನ್ನಲಾಗಿದೆ.
ಘಟನೆ ಸಂಬಂಧ ಬಿಬಿಎಂಪಿ ವೈಫಲ್ಯ ಒಪ್ಪಿಕೊಂಡ ಕಮಿಷನರ್ ಮಂಜುನಾಥ್ ಪ್ರಸಾದ್, ಬೆಸ್ಕಾಂ, ಮಾಲಿನ್ಯ ಮಂಡಳಿ, ಹೆಲ್ತ್ ಡಿಪಾರ್ಟ್ಮೆಂಟ್ ಲೋಪವೂ ಇದೆ ಎಂದಿದ್ದಾರೆ. ಪ್ರಕರಣ ಸಂಬಂಧ ಫ್ಯಾಕ್ಟರಿ ಮಾಲೀಕ ಸಜ್ಜನ್ ರಾಜ್, ಇವರ ಪತ್ನಿ ಕಮಲಾ ಮತ್ತು ಪುತ್ರ ಅನಿಲ್ನನ್ನು ಪೊಲೀಸರು ಬಂಧಿಸಿದ್ದಾರೆ.
ಅಗ್ನಿ ದುರಂತ ಸಂಭವಿಸಿದ ಫ್ಯಾಕ್ಟರಿಯಲ್ಲಿ ಆ್ಯಸಿಟೋನ್, ಮಿಥೈಲ್ ಕ್ಲೋರೈಡ್ ಹಾಗೂ ಆಲ್ಕೋಹಾಲ್ ಕಂಟೆಂಟ್ ಕೆಮಿಕಲ್ ಇರಿಸಲಾಗಿತ್ತು ಎಂದು ಪ್ರಾಥಮಿಕ ತನಿಖೆಯಿಂದ ತಿಳಿದಿದೆ. ಬುಧವಾರ ನಗರ ಪೊಲೀಸ್ ಆಯುಕ್ತ ಕಮಲ್ ಪಂತ್ ಮತ್ತು ಗೃಹ ಸಚಿವ ಬಸವರಾಜ್ ಬೊಮ್ಮಾಯಿ ಸ್ಥಳ ಪರಿಶೀಲಿಸಿದರು.
ಬಹಳ ದೊಡ್ಡ ಪ್ರಮಾಣದ ಅಗ್ನಿ ಅವಘಡ ಆಗಿದೆ. ಅಗ್ನಿಶಾಮಕದ 11 ಸಿಬ್ಬಂದಿಗೆ ಗಾಯಗಳಾಗಿವೆ. ಇಂಥಹ ಘಟಕ ಜನ ವಸತಿ ಸ್ಥಳದಲ್ಲಿ ಇರುವುದು ಸರಿಯಲ್ಲ. ಜನ ವಸತಿಗೆ ಅನುಮತಿ ನೀಡಿದ ಮೇಲೆ ಇಂಥಹ ಕೆಮಿಕಲ್ ಘಟಕಕ್ಕೆ ಇರಲು ಅವಕಾಶ ನೀಡಬಾರದು. ಮಾಲೀಕರ ತಪ್ಪು ಎದ್ದು ಕಾಣ್ತಿದೆ. ದೊಡ್ಡಬೊಮ್ಮಸಂದ್ರದಲ್ಲಿ ಪರವಾನಗಿ ಪಡೆದು ಇಲ್ಲಿ ಘಟಕ ತೆರೆದಿದ್ದಾರೆ. ಇದರಿಂದ ನಾವು ಪಾಠ ಕಲಿಯಬೇಕಿದೆ. ಎಲ್ಲೆಲ್ಲಿ ಕೆಮಿಕಲ್ ಘಟಕಗಳಿವೆ ಎಂಬ ಪರಿಶೀಲನೆ ಆಗಬೇಕು. ಠಾಣಾವಾರು ಇಂಥಹ ಸುರಕ್ಷಿತವಲ್ಲದ ಘಟಕಗಳನ್ನ ಪತ್ತೆ ಹಚ್ಚಲು ಸೂಚಿಸಲಾಗಿದೆ ಎಂದರು.