ದಿನೇದಿನೆ ಕರೊನಾ ಹಾವಳಿ ಹೆಚ್ಚಾಗುತ್ತಿದೆಯಾದರೂ, ಇತ್ತೀಚಿನ ವರದಿಗಳ ಪ್ರಕಾರ ಗುಣಮುಖರಾಗುತ್ತಿರುವ ಪ್ರಮಾಣವೂ ಅಧಿಕವಾಗುತ್ತಿದೆ. ಆದರೆ, ಕರೊನಾಗೆಂದೇ ಸೀಮಿತವಾದ ಲಸಿಕೆ ಮಾತ್ರ ಇನ್ನೂ ಪೂರ್ಣ ಪ್ರಮಾಣದಲ್ಲಿ ಎಲ್ಲರನ್ನು ತಲುಪಿಲ್ಲ. ಈ ನಡುವೆ ಕರೊನಾದಿಂದ ಗುಣಮುಖರಾದ ವ್ಯಕ್ತಿ ಪ್ಲಾಸ್ಮಾ ದಾನ ಮಾಡುವ ಮೂಲಕ ಇನ್ನೊಬ್ಬ ಕರೊನಾ ರೋಗಿಯನ್ನು ಕಾಪಾಡಬಹುದಾಗಿದೆ. ಇದೀಗ ಈ ಪ್ಲಾಸ್ಮಾ ದಾನದ ಬಗ್ಗೆ ಎಲ್ಲೆಡೆ ಜಾಗೃತಿ ಮೂಡಿಸಲಾಗುತ್ತಿದೆ. ಟಾಲಿವುಡ್ ನಟ ವಿಜಯ್ ದೇವರಕೊಂಡ ಸಹ ಪ್ಲಾಸ್ಮಾ ದಾನದ ಬಗ್ಗೆ ಮಾತನಾಡಿದ್ದಾರೆ.
ಹೌದು, ಇತ್ತೀಚೆಗಷ್ಟೇ ಹೈದರಾಬಾದ್ನಲ್ಲಿ ಕರೊನಾ ರೋಗಿಗಳಿಗೆ ಪ್ಲಾಸ್ಮಾ ದಾನ ಮಾಡಿದ ಒಂದಷ್ಟು ಮಂದಿಯನ್ನು ಸನ್ಮಾನಿಸುವ ಕೆಲಸ ನಡೆಯಿತು. ನಟ ವಿಜಯ್ ದೇವರಕೊಂಡ ವಿಶೇಷ ಅತಿಥಿಯಾಗಿ ಆಗಮಿಸಿ ಪ್ಲಾಸ್ಮಾ ದಾನ ಮಾಡಿದ 10ಕ್ಕೂ ಅಧಿಕ ಮಂದಿಯನ್ನು ಸನ್ಮಾನಿಸಿದರು. ದಾನಿಗಳಿಗೂ ಈ ಸನ್ಮಾನ ಅಚ್ಚರಿ ಮೂಡಿಸಿತ್ತು.
‘ಪ್ಲಾಸ್ಮಾ ಥೆರಪಿ ಮೂಲಕ ಈಗಾಗಲೇ ಸಾಕಷ್ಟು ಮಂದಿ ಗುಣಮುಖರಾಗಿದ್ದಾರೆ. ಮುಂದಿನ ದಿನಗಳಲ್ಲಿ ಪ್ಲಾಸ್ಮಾ ದಾನಿಗಳ ಪ್ರಮಾಣದಲ್ಲಿಯೂ ಏರಿಕೆ ಕಾಣಲಿ. ಸದ್ಯ ಇದಕ್ಕೆ ನಿಖರವಾದ ಮದ್ದು ಇನ್ನೂ ಬಂದಿಲ್ಲ. ಹಾಗಾಗಿ ಹೆಚ್ಚೆಚ್ಚು ಮಂದಿ ಈ ಕೆಲಸದಲ್ಲಿ ತೊಡಗಿಸಿಕೊಳ್ಳಲಿ’ ಎಂದಿರುವ ವಿಜಯ್, ದಾನಿಗಳಿಗೆ ಸನ್ಮಾನಿಸಿ ಅವರ ಕಾರ್ಯಕ್ಕೆ ಮೆಚ್ಚುಗೆ ಸೂಚಿಸಿದ್ದಾರೆ.