ಬೆಂಗಳೂರು: ‘ಕಿಚ್ಚ’ ಸುದೀಪ್ ನಟನೆಯ ಅನೂಪ್ ಭಂಡಾರಿ ನಿರ್ದೇಶನದ ‘ವಿಕ್ರಾಂತ್ ರೋಣ’ ಸಿನಿಮಾ ಶೂಟಿಂಗ್ ಹಂತದಿಂದಲೂ ಸುದ್ದಿಯಲ್ಲಿದೆ. ಅಷ್ಟೇ ಯಾಕೆ, ಬಹುಭಾಷೆಯಲ್ಲಿ ಸಿದ್ಧವಾಗುತ್ತಿರುವ ‘ರೋಣ’, ಇತ್ತೀಚೆಗೆ ದುಬೈನ ಬುರ್ಜ್ ಖಲೀಫಾ ಮೇಲೆಯೂ ಶೀರ್ಷಿಕೆ ಅನಾವರಣ ಮಾಡಿ ಸ್ಯಾಂಡಲ್ವುಡ್ನಲ್ಲಿ ಯಾರೂ ಮಾಡದ ದಾಖಲೆಯೊಂದನ್ನು ಬರೆದಿತ್ತು. ಇದೀಗ ಮತ್ತೊಂದು ಸರ್ಪ್ರೖೆಸ್ ನೀಡಲು ತಂಡ ಪ್ಲಾನ್ ಮಾಡಿದೆ. ಏನದು? ಅದನ್ನು ಏ. 15ರ ಬೆಳಗ್ಗೆ 11.10ಕ್ಕೆ ಚಿತ್ರತಂಡವೇ ಘೋಷಿಸಲಿದೆ. ಹಾಗಾದರೆ ಆ ಸರ್ಪ್ರೖೆಸ್ ಇವುಗಳಲ್ಲಿ ಒಂದಾಗಿರಲಿದೆಯೇ?
1 ‘ವಿಕ್ರಾಂತ್ ರೋಣ’ ಚಿತ್ರದ ಬಹುತೇಕ ಶೂಟಿಂಗ್ ಮುಗಿದಿದ್ದರೂ, ಇಲ್ಲಿಯವರೆಗೂ ಚಿತ್ರದ ನಾಯಕಿ ಯಾರು ಎಂಬುದನ್ನು ತಂಡ ಸ್ಪಷ್ಟಪಡಿಸಿಲ್ಲ. ಶ್ರದ್ಧಾ ಶ್ರೀನಾಥ್ ನಾಯಕಿ ಎಂಬ ವಿಚಾರ ಆರಂಭದಲ್ಲಿಯೇ ಕೇಳಿಬಂದಿತ್ತಾದರೂ, ಆ ನಂತರ ಅವರು ನಟಿಸುತ್ತಿಲ್ಲ ಎಂದು ಹೇಳಲಾಗಿತ್ತು. ಹಾಗಾಗಿ, ಚಿತ್ರತಂಡವು ನಾಯಕಿ ಯಾರು ಎಂಬುದನ್ನು ಅಧಿಕೃತ ಮಾಡಲಿದೆಯೇ ಎಂಬ ಕುತೂಹಲವೂ ಇದೆ.
2 ಚಿತ್ರದ ವಿಶೇಷ ಹಾಡೊಂದರಲ್ಲಿ ಬಾಲಿವುಡ್ ನಟಿ ಜಾಕ್ಲೀನ್ ಫರ್ನಾಂಡಿಸ್ ಕಾಣಿಸಿಕೊಳ್ಳುತ್ತಾರೆ ಎಂದು ನಿರ್ಮಾಪಕ ಜಾಕ್ ಮಂಜು ಸ್ಪಷ್ಟಪಡಿಸಿದ್ದರು. ಈ ಐಟಂ ಹಾಡಿಗೆ ಸಂಬಂಧಪಟ್ಟಂತೆ ಹೊಸ ಅಪ್ಡೇಟ್ ಮಾಹಿತಿಯನ್ನು ತಂಡ ಬಿಡುಗಡೆ ಮಾಡಬಹುದೇ ಎಂಬ ಮಾತು ಕೇಳಿಬರುತ್ತಿದೆ.
3 ಮೂರನೇ ವಿಚಾರ ಏನೆಂದರೆ, ‘ವಿಕ್ರಾಂತ್ ರೋಣ’ ಚಿತ್ರದ ಬಹುತೇಕ ಶೂಟಿಂಗ್ ಮುಕ್ತಾಯವಾಗಿದೆ. ಹೈದರಾಬಾದ್ ಸೇರಿ ಕೇರಳದ ಹಲವೆಡೆ ಚಿತ್ರದ ಚಿತ್ರೀಕರಣ ಮಾಡಲಾಗಿದೆ. ನಾಯಕಿ ಭಾಗದ ಚಿತ್ರೀಕರಣವಷ್ಟೇ ಬಾಕಿ ಇದೆ. ಹಾಗಾಗಿ ಚಿತ್ರದ ಬಿಡುಗಡೆ ದಿನಾಂಕವನ್ನು ಚಿತ್ರತಂಡ ಘೋಷಿಸುವ ಸಾಧ್ಯತೆಯೂ ದಟ್ಟವಾಗಿದೆ.