ಕಿನ್ನಿಗೋಳಿ: ಹಳೆಯಂಗಡಿಯ ಲೈಟ್ಹೌಸ್ ನಿವಾಸಿ ಅವಿನಾಶ್ ರತ್ನಾಕರ ಹೆಗ್ಡೆ(32) ಎಂಬುವರು ಕಿನ್ನಿಗೋಳಿ ಸಮೀಪದ ಉಲ್ಲಂಜೆ ಬಳಿ ವಿದ್ಯುತ್ ಆಘಾತಕ್ಕೆ ಬಲಿಯಾಗಿದ್ದಾರೆ.
ಉಲ್ಲಂಜೆಯ ಮನೆಯೊಂದರಲ್ಲಿ ತಗಡು ಶೀಟ್ ಅಳವಡಿಸುತ್ತಿದ್ದಾಗ ಅವಿನಾಶ್ ಕೈಯಲ್ಲಿದ್ದ ಪೈಪ್ ಸಮೀಪದ ವಿದ್ಯುತ್ ತಂತಿಗೆ ತಗುಲಿದ್ದು. ವಿದ್ಯುತ್ ಪ್ರವಹಿಸಿ ಕುಸಿದು ಬಿದ್ದಿದ್ದರು.
ಕೂಡಲೇ ಅವರನ್ನು ನಿತಿನ್ ಹಾಗೂ ರಕ್ಷಿತ್ ಎಂಬುವರ ಸಹಕಾರದಿಂದ ಆಸ್ಪತ್ರೆಗೆ ಸಾಗಿಸಲಾಗಿದ್ದು, ಅದಾಗಲೇ ಮೃತಪಟ್ಟಿದ್ದರು. ಅವಿನಾಶ್ ಅವಿವಾಹಿತರಾಗಿದ್ದು, ತಂದೆ, ತಾಯಿ ಹಾಗೂ ಸಹೋದರನನ್ನು ಅಗಲಿದ್ದಾರೆ. ಮೂಲ್ಕಿ ಠಾಣೆಯಲ್ಲಿ ಪ್ರಕರಣ ದಾಖಲಾಗಿದೆ.