ಲಾಕ್ಡೌನ್ ಮುಗಿದು ಪೋಸ್ಟ್ ಪ್ರೊಡಕ್ಷನ್ ಕೆಲಸಗಳೆಲ್ಲಾ ಶುರುವಾದ ಮೇಲೆ, 'ಕೆಜಿಎಫ್ 2' ಚಿತ್ರದ ಪೋಸ್ಟ್-ಪ್ರೊಡಕ್ಷನ್ ಕೆಲಸಗಳಲ್ಲಿ ಬ್ಯುಸಿಯಾಗಿದ್ದ ನಿರ್ದೇಶಕ ಪ್ರಶಾಂತ್ ನೀಲ್, ಇದೀಗ ನೆಟ್ಟಿಗರ ತಲೆಗೆ ಹುಳ ಬಿಟ್ಟಿದ್ದಾರೆ.
ಇಂದು ಅವರೊಂದು ಪೋಸ್ಟ್ ಹಾಕಿದ್ದಾರೆ. ಯಶ್ ಮತ್ತು ಅವರ ಸಂದರ್ಶನದ ಫೋಟೊಗಳನ್ನು ಶೇರ್ ಮಾಡುವುದರ ಜತೆಗೆ, 'ಇಲ್ಲಿ ಏನಾಗ್ತಿದೆ ಅಂತ ಗೆಸ್ ಮಾಡಿ' ಎಂದು ಹೇಳುವ ಮೂಲಕ ನೆಟ್ಟಿಗರ ತಲೆಗೆ ಹುಳ ಬಿಟ್ಟಿದ್ದಾರೆ. ಇಷ್ಟಕ್ಕೂ ಯಶ್ ಮತ್ತು ಪ್ರಶಾಂತ್ ಸಂದರ್ಶನ ನೀಡುತ್ತಿರುವುದಾದರೂ ಏಕೆ? ಏನಾದರೂ ದೊಡ್ಡ ಅನೌನ್ಸ್ಮೆಂಟ್ ಕಾದಿದೆಯಾ? ಎಂಬುದನ್ನು ಪ್ರಶಾಂತ್ ಹೇಳಿಲ್ಲ. ಎಲ್ಲವನ್ನೂ ನೆಟ್ಟಿಗರಿಗೇ ಬಿಟ್ಟಿದ್ದಾರೆ.
ಇನ್ನು ಪ್ರಶಾಂತ್ ಎಸೆದ ಸವಾಲನ್ನು ಸ್ವೀಕರಿಸಿರುವ ಹಲವರು, ತಮಗೆ ತೋಚಿದ್ದನ್ನು ಉತ್ತರಿಸಿದ್ದಾರೆ. ಪ್ರಮುಖವಾಗಿ 'ಕೆಜಿಎಫ್' ಚಿತ್ರವು ತೆಲುಗು ಚಾನಲ್ವೊಂದರಲ್ಲಿ ಸದ್ಯದಲ್ಲೇ ಪ್ರೀಮಿಯರ್ ಆಗಲಿದ್ದು, ಆ ಕುರಿತು ಅವರು ಸಂದರ್ಶನ ನೀಡಿದ್ದಾರೆ ಎಂದು ಹಲವರು ಅಭಿಪ್ರಾಯ ಪಟ್ಟಿದ್ದಾರೆ. ಇನ್ನೂ ಕೆಲವರು 'ಕೆಜಿಎಫ್ 2' ಚಿತ್ರದ ಬಗ್ಗೆ ಏನಾದರೂ ಅಪಡೇಟ್ ಕೊಡುತ್ತಿರಬಹುದು ಎಂದು ಹೇಳಿದ್ದಾರೆ. ಹಲವು ಅಭಿಪ್ರಾಯಗಳು ಕೇಳಿ ಬರುತ್ತಿದ್ದರೂ, ಪ್ರಶಾಂತ್ ನೀಲ್ ಮಾತ್ರ ಸಂದರ್ಶನ ನೀಡುತ್ತಿರುವ ಬಗ್ಗೆ ರಹಸ್ಯ ಕಾಪಾಡಿಕೊಂಡಿದ್ದಾರೆ.
‘ಕೆಜಿಎಫ್ 2’ ಚಿತ್ರದ ಚಿತ್ರೀಕರಣ ಈಗಾಗಲೇ ಬಹುತೇಕ ಮುಗಿದಿದ್ದು, ಇನ್ನೂ ಕೆಲವು ದಿನಗಳ ಚಿತ್ರೀಕರಣ ಬಾಕಿ ಇದೆ. ಯಶ್, ಶ್ರೀನಿಧಿ ಶೆಟ್ಟಿ, ಸಂಜಯ್ ದತ್ ಮುಂತಾದವರು ನಟಿಸಿರುವ ಈ ಚಿತ್ರವನ್ನು ಹೊಂಬಾಳೆ ಫಿಲಂಸ್ನಡಿ ವಿಜಯಕುಮಾರ್ ಕಿರಗಂದೂರು ನಿರ್ಮಾಣ ಮಾಡುತ್ತಿದ್ದಾರೆ.