ಬೆಂಗಳೂರು: ಅಪರೂಪದ 'ರೆಡ್ ಸ್ಯಾಂಡ್ ಬೋವಾ' ( Red Sand Boa ) ಹಾವು ಹಾಗೂ ಕೋರಲ್‌ ಸೀ ಫ್ಯಾನ್‌‌ಗಳನ್ನು ಅಕ್ರಮವಾಗಿ ಮಾರಾಟ ಮಾಡಲು ಯತ್ನಿಸಿದ ಎರಡು ಪ್ರತ್ಯೇಕ ಪ್ರಕರಣಗಳಲ್ಲಿ 7 ಮಂದಿ ಆರೋಪಿಗಳನ್ನು ಸಿಸಿಬಿ ಪೊಲೀಸರು ಬಂಧಿಸಿದ್ದಾರೆ.
ಎರಡೂ ಪ್ರರಕಣಗಳ ಸಂಬಂಧ ಬೆಂಗಳೂರು ನಗರ ಪೊಲೀಸರು ತಮ್ಮ ಎಕ್ಸ್ ಖಾತೆಯಲ್ಲಿ ಮಾಹಿತಿ ಹಂಚಿಕೊಂಡಿದ್ದಾರೆ. ಸಾರ್ವಜನಿಕರಲ್ಲಿದ್ದ ಮೂಢನಂಬಿಕೆ ಮತ್ತು ಕಂದಾಚಾರಗಳನ್ನು ಬಂಡವಾಳವಾಗಿ ಮಾಡಿಕೊಂಡು, ಅಪರೂಪದ 'ರೆಡ್ ಸ್ಯಾಂಡ್ ಬೋವಾ' (Red Sand Boa) ಹಾವನ್ನು ಬರೋಬ್ಬರಿ 1 ಕೋಟಿ ರೂಪಾಯಿಗೆ ಅಕ್ರಮವಾಗಿ ಮಾರಾಟ ಮಾಡಲು ಹೊಂಚುಹಾಕಿದ್ದ ಪ್ರಮುಖ ಆರೋಪಿಯನ್ನು ಸಿಸಿಬಿ ಪೊಲೀಸರು ಬಂಧಿಸಿದ್ದಾರೆ. ಅಲ್ಲದೆ, ಆರೋಪಿಯಿಂದ ಒಂದು ಜೀವಂತ ಹಾವನ್ನು ಹಾಗೂ ಕೃತ್ಯಕ್ಕೆ ಬಳಸಿದ್ದ ಮೊಬೈಲ್ ಫೋನ್ ಅನ್ನು ವಶಪಡಿಸಿಕೊಳ್ಳಲಾಗಿದೆ ಎಂದು ತಿಳಿಸಿದ್ದಾರೆ.
ಇದೇ ಕಾರ್ಯಾಚರಣೆಯ ಮುಂದುವರಿದ ಭಾಗವಾಗಿ, ಮತ್ತೊಂದು ಪ್ರತ್ಯೇಕ ಮತ್ತು ಗಂಭೀರ ಪ್ರಕರಣದಲ್ಲಿ ಸಮುದ್ರ ಜೀವಿಗಳ ರಕ್ಷಣೆಗೆ ಸಂಬಂಧಿಸಿದಂತೆ ಸಿಸಿಬಿ ಪೊಲೀಸರು ಬೃಹತ್ ಬೇಟೆಯಾಡಿದ್ದಾರೆ.
ಪರಿಸರಕ್ಕೆ ಅತ್ಯಂತ ಅಮೂಲ್ಯವಾದ ಅಪರೂಪದ 'ಕೋರಲ್‌ ಸೀ ಫ್ಯಾನ್‌‌ಗಳನ್ನು' (Coral Sea Fans) ಸಂಗ್ರಹಿಸಿ ಮಾರುಕಟ್ಟೆಯಲ್ಲಿ ಅಕ್ರಮವಾಗಿ ಮಾರಾಟ ಮಾಡಲು ಯತ್ನಿಸುತ್ತಿದ್ದ ಜಾಲವೊಂದನ್ನು ಸಿಸಿಬಿ ಪೊಲೀಸರು ಭೇದಿಸಿದ್ದಾರೆ. ಈ ಕೃತ್ಯದಲ್ಲಿ ನೇರವಾಗಿ ಭಾಗಿಯಾಗಿದ್ದ ಆರು ಮಂದಿ ಆರೋಪಿಗಳನ್ನು ಬಂಧಿಸುವಲ್ಲಿ ಯಶಸ್ವಿಯಾಗಿರುವ ತನಿಖಾ ತಂಡ, ಅವರ ವಶದಲ್ಲಿದ್ದ ಒಟ್ಟು 970 ಸಾಫ್ಟ್ ಕೋರಲ್‌ ಸೀ ಫ್ಯಾನ್‌ಗಳು ಹಾಗೂ ಮೂರು ಮೊಬೈಲ್ ಫೋನ್‌ಗಳನ್ನು ಜಪ್ತಿ ಮಾಡಿದ್ದಾರೆ.
ರೆಡ್ ಸ್ಯಾಂಡ್ ಬೋವಾ ಎಂಬುದು ವಿಷಕಾರಿಯಲ್ಲದ, ಬೋವಿಡೆ (Boidae) ಕುಟುಂಬಕ್ಕೆ ಸೇರಿದ ಒಂದು ವಿಶಿಷ್ಟ ಹಾಗೂ ಅಪರೂಪದ ಮರಳು ಹಾವು ಪ್ರಭೇದವಾಗಿದೆ. ಇದರ ವಿಶೇಷತೆಯೆಂದರೆ, ಇದರ ತಲೆ ಮತ್ತು ಬಾಲದ ಭಾಗವು ನೋಡಲು ಒಂದೇ ರೀತಿಯಾಗಿ ಕಾಣುವುದರಿಂದ ಇದಕ್ಕೆ ಎರಡು ತಲೆಯ ಹಾವು ಎಂಬ ತಪ್ಪು ಕಲ್ಪನೆ ಇದೆ. ಈ ಹಾವನ್ನು ಸ್ಪರ್ಶಿಸಿದರೆ ಅಥವಾ ಮನೆಯಲ್ಲಿಟ್ಟುಕೊಂಡರೆ ಅದೃಷ್ಟ ಖುಲಾಯಿಸುತ್ತದೆ, ಭಾರಿ ಸಂಪತ್ತು ಸಿಗುತ್ತದೆ ಹಾಗೂ ಇದನ್ನು ಮಾರುಕಟ್ಟೆಯಲ್ಲಿ ಕೋಟ್ಯಂತರ ರೂಪಾಯಿಗೆ ಮಾರಾಟ ಮಾಡಬಹುದು ಎಂಬ ಮೂಢನಂಬಿಕೆ ಮತ್ತು ಕಂದಾಚಾರ ಸಮಾಜದಲ್ಲಿ ವ್ಯಾಪಕವಾಗಿ ಬೇರೂರಿದೆ. ಆದರೆ, ಪ್ರಕೃತಿಯಲ್ಲಿ ಈ ಹಾವಿಗೆ ಅಂತಹ ಯಾವುದೇ ಅತಿಮಾನುಷ ಶಕ್ತಿಗಳು ಇಲ್ಲ. ಇದರ ವಿಶಿಷ್ಟ ಗೋಚರತೆ ಮತ್ತು ಅಪರೂಪದ ಕಾರಣದಿಂದ ವನ್ಯಜೀವಿ ಕಳ್ಳಸಾಗಣೆದಾರರು ಮೂಢನಂಬಿಕೆಗಳನ್ನು ಬಂಡವಾಳವಾಗಿಟ್ಟುಕೊಂಡು ಅಕ್ರಮವಾಗಿ ಇದರ ಬೇಟೆಯಾಡಿ ಮಾರಾಟ ಮಾಡಲು ಯತ್ನಿಸುತ್ತಿದ್ದಾರೆ. ವೈಲ್ಡ್‌ಲೈಫ್ ಪ್ರೊಟೆಕ್ಷನ್ ಆಕ್ಟ್ ಅಡಿಯಲ್ಲಿ ಈ ಹಾವಿನ ರಕ್ಷಣೆ ಮಾಡಲಾಗಿದ್ದು, ಇದನ್ನು ಹಿಡಿಯುವುದು, ಇಟ್ಟುಕೊಳ್ಳುವುದು ಅಥವಾ ಮಾರಾಟ ಮಾಡುವುದು ಕಾನೂನುಬಾಹಿರ ಅಪರಾಧವಾಗಿದೆ.
ಸಾಫ್ಟ್ ಕೋರಲ್‌ ಸೀ ಫ್ಯಾನ್‌ಗಳು ಅಳಿವಿನಂಚಿನಲ್ಲಿರುವ ಮತ್ತು ಆಳವಾದ ಸಮುದ್ರದ ತಳದಲ್ಲಿ ಬೆಳೆಯುವ ಸುಂದರವಾದ ಜೀವಿಗಳಾಗಿವೆ. ಇವುಗಳನ್ನು ಸಾಮಾನ್ಯವಾಗಿ 'ಗಾರ್ಗೋನಿಯನ್ಸ್' ಎಂದೂ ಕರೆಯಲಾಗುತ್ತದೆ. ನೋಡಲು ಫ್ಯಾನ್ ಆಕಾರದಲ್ಲಿರುವ ಈ ಜೀವಿಗಳು, ಸಮುದ್ರದ ಪರಿಸರ ವ್ಯವಸ್ಥೆಯನ್ನು ಸಮತೋಲನದಲ್ಲಿಡಲು ಮತ್ತು ಜಲಚರಗಳಿಗೆ ಸೂಕ್ತ ಆವಾಸಸ್ಥಾನವನ್ನು ಕಲ್ಪಿಸಲು ಪ್ರಮುಖ ಪಾತ್ರ ವಹಿಸುತ್ತವೆ. ಆದರೆ, ಇವುಗಳ ಆಕರ್ಷಕ ನೋಟ ಹಾಗೂ ಆಭರಣಗಳು ಮತ್ತು ಕರಕುಶಲ ವಸ್ತುಗಳ ತಯಾರಿಕೆಯಲ್ಲಿ ಬಳಸುವ ಉದ್ದೇಶದಿಂದ ಕೆಲವರು ಇವುಗಳನ್ನು ಅಕ್ರಮವಾಗಿ ಬೇಟೆಯಾಡಿ ಕಳ್ಳಸಾಗಣೆ ಮಾಡುತ್ತಾರೆ. ಪರಿಸರ ಸಂರಕ್ಷಣಾ ಕಾಯ್ದೆಗಳ ಅಡಿಯಲ್ಲಿ ಇವುಗಳನ್ನು ಕಟ್ಟುನಿಟ್ಟಾಗಿ ರಕ್ಷಿಸಲಾಗಿದ್ದು, ಇವುಗಳ ಸಂಗ್ರಹಣೆ ಅಥವಾ ಮಾರಾಟ ಮಾಡುವುದು ಕಾನೂನುಬಾಹಿರ ಅಪರಾಧವಾಗಿದೆ.
ವನ್ಯಜೀವಿಗಳನ್ನು ಮಾರಾಟ ಮಾಡುವ ಜಾಲ ಹಾಗೂ ಅಳಿವಿನಂಚಿನಲ್ಲಿರುವ ಅಪರೂಪದ ಜೀವಿಗಳ ಅಕ್ರಮ ಕಳ್ಳಸಾಗಣೆ ಚಟುವಟಿಕೆಗಳು ಪರಿಸರ ಹಾಗೂ ಸಮಾಜಕ್ಕೆ ದೊಡ್ಡ ಮಾರಕವಾಗಿ ಪರಿಣಮಿಸಿವೆ. ಈ ರೀತಿಯ ಅಕ್ರಮ ವ್ಯವಹಾರಗಳಲ್ಲಿ ತೊಡಗಿರುವ ಕಿಡಿಗೇಡಿಗಳ ವಿರುದ್ಧ ಕಠಿಣ ಕಾನೂನು ಕ್ರಮ ಕೈಗೊಳ್ಳಲಾಗುವುದು ಎಂದು ಸಿಸಿಬಿ ಹಿರಿಯ ಅಧಿಕಾರಿಗಳು ಎಚ್ಚರಿಕೆ ನೀಡಿದ್ದಾರೆ. ಸಾರ್ವಜನಿಕರು ಇಂತಹ ಯಾವುದೇ ಮೂಢನಂಬಿಕೆಗಳಿಗೆ ಬಲಿಯಾಗದೆ, ಅಕ್ರಮ ಚಟುವಟಿಕೆಗಳ ಬಗ್ಗೆ ಪೊಲೀಸರಿಗೆ ತಕ್ಷಣವೇ ಮಾಹಿತಿ ನೀಡುವಂತೆ ಮನವಿ ಮಾಡಿದ್ದಾರೆ.
ಪ್ರಕೃತಿಯ ವಿಸ್ಮಯಗಳಾಗಿರುವ ಅಪರೂಪದ ವನ್ಯಜೀವಿಗಳು ಮತ್ತು ಸಮುದ್ರ ಸಂಪತ್ತಿನ ಸಂರಕ್ಷಣೆಗೆ ಸಿಸಿಬಿ ಸದಾ ಕಾಲ ಕಣ್ಣಿಟ್ಟಿದ್ದು, ಇಂತಹ ಕೃತ್ಯಗಳನ್ನು ಸದೆಬಡಿಯಲು ವಿಶೇಷ ತನಿಖಾ ತಂಡಗಳು ಸದಾ ಸನ್ನದ್ಧವಾಗಿರಲಿವೆ ಎಂದು ಸ್ಪಷ್ಟಪಡಿಸಲಾಗಿದೆ. ಸದ್ಯ ಬಂಧಿತ ಎಲ್ಲ ಆರೋಪಿಗಳ ವಿರುದ್ಧ ತನಿಖೆ ತೀವ್ರಗೊಂಡಿದ್ದು, ಈ ಜಾಲದ ಹಿಂದೆ ಬೇರೆ ಯಾರದ್ದಾದರೂ ಕೈವಾಡವಿದೆಯೇ ಎಂಬ ಬಗ್ಗೆಯೂ ಪೊಲೀಸರು ಆಳವಾದ ತನಿಖೆ ನಡೆಸುತ್ತಿದ್ದಾರೆ, (ಏಜೆನ್ಸೀಸ್).