ಸಿನಿಮಾ ಸೆಲೆಬ್ರಿಟಿಗಳ ಬರ್ತ್ಡೇ ಅಂದರೆ ಅಲ್ಲಿ ಒಂದಿಲ್ಲೊಂದು ವಿಶೇಷತೆಗಳಿರುತ್ತವೆ. ಸಿನಿಮಾ ತಂಡಗಳಿಂದ ಹೊಸ ಹೊಸ ಘೋಷಣೆಗಳಿರಬಹುದು, ಫಸ್ಟ್ ಲುಕ್ ಪೋಸ್ಟರ್, ಟೀಸರ್ ಸೇರಿ ಏನಾದರೊಂದು ಇದ್ದೇ ಇರುತ್ತದೆ. ಆದರೆ, ಈ ಸಲ ಬಾಲಿವುಡ್ ಸುಂದರಿ, ಕನ್ನಡತಿ ದೀಪಿಕಾ ಪಡುಕೋಣೆ ಬರ್ತ್ಡೇಗೆ ಸಿನಿಮಾ ತಂಡಗಳಿಂದ ಯಾವುದೇ ವಿಶೇಷ ಘೋಷಣೆ ಆಗಿಲ್ಲ. ಅದರ ಬದಲು, ದೀಪಿಕಾ ಹುಟ್ಟುಹಬ್ಬದ ಸಂಭ್ರಮ ಸೋಷಿಯಲ್ ಮೀಡಿಯಾದಲ್ಲಿ ಮಾತ್ರ ಕಾಣುತ್ತಿದೆ. ಈ ನಡುವೆ ದೀಪಿಕಾ ಕುರಿತಾಗಿ ಹೊಸ ಸುದ್ದಿಯೊಂದು ಹರಿದಾಡುತ್ತಿದೆ. ಆದರೆ, ಅದು ಎಷ್ಟರ ಮಟ್ಟಿಗೆ ನಿಜ ಎಂಬುದು ಇನ್ನೂ ಸ್ಪಷ್ಟವಾಗಿಲ್ಲ. ವಿಷಯ ಏನೆಂದರೆ, ಯಶ್ರಾಜ್ ಫಿಲಂಸ್ ಬ್ಯಾನರ್ನಲ್ಲಿ ನಿರ್ಮಾಣವಾಗಲಿರುವ ‘ಧೂಮ್ 4’ ಚಿತ್ರದಲ್ಲಿ ದೀಪಿಕಾ ಪಡುಕೋಣೆ ನೆಗೆಟಿವ್ ಪಾತ್ರದಲ್ಲಿ ಕಾಣಿಸಿಕೊಳ್ಳುತ್ತಿ ದ್ದಾರಂತೆ.
‘ಧೂಮ್ 4’ ಚಿತ್ರವು ಕೆಲವು ವರ್ಷಗಳಿಂದ ಸುದ್ದಿಯಲ್ಲಿದ್ದು, ಈ ಚಿತ್ರದಲ್ಲಿ ಶಾರುಖ್ ಖಾನ್ ವಿಲನ್ ಆಗಿ ನಟಿಸುತ್ತಾರೆ ಎಂದು ಹಿಂದೆ ಹೇಳಲಾಗಿತ್ತು. ಆ ಸುದ್ದಿಯೇ ಇನ್ನೂ ಅಧಿಕೃತವಾಗಿಲ್ಲ, ಹೀಗಿರುವಾಗಲೇ ಈಗ ಶಾರುಖ್ ಜತೆಗೆ ದೀಪಿಕಾ ಹೆಸರು ಸೇರಿಕೊಂಡಿದ್ದು, ಈ ಇಬ್ಬರೂ ‘ಧೂಮ್ 4’ರಲ್ಲಿ ವಿಲನ್ ಅವತಾರದಲ್ಲಿ ಕಾಣಿಸಿಕೊಳ್ಳಲಿದ್ದಾರಂತೆ.