ಚೆನ್ನೈ: ಭಾರತದ ಅತೀ ಹೆಚ್ಚು ಸಂಭಾವನೆ ಪಡೆಯುವ ನಟ ಯಾರು? ಈ ಪ್ರಶ್ನೆಗೆ ಕೆಲವು ಹೆಸರುಗಳು ಉತ್ತರವಾಗಿ ಬರಬಹುದು. ಅಕ್ಷಯ್ ಕುಮಾರ್, ಸಲ್ಮಾನ್ ಖಾನ್, ಪ್ರಭಾಸ್ ... ಹೀಗೆ ಇವರೆಲ್ಲ ಒಂದು ಚಿತ್ರಕ್ಕೆ ಸಂಭಾವನೆಯಾಗಿ 80ರಿಂದ 100 ಕೋಟಿಯವರೆಗೂ ಸಂಭಾವನೆಯನ್ನು ಪಡೆಯುತ್ತಾರೆ.
ಇದನ್ನೂ ಓದಿ: ಅಕ್ಷಯ್ ಜತೆಗೆ ಮಾಧವನ್; ಇದು ನಂಬಿ ಎಫೆಕ್ಟ್
ಈಗ ಇವರೆಲ್ಲರನ್ನೂ ಹಿಂದಿಕ್ಕಿ, ಭಾರತದ ಅತೀ ಹೆಚ್ಚು ಸಂಭಾವನೆ ಪಡೆಯುವ ನಟರಾಗಿ ತಮಿಳಿನ 'ಇಳಯ ದಳಪತಿ' ವಿಜಯ್ ಹೊರಹೊಮ್ಮಿದ್ದಾರೆ. ಮೂಲಗಳ ಪ್ರಕಾರ, ನಾಳೆ ಬಿಡುಗಡೆಯಾಗುತ್ತಿರುವ 'ವಾರಿಸು' ಚಿತ್ರಕ್ಕೆ ಅವರು ಪಡೆಯುತ್ತಿರುವ ಸಂಭಾವನೆ 150 ಕೋಟಿ ರೂ.ಗಳಂತೆ. ಆಶ್ಚರ್ಯವಾಗಬಹುದು. ಆದರೂ ಇದು ನಿಜ ಎಂದು ಹೇಳಲಾಗುತ್ತಿದೆ.
ಅದಕ್ಕೆ ಕಾರಣವೂ ಇದೆ. ವಿಜಯ್ ಅವರಿಗೆ ಬರೀ ತಮಿಳುನಾಡು ಮಾತ್ರವಲ್ಲ, ಇಡೀ ದಕ್ಷಿಣ ಭಾರತದಲ್ಲೇ ಅತೀ ಹೆಚ್ಚು ಅಭಿಮಾನಿಗಳಿದ್ದಾರೆ. ಅಷ್ಟೇ ಅಲ್ಲ, ಅವರ ಸೋತ ಚಿತ್ರಗಳು ಸಹ ನಿರ್ಮಾಪಕರಿಗೆ ದೊಡ್ಡ ಹಣ ತಂದುಕೊಟ್ಟಿವೆ. ಮೇಲಾಗಿ, 'ವಾರಿಸು' ಚಿತ್ರವು ತೆಲುಗು ಮತ್ತು ಹಿಂದಿ ಭಾಷೆಗಳಿಗೂ ಡಬ್ ಆಗಿ ಬಿಡುಗಡೆಯಾಗುತ್ತಿವೆ. ಈ ಹಿನ್ನೆಲೆಯಲ್ಲಿ ಅವರು ಅಷ್ಟೊಂದು ಸಂಭಾವನೆಯನ್ನು ಪಡೆದಿದ್ದಾರೆ ಎಂದು ಹೇಳಲಾಗುತ್ತಿದೆ.
ಇದನ್ನೂ ಓದಿ: ‘ಕಡಲತೀರದ ಭಾರ್ಗವ’ ಚಿತ್ರದಿಂದ ಮಧುರವಾದ ಹಾಡು ಬಂತು …
'ವಾರಿಸು' ಚಿತ್ರವನ್ನು ವಂಶಿ ಪಡಿಪಲ್ಲಿ ನಿರ್ದೇಶಿಸಿದ್ದು, ದಿಲ್ ರಾಜು ನಿರ್ಮಾಣ ಮಾಡಿದ್ದಾರೆ. ವಿಜಯ್ಗೆ ನಾಯಕಿಯಾಗಿ ರಶ್ಮಿಕಾ ಮಂದಣ್ಣ ನಟಿಸಿದ್ದು, ಮಿಕ್ಕಂತೆ ಶರತ್ ಕುಮಾರ್, ಪ್ರಕಾಶ್ ರೈ, ಜಯಸುಧಾ, ಶ್ರೀಕಾಂತ್ ಮುಂತಾದವರು ಈ ಚಿತ್ರದಲ್ಲಿ ನಟಿಸಿದ್ದಾರೆ. ತಮಿಳು ಅವತರಣಿಕೆಯು 11ಕ್ಕೆ ಬಿಡುಗಡೆಯಾದರೆ, ಹಿಂದಿ ಮತ್ತು ತೆಲುಗು ಅವತರಣಿಕೆಗಳು ಕ್ರಮವಾಗಿ 13 ಮತ್ತು 14ಕ್ಕೆ ಬಿಡುಗಡೆಯಾಗಲಿದೆ.