ಸುಶಾಂತ್ ಸಾವಿನ ಬೆನ್ನಲ್ಲೇ ಬಾಲಿವುಡ್ನಲ್ಲಿನ ನೆಪೋಟಿಸಂ ಬಗ್ಗೆ ಹಲವಾರು ಕಲಾವಿದರು ಮುಕ್ತವಾಗಿ ಮಾತನಾಡುತ್ತಿದ್ದಾರೆ. ಹೊರಗಿನ ಪ್ರತಿಭೆಗಳಿಗೆ ಬಾಲಿವುಡ್ನಲ್ಲಿ ಮನ್ನಣೆ ನೀಡುವುದಿಲ್ಲ ಎಂಬ ಮಾತುಗಳು ಹೇಳಿಬರುತ್ತಿವೆ. ಒಂದಷ್ಟು ಸಂಸ್ಥೆಗಳು ಇಡೀ ಬಾಲಿವುಡ್ನ್ನು ಕಪಿಮುಷ್ಠಿಯಲ್ಲಿ ಇಟ್ಟುಕೊಂಡು ದರ್ಬಾರ್ ಮಾಡುತ್ತಿವೆ ಎಂದೂ ಆರೋಪಗಳು ಹೇಳಿಬರುತ್ತಿವೆ. ಈ ನಡುವೆ ಸುಶಾಂತ್ ಸಾವಿಗೆ ಸೂರಜ್ ಪಾಂಚೋಲಿ ಕಾರಣವಾಗಿರಬಹುದಾ ಎಂಬ ಮಾತು ಕೇಳಿ ಬಂದಿದೆ.
ಈ ಬಗ್ಗೆ ಪ್ರತಿಕ್ರಿಯಿಸುವ ಸೂರಜ್ ಪಾಂಚೋಲಿ ತಾಯಿ ಝರೀನಾ ‘ಜನ ಸುಖಾಸುಮ್ಮನೇ ಈ ಪ್ರಕರಣದಲ್ಲಿ ನನ್ನ ಮಗ ಸೂರಜ್ ಹೆಸರನ್ನು ತಳುಕು ಹಾಕುತ್ತಿದ್ದಾರೆ. ಸುಶಾಂತ್ಗೂ ಆತ್ಮಹತ್ಯೆಗೂ ನನ್ನ ಮಗನಿಗೂ ಯಾವುದೇ ಸಂಬಂಧವಿಲ್ಲ. ಜನ ಸಿಕ್ಕಿದ್ದೇ ತಡ ಏನೆನೋ ಆರೋಪ ಮಾಡುತ್ತಿದ್ದಾರೆ. ಅಂದಹಾಗೆ ಸೂರಜ್ ಮತ್ತು ಸುಶಾಂತ್ ಸ್ನೇಹಿತರಲ್ಲ. ಒಬ್ಬರನ್ನೊಬ್ಬರ ಬಲ್ಲವರಾದರೂ, ಎದುರಿಗೆ ಸಿಕ್ಕಾಗಷ್ಟೇ ಮಾತನಾಡುತ್ತಿದ್ದರು. ಅವರು ಒಬ್ಬರಿಗೊಬ್ಬರು ಸಹೋದರರ ರೀತಿ ಇದ್ದರು’ ಎಂದಿದ್ದಾರೆ.
ಇದನ್ನೂ ಓದಿ: ಇಲ್ಲಿ ಬೆಳೆಯುವುದು ಸುಲಭವಲ್ಲ
‘ಮತ್ತೊಬ್ಬರ ಸ್ಥಿತಿಯನ್ನು ತಮ್ಮ ಅನುಕೂಲಕ್ಕಾಗಿ ಈ ರೀತಿ ಬಳಕೆ ಮಾಡಿಕೊಳ್ಳಬಾರದು. ನನಗನಿಸಿದ ಮಟ್ಟಿಗೆ ಜನ ತುಂಬ ಫ್ರೀಯಾಗಿದ್ದಾರೆ. ಇಂಥ ವಿಚಾರದಲ್ಲಿ ಹೆಚ್ಚಿನ ಆಸಕ್ತಿ. ಅವರು ವಿಚಾರ ಮಾಡುವುದಿಲ್ಲ. ಇಂಥ ವಿಷಯಗಳು ಸಂಬಂಧಪಟ್ಟವರಿಗೆ ಎಷ್ಟೊಂದು ನೋವು ತಂದೊಡ್ಡುತ್ತವೆ ಎಂಬುದು. ಈಗಾಗಲೇ ಸೂರಜ್ ಹಲವು ಕಾರಣಕ್ಕೆ ನೊಂದಿದ್ದಾನೆ. ಮತ್ತೆ ಆ ಕೆಲಸ ಮಾಡಬೇಡಿ‘ ಎಂದು ಕೇಳಿಕೊಂಡಿದ್ದಾರೆ ಝರೀನಾ. (ಏಜೆನ್ಸೀಸ್)