| ಅವಿನ್ ಶೆಟ್ಟಿ ಉಡುಪಿ
ರಾಜ್ಯದ ಸಮಾಜ ಕಲ್ಯಾಣ ಇಲಾಖೆ ಹಾಸ್ಟೆಲ್ ವಾರ್ಡನ್ಗಳು 20 ವರ್ಷಗಳಿಂದ ಬಡ್ತಿ ಭಾಗ್ಯದಿಂದ ವಂಚಿತರಾಗಿದ್ದಾರೆ. ಹಳೇ ನಿಯಮದಂತೆ ಕಡಿಮೆ ಪ್ರಮಾಣದಲ್ಲಿ ಬಡ್ತಿ ಸಿಗುತ್ತಿರುವುದರಿಂದ 1900ಕ್ಕೂ ಅಧಿಕ ಮಂದಿ ಬಡ್ತಿ ರಹಿತರಾಗಿ ಹತ್ತಾರು ವರ್ಷಗಳಿಂದ ದುಡಿಯುತ್ತಿದ್ದಾರೆ.
ಸರ್ಕಾರಿ ಸಿಬ್ಬಂದಿ ಕನಿಷ್ಠ 2 ಬಾರಿ ಮುಂಬಡ್ತಿ ನಿಯಮವಿದೆ. ಸಮಾಜ ಕಲ್ಯಾಣ ಇಲಾಖೆ ಅಧೀನ ಸಂಸ್ಥೆ ಐಟಿಡಿಪಿಯಲ್ಲಿ ಅಧೀಕ್ಷಕರ ಹುದ್ದೆ ಮುಂಬಡ್ತಿಗೆ ಶೇ.30, ವಾರ್ಡನ್ಸ್ಗೆ 60, ಹಿಂದುಳಿದ ವರ್ಗಗಳ ಇಲಾಖೆಯಲ್ಲಿ ವಾರ್ಡನ್ಗಳಿಗೆ ಶೇ.80, ಎಫ್ಡಿಎಗೆ ಶೇ.10 ಮುಂಬಡ್ತಿಗೆ ಅವಕಾಶವಿದೆ. ಆದರೆ ಸಮಾಜ ಕಲ್ಯಾಣ ಇಲಾಖೆ ವಾರ್ಡನ್ಗಳಿಗೆ ಈ ಅವಕಾಶವಿಲ್ಲ.
1985ರ ವೃಂದ ಮತ್ತು ನೇಮಕಾತಿ (ಸಿ ಆಂಡ್ ಆರ್) ನಿಯಮದಂತೆ ಇಲಾಖೆಯ ವಾರ್ಡನ್ಗಳಿಗೆ ಶೇ.20, ಪ್ರಥಮ ದರ್ಜೆ ಸಹಾಯಕರಿಗೆ ಶೇ.75 ಮುಂಬಡ್ತಿ ಇದೆ. ಈ ನಿಯಮ ರೂಪಿಸುವ ಸಂದರ್ಭ ಹಾಸ್ಟೆಲ್ಗಳು, ವಾರ್ಡನ್ಗಳ ಸಂಖ್ಯೆ ಕಡಿಮೆ ಇತ್ತು. ಪ್ರಸಕ್ತ ಹೆಚ್ಚಾಗಿರುವುದರಿಂದ ಈ ಬಡ್ತಿ ಕ್ರಮದಲ್ಲಿ ಅನ್ಯಾಯವಾಗುತ್ತಿದೆ. ಇಲಾಖೆಗೆ 2010ರಲ್ಲಿ ಎಫ್ಡಿಎ ಆಗಿ ಸೇರಿದವರು ಕಚೇರಿ ಅಧೀಕ್ಷಕ (ಪತ್ರಾಂಕಿತ), ಸಹಾಯಕ ನಿರ್ದೇಶಕ (ಎಡಿ) ಹುದ್ದೆ ಸಹಿತ ಎರಡೆರಡು ಬಡ್ತಿ ಪಡೆದಿದ್ದಾರೆ. 20 ವರ್ಷದಿಂದ ನಾವು ವಾರ್ಡನ್ ಹುದ್ದೆಯಲ್ಲಿಯೇ ಕರ್ತವ್ಯ ನಿರ್ವಹಿಸಿ ನಿವೃತ್ತರಾಗುವ ಪರಿಸ್ಥಿತಿ ಬಂದಿದೆ ಎಂದು ಬಡ್ತಿ ವಂಚಿತ ವಾರ್ಡನ್ಗಳು ಅಳಲು ತೋಡಿಕೊಂಡಿದ್ದಾರೆ.
ವಾರ್ಡನ್ ಹುದ್ದೆಗಳಿಗೆ ಬಿಎಡ್, ಪದವಿ ವಿದ್ಯಾರ್ಹತೆ ನಿಗದಿಪಡಿಸಿರುವುದರಿಂದ ಪ್ರೌಢಶಾಲೆ ಸಹ ಶಿಕ್ಷಕರ ವೇತನ ಶ್ರೇಣಿ ನೀಡಬೇಕು. 365 ದಿನವೂ ಕರ್ತವ್ಯ, ಜವಾಬ್ದಾರಿ ನಿರ್ವಹಿಸುವ ವಾರ್ಡನ್ಗಳಿಗೆ ರಜೆ ಸಂದರ್ಭ ಪರ್ಯಾಯ ವ್ಯವಸ್ಥೆ ಇಲ್ಲ. ಈ ನಿಟ್ಟಿನಲ್ಲಿ ಜೂನಿಯರ್ ವಾರ್ಡನ್ ನೇಮಕವಾಗಬೇಕು. ಸಹಾಯಕ ನಿರ್ದೇಶಕರ ಹುದ್ದೆ ನೇರ ನೇಮಕಾತಿ ರದ್ದುಪಡಿಸಿ ಬಡ್ತಿಯಿಂದ ಭರ್ತಿ ಮಾಡಬೇಕು. ಪೊಲೀಸ್ ಇಲಾಖೆಯಂತೆ ವೇತನ ಆಯೋಗ ಶಿಫಾರಸು ಮಾಡಿದಂತೆ ಭತ್ಯೆ ನೀಡಬೇಕಿದೆ ಎಂಬ ಆಗ್ರಹ ವಾರ್ಡನ್ಗಳದ್ದು.
ಪ್ರಸ್ತುತ ಹಲವು ಜಿಲ್ಲೆಗಳಲ್ಲಿ ವಾರ್ಡನ್ಗಳ ಕೊರತೆ ಇದೆ. ಬಹುತೇಕರಿಗೆ ಹೆಚ್ಚುವರಿ ಜವಾಬ್ದಾರಿ ನೀಡಲಾಗಿದೆ. ಬಡ್ತಿ ಸಮಸ್ಯೆ ಬಗೆಹರಿಸುವ ಬೇಡಿಕೆ ಜತೆಗೆ ಹಾಸ್ಟೆಲ್ ವಾರ್ಡನ್ ನೇಮಕಾತಿಗೆ ಕ್ರಮ ಕೈಗೊಳ್ಳಲಾಗುವುದು.
| ಕೋಟ ಶ್ರೀನಿವಾಸ ಪೂಜಾರಿ ಸಮಾಜ ಕಲ್ಯಾಣ ಮತ್ತು ಹಿಂದುಳಿದ ವರ್ಗಗಳ ಕಲ್ಯಾಣ ಸಚಿವ
ಕಳೆದ 20 ವರ್ಷಗಳಿಂದ ಮುಂಬಡ್ತಿಯಾಗಿಲ್ಲ. ಸಮಾಜ ಕಲ್ಯಾಣ ಇಲಾಖೆ ವಾರ್ಡನ್ಗಳಿಗೆ ಸಿ ಆಂಡ್ ಆರ್ ನಿಯಮಗಳಿಗೆ ತಿದ್ದುಪಡಿ ಮಾಡಿ ಶೇ.80 ಮುಂಬಡ್ತಿ ಹೆಚ್ಚಿಸಬೇಕು.
| ಭಾಸ್ಕರ್ ಪೂಜಾರಿ ಬಳ್ಕೂರು ರಾಜ್ಯ ಪ್ರಧಾನ ಕಾರ್ಯದರ್ಶಿ, ಸಮಾಜ ಕಲ್ಯಾಣ ಇಲಾಖೆ ನಿಲಯ ಪಾಲಕರ ಸಂಘ