ಬೆಂಗಳೂರು: ಸ್ಯಾಂಡಲ್ವುಡ್ ಮತ್ತೆ ಹಳೇ ಲಯಕ್ಕೆ ಮರಳುತ್ತಿದೆ. ಕಳೆದ ಎರಡು ವರ್ಷಗಳಿಂದ ಯಾವುದೇ ಸಂಭ್ರಮ ಸಡಗರ ಕಾಣದ ಚಿತ್ರೋದ್ಯಮ, ಇದೀಗ ನಿಧಾನಕ್ಕೆ ಮುನ್ನೆಲೆಗೆ ಬರುತ್ತಿದೆ. ಅದರಲ್ಲೂ ಇದೀಗ ನವರಾತ್ರಿಯ ಹಬ್ಬದ ಸೀಸನ್. ಸಾಲುಸಾಲು ಸಿನಿಮಾ ಘೋಷಣೆ ಒಂದೆಡೆಯಾದರೆ, ಚಿತ್ರತಂಡಗಳಿಂದ ಹಾಡು, ಟ್ರೇಲರ್ಗಳ ಹರಿವೂ ಹೆಚ್ಚಾಗಿದೆ.
ಹಾಡುಗಳಿಂದಲೇ ರಂಗೇರಿದ ಚಂದನವನ: ಗಣೇಶ್ ಮತ್ತು ಸಿಂಪಲ್ ಸುನಿ ಕಾಂಬಿನೇಷನ್ ‘ಸಖತ್’ ತಂಡದಿಂದ ‘ಪ್ರೇಮಕ್ಕೆ ಕಣ್ಣಿಲ್ಲ ...’ ಹೆಸರಿನ ಹಾಡನ್ನು ಹೊರತಂದಿದೆ. ಈ ಹಾಡಿಗೆ ಜೂಡಾ ಸ್ಯಾಂಡಿ ಸಂಗೀತ ಸಂಯೋಜಿಸಿದ್ದಾರೆ. ಭರತ್ ನಾವುಂದ ನಿರ್ದೇಶನದ ಮನುರಂಜನ್ ನಟಿಸಿರುವ ‘ಮುಗಿಲ್ಪೇಟೆ’ ಚಿತ್ರದ ರೊಮ್ಯಾಂಟಿಕ್ ಹಾಡು ಕಿವಿಗಿಂಪು ನೀಡುತ್ತಿದೆ. ಅದೇ ರೀತಿ ಪ್ರೇಮ್ ನಟನೆಯ ‘ಪ್ರೇಮಂ ಪೂಜ್ಯ’ ಚಿತ್ರದ 10ನೇ ಹಾಡು, ಶ್ರೀಮುರಳಿ ‘ಮದಗಜ’ ಚಿತ್ರದ ‘ಗೆಳೆಯ ಗೆಳೆಯ ...’, ‘ಶ್ರೀಕೃಷ್ಣ ಆಟ್ಜೀಮೇಲ್.ಕಾಮ್ ಮತ್ತು ‘ಪುರುಷೋತ್ತಮ’ ಚಿತ್ರದ ಹಾಡುಗಳು ಸಹ ಬಿಡುಗಡೆ ಆಗಿವೆ.