ಅಹಮದಾಬಾದ್: ನೆದರ್ಲ್ಯಾಂಡ್ ಮೂಲದ ಹಾರುವ ಕಾರು ತಯಾರಿಕಾ ಸಂಸ್ಥೆ ಪಾಲ್-ವಿ(ಪರ್ಸನಲ್ ಏರ್ ಲ್ಯಾಂಡ್ ವೆಹಿಕಲ್) ಗುಜರಾತಿನಲ್ಲಿ ತನ್ನ ತಯಾರಿಕ ಘಟಕವನ್ನು ಶೀಘ್ರದಲ್ಲೇ ಸ್ಥಾಪನೆ ಮಾಡಲಿದೆ.
2021ರಿಂದ ಕಾರು ಉತ್ಪಾದನೆ ಮಾಡಲು ಪಾಲ್-ವಿ ಕಂಪನಿ ಯೋಜನೆ ರೂಪಿಸಿದೆ. ಈ ಒಪ್ಪಂದ ಸಂಬಂಧ ವಿವೇಚನಾಯುಳ್ಳ ಲಿಖಿತ ದಾಖಲೆಗೆ ಗುಜರಾತಿನ ಮುಖ್ಯ ಕಾರ್ಯದರ್ಶಿ ಎಂ.ಕೆ.ದಾಸ್ ಮತ್ತು ಪಾಲ್-ವಿ ಕಂಪನಿಯ ಅಂತಾರಾಷ್ಟ್ರೀಯ ವ್ಯವಹಾರ ಅಭಿವೃದ್ಧಿ ವಲಯದ ಉಪಾಧ್ಯಕ್ಷ ಕಾರ್ಲೋ ಮಾಸ್ಬೊಮ್ಮೆಲ್ ಪರಸ್ಪರ ಒಪ್ಪಿಗೆ ಸೂಚಿಸಿ ಸಹಿ ಹಾಕಿದ್ದಾರೆ.
ಈ ಬಗ್ಗೆ ಹೇಳಿಕೆ ಬಿಡುಗಡೆ ಮಾಡಿರುವ ಗುಜರಾತ್ ಸರ್ಕಾರ ಕಂಪನಿಯು ಉತ್ಪಾದನಾ ಘಟಕ ತಯಾರಿಸಲು ಅಗತ್ಯವಾದ ಅನುಮೋದನೆಗಳಿಗೆ ನೆರವಾಗುವುದಾಗಿ ತಿಳಿಸಿದೆ.
ಮಾಸ್ಬೊಮ್ಮೆಲ್ ಪ್ರಕಾರ ವಿಶ್ವದರ್ಜೆಯ ಮೂಲಭೂತ ಸೌಕರ್ಯ ಮತ್ತು ಸರಳ ವ್ಯವಹಾರ ಹೊಂದಿರುವುದರಿಂದ ಗುಜರಾತ್ ಆಯ್ಕೆ ಮಾಡಿಕೊಂಡಿದ್ದಾಗಿ ಹೇಳಿದ್ದಾರೆ. ಇಷ್ಟೇ ಅಲ್ಲದೆ, ರಾಜ್ಯವು ಉತ್ತಮವಾಗಿ ವಾಣಿಜ್ಯಾತ್ಮಕ ಬಂದರು ಮತ್ತು ಸಾರಿಗೆ ವ್ಯವಸ್ಥೆಯನ್ನು ಹೊಂದಿರುವುದರಿಂದ ಉತ್ಪಾದಿಸಿದ ಕಾರುಗಳನ್ನು ಯುನೈಟೆಡ್ ನೇಷನ್ ಮತ್ತು ಇತರೆ ಯೂರೋಪಿಯನ್ ದೇಶಗಳಿಗೆ ರಫ್ತು ಮಾಡಲು ಅನುಕೂಲವಾಗಿದೆ. ಈಗಾಗಲೇ ಕಂಪನಿಯೂ 110 ಫ್ಲೈಯಿಂಗ್ ಕಾರುಗಳ ಆರ್ಡರ್ ಅನ್ನು ಸ್ವೀಕರಿಸಿದೆ. ಇದನ್ನು ಭಾರತದಿಂದಲೇ ರಫ್ತು ಮಾಡಲಾಗುವುದು ಎಂದು ಹೇಳಿದ್ದಾರೆ.
ಭಾರತದಲ್ಲಿ ತಯಾರಾಗುವಂತಹ ಫ್ಲೈಯಿಂಗ್ ಕಾರುಗಳಿಗೆ ಎರಡು ಇಂಜಿನ್ಗಳು ಇರಲಿದೆ. ರಸ್ತೆಯ ಮೇಲೆ ಗಂಟೆಗೆ 160 ಕಿ.ಮೀ. ವೇಗದಲ್ಲಿ ಚಲಿಸಲಿದೆ. ಅಲ್ಲದೆ, 180 ಕಿ.ಮೀ ವೇಗದಲ್ಲಿ ಹಾರಾಟ ನಡೆಸಲಿದೆ. ಕಾರು ಹಾರುವ ವಾಹನವಾಗಿ ಬದಲಾಗಲು ಮೂರು ನಿಮಿಷ ತೆಗದುಕೊಳ್ಳುತ್ತದೆ. ಇಂಧನಭರಿತ ಟ್ಯಾಂಕ್ 500 ಕಿ.ಮೀ ಅನ್ನು ಪೂರ್ಣಗೊಳಿಸಲಿದೆ. (ಏಜೆನ್ಸೀಸ್)